ਪਿਤਾ ਦੀ ਮੌਤ ਦੇ ਕੁਝ ਘੰਟੇ ਬਾਅਦ ਹੀ ਬੋਰਡ ਪ੍ਰੀਖਿਆ ਦੇਣ ਪੁੱਜਾ 10ਵੀਂ ਦਾ ਵਿਦਿਆਰਥੀ

ਮਹਾਰਾਸ਼ਟਰ ਦੇ ਲਾਤੂਰ ਤੋਂ ਇਕ ਖ਼ਬਰ ਸਾਹਮਣੇ ਆ ਰਹੀ ਹੈ, ਜਿੱਥੇ 10ਵੀਂ ਜਮਾਤ ਦਾ ਇਕ ਵਿਦਿਆਰਥੀ ਆਪਣੇ ਪਿਤਾ ਦਾ ਅੰਤਿਮ ਸੰਸਕਾਰ ਕਰਨ ਦੇ ਕੁਝ ਘੰਟੇ ਬਾਅਦ ਹੀ ਆਪਣਾ ਬੋਰਡ ਦਾ ਇਮਤਿਹਾਨ ਦੇਣ ਸਕੂਲ ਪਹੁੰਚ ਗਿਆ। ਉਸ ਦੇ ਇਸ ਕੰਮ ਲਈ ਉਸ ਦੀ ਹਰ ਪਾਸੇ ਤਾਰੀਫ਼ ਹੋ ਰਹੀ ਹੈ। ਇਕ ਅਧਿਕਾਰੀ ਨੇ ਦੱਸਿਆ ਕਿ ਰਿਸ਼ੀਕੇਸ਼ ਦੇ ਪਿਤਾ ਰਾਮਨਾਥ ਪੁਰੀ ਦੀ ਅਹਿਮਦਪੁਰ ਤਹਿਸੀਲ ਅਧੀਨ ਪੈਂਦੇ ਪਿੰਡ ਢਾਲੇਗਾਓਂ ਵਿਖੇ ਅਚਾਨਕ ਮੌਤ ਹੋ ਗਈ ਸੀ। ਰਿਸ਼ੀਕੇਸ਼ ਆਪਣੇ ਮਾਮੇ ਨਾਲ ਬੋਰੀ ਸਲਗਾਰਾ ਪਿੰਡ ‘ਚ ਰਹਿੰਦਾ ਹੈ ਤੇ ਰਾਜੀਵ ਗਾਂਧੀ ਸਕੂਲ ਵਿਖੇ ਪੜ੍ਹਦਾ ਹੈ।

ਉਨ੍ਹਾਂ ਅੱਗੇ ਦੱਸਿਆ ਕਿ ਪਿਤਾ ਦੀ ਮੌਤ ਦੀ ਖ਼ਬਰ ਮਿਲਦਿਆਂ ਹੀ ਰਿਸ਼ੀਕੇਸ਼ ਢਾਲੇਗਾਓਂ ਚਲਾ ਗਿਆ ਸੀ, ਜਿੱਥੇ ਉਸ ਦੇ ਪਿਤਾ ਦਾ ਅੰਤਿਮ ਸੰਸਕਾਰ ਕੀਤਾ ਗਿਆ। ਉਸ ਦਾ ਪ੍ਰੀਖਿਆ ਕੇਂਦਰ ਉਸ ਦੇ ਪਿੰਡ ਤੋਂ ਕਰੀਬ 100 ਕਿਲੋਮੀਟਰ ਦੂਰ ਸੀ, ਜਿਸ ਕਾਰਨ ਉਸ ਦਾ ਸਮੇਂ ਸਿਰ ਪ੍ਰੀਖਿਆ ‘ਚ ਪਹੁੰਚਣਾ ਬਹੁਤ ਮੁਸ਼ਕਲ ਸੀ। ਇਸ ਦੌਰਾਨ ਲਾਤੂਰ ਦੇ ਸਿੱਖਿਆ ਅਧਿਕਾਰੀਆਂ ਨੇ ਰਿਸ਼ੀਕੇਸ਼ ਦੀ ਪ੍ਰੀਖਿਆ ਉਸ ਦੇ ਪਿੰਡ ‘ਚ ਹੀ ਕਰਵਾ ਦਿੱਤੀ। ਅਧਿਕਾਰੀਆਂ ਨੇ ਦੱਸਿਆ ਕਿ ਰਿਸ਼ੀਕੇਸ਼ ਨੇ ਪਿਤਾ ਦੀ ਮੌਤ ਦੇ ਬਾਵਜੂਦ ਜੋ ਪੜ੍ਹਨ ਦਾ ਜਨੂੰਨ ਦਿਖਾਇਆ ਹੈ, ਉਸ ਲਈ ਸਾਰਿਆਂ ਨੇ ਉਸ ਦੀ ਰੱਜ ਕੇ ਤਾਰੀਫ਼ ਕੀਤੀ ਹੈ।