ਬ੍ਰਿਟੇਨ, ਆਸਟ੍ਰੇਲੀਆ, ਨਿਊਜ਼ੀਲੈਂਡ ‘ਚ ਆਪਣਾ ਸੰਚਾਲਨ ਬੰਦ ਕਰੇਗੀ ਓਲਾ

ਨਵੀਂ ਦਿੱਲੀ – ਆਨਲਾਈਨ ਟੈਕਸੀ ਬੁਕਿੰਗ ਸੇਵਾ ਕੰਪਨੀ ਓਲਾ ਨੇ ਬ੍ਰਿਟੇਨ, ਆਸਟ੍ਰੇਲੀਆ ਅਤੇ ਨਿਊਜ਼ੀਲੈਂਡ ਵਿਚ ਆਪਣਾ ਸੰਚਾਲਨ ਬੰਦ ਕਰਨ ਦਾ ਫ਼ੈਸਲਾ ਕੀਤਾ ਹੈ। ਕੰਪਨੀ ਭਾਰਤ ਵਿੱਚ ਆਪਣੇ ਕਾਰੋਬਾਰ ‘ਤੇ ਧਿਆਨ ਕੇਂਦਰਤ ਕਰਨਾ ਜਾਰੀ ਰੱਖੇਗੀ। ਓਲਾ ਦੇ ਪ੍ਰਮੋਟਰ ANI Technologies ਨੇ ਮੰਗਲਵਾਰ ਨੂੰ ਕਿਹਾ ਕਿ ਕੰਪਨੀ ਨੂੰ ਭਾਰਤ ‘ਚ ਵਿਸਥਾਰ ਦੀ ਕਾਫੀ ਸੰਭਾਵਨਾ ਨਜ਼ਰ ਆ ਰਹੀ ਹੈ। ਓਲਾ ਮੋਬਿਲਿਟੀ ਦੇ ਬੁਲਾਰੇ ਨੇ ਕਿਹਾ, ‘ਸਾਡਾ ਕੰਮਕਾਜ਼ ਤੇਜ਼ੀ ਨਾਲ ਵਧ ਰਿਹਾ ਹੈ ਅਤੇ ਅਸੀਂ ਭਾਰਤ ਵਿੱਚ ਲਾਭਦਾਇਕ ਸਥਿਤੀ ਵਿੱਚ ਹਾਂ ਅਤੇ ਖੇਤਰ ਵਿੱਚ ਇੱਕ ਲੀਡਰ ਬਣੇ ਹੋਏ ਹਾਂ। ਨਾ ਸਿਰਫ਼ ਨਿੱਜੀ ਆਵਾਜਾਈ ਵਿੱਚ ਸਗੋਂ ਆਨਲਾਈਨ ਟੈਕਸੀ ਬੁਕਿੰਗ ਕਾਰੋਬਾਰ ਵਿੱਚ ਭਵਿੱਖ ਇਲੈਕਟ੍ਰਿਕ ਹੈ। ਨਾਲ ਹੀ, ਭਾਰਤ ਵਿੱਚ ਵਿਸਥਾਰ ਦੇ ਕਾਫ਼ੀ ਮੌਕੇ ਹਨ।’

ਉਨ੍ਹਾਂ ਕਿਹਾ, “ਇਸ ਦੇ ਨਾਲ, ਅਸੀਂ ਆਪਣੀਆਂ ਤਰਜੀਹਾਂ ਦਾ ਮੁੜ ਮੁਲਾਂਕਣ ਕੀਤਾ ਹੈ ਅਤੇ ਬ੍ਰਿਟੇਨ, ਆਸਟ੍ਰੇਲੀਆ ਅਤੇ ਨਿਊਜ਼ੀਲੈਂਡ ਵਿੱਚ ਆਪਣੇ ‘ਰਾਈਡ-ਹੇਲਿੰਗ’ ਕਾਰੋਬਾਰ (ਆਨਲਾਈਨ ਟੈਕਸੀ ਬੁਕਿੰਗ ਸੇਵਾ) ਨੂੰ ਇਸਦੇ ਮੌਜੂਦਾ ਰੂਪ ਵਿੱਚ ਬੰਦ ਕਰਨ ਦਾ ਫੈਸਲਾ ਕੀਤਾ ਹੈ।” ਕੰਪਨੀ ਨੇ 2018 ਵਿੱਚ ਵੱਖ-ਵੱਖ ਪੜਾਵਾਂ ਵਿੱਚ ਇਹ ਸੰਚਾਲਨ ਸ਼ੁਰੂ ਕੀਤਾ ਸੀ। ਸਟਾਕ ਮਾਰਕੀਟ ਨੂੰ ਦਿੱਤੀ ਗਈ ਜਾਣਕਾਰੀ ਦੇ ਅਨੁਸਾਰ, ANI Technologies ਦਾ ਏਕੀਕ੍ਰਿਤ ਸ਼ੁੱਧ ਘਾਟਾ ਵਿੱਤੀ ਸਾਲ 2022-23 ਵਿੱਚ ਘਟ ਕੇ 772.25 ਕਰੋੜ ਰੁਪਏ ਰਿਹਾ। ਕੰਪਨੀ ਨੂੰ ਵਿੱਤੀ ਸਾਲ 2021-22 ਵਿੱਚ 1,522.33 ਕਰੋੜ ਰੁਪਏ ਦਾ ਏਕੀਕ੍ਰਿਤ ਘਾਟਾ ਹੋਇਆ ਸੀ। ਕੰਪਨੀ ਦੀ ਸੰਚਾਲਨ ਆਮਦਨ ਵਿੱਤੀ ਸਾਲ 2022-23 ‘ਚ ਲਗਭਗ 48 ਫ਼ੀਸਦੀ ਵਧ ਕੇ 2,481.35 ਕਰੋੜ ਰੁਪਏ ਰਹੀ ਜੋ ਇਕ ਸਾਲ ਪਹਿਲਾਂ 1,679.54 ਕਰੋੜ ਰੁਪਏ ਸੀ।