ਦਿਵਿਆਂਗ ਯਾਤਰੀਆਂ ਨੂੰ ਹੋਈ ਪਰੇਸ਼ਾਨੀ ਲਈ AirCanada ਨੇ ਮੰਗੀ ਮੁਆਫ਼ੀ

ਨਵੀਂ ਦਿੱਲੀ – ਏਅਰ ਕੈਨੇਡਾ ਦਾ ਕਹਿਣਾ ਹੈ ਕਿ ਕਈ ਹਾਈ-ਪ੍ਰੋਫਾਈਲ ਘਟਨਾਵਾਂ ਦੇ ਸਾਹਮਣੇ ਆਉਣ ਤੋਂ ਬਾਅਦ ਦਿਵਿਆਂਗ ਯਾਤਰੀਆਂ ਨਾਲ ਹੋਏ ਮਾੜੇ ਵਿਵਹਾਰ ਲਈ ਅਸੀਂ ਮੁਆਫ਼ੀ ਮੰਗ ਰਹੇ ਹਾਂ। ਇਸ ਦੇ ਨਾਲ ਹੀ ਦਿਵਿਆਂਗ ਯਾਤਰੀਆਂ ਲਈ ਕਈ ਸਹੂਲਤਾਂ ਸ਼ੁਰੂ ਕਰਨ ਅਤੇ ਸਹੂਲਤਾਂ ਵਿਚ ਬਦਲਾਅ ਲਿਆਉਣ ਦਾ ਵੀ ਭਰੋਸਾ ਦਿੰਦੇ ਹਾਂ। ਜ਼ਿਕਰਯੋਗ ਹੈ ਕਿ ਏਅਰ ਕੈਨੇਡਾ ਵਿਚ ਵਾਪਰੀ ਸਭ ਤੋਂ ਦੁਖਦਾਈ ਘਟਨਾ ਵਿਚ ਇੱਕ ਦਿਵਿਆਂਗ ਯਾਤਰੀ ਨੂੰ ਆਪਣੇ ਆਪ ਨੂੰ ਜਹਾਜ਼ ਤੋਂ ਖਿੱਚ ਕੇ ਬਾਹਰ ਲਿਆਉਣਾ ਪਿਆ ਸੀ। ਏਅਰ ਕੈਨੇਡਾ ਨੇ ਇਸ ਗੰਭੀਰ ਸਮੱਸਿਆ ਤਹਿਤ ਉਟਾਵਾ ਵਿਚ ਸੰਘੀ ਮੰਤਰੀਆਂ ਨਾਲ ਇਸ ਮੁੱਦੇ ਨੂੰ ਲੈ ਕੇ ਇੱਕ ਮੀਟਿੰਗ ਕੀਤੀ ਹੈ। 

ਏਅਰਲਾਈਨ ਨੇ ਵੀਰਵਾਰ ਨੂੰ ਕਿਹਾ ਕਿ ਉਹ ਬੋਰਡਿੰਗ ਪ੍ਰਕਿਰਿਆ ਨੂੰ ਅੱਪਡੇਟ ਕਰਨ ਅਤੇ ਵ੍ਹੀਲਚੇਅਰਾਂ ਵਰਗੀਆਂ ਗਤੀਸ਼ੀਲਤਾ ਸਹਾਇਤਾ ਨੂੰ ਸਟੋਰ ਕਰਨ ਦੇ ਤਰੀਕੇ ਨੂੰ ਬਦਲਣ ਦੀ ਯੋਜਨਾ ਨੂੰ ਫਾਸਟ-ਟ੍ਰੈਕ ਕਰੇਗੀ ਤਾਂ ਜੋ ਇਹ ਯਕੀਨੀ ਬਣਾਇਆ ਜਾ ਸਕੇ ਕਿ ਅਸਮਰਥ ਯਾਤਰੀ ਸੁਰੱਖਿਅਤ ਢੰਗ ਨਾਲ ਜਹਾਜ਼ ‘ਤੇ ਚੜ੍ਹ ਅਤੇ ਉਤਰ ਸਕਣ। ਇਸ ਦੇ  ਨਾਲ ਹੀ ਆਪਣੇ ਹਜ਼ਾਰਾਂ ਕਰਮਚਾਰੀਆਂ ਨੂੰ ਇਸ ਦੀਆਂ ਸਿਖਲਾਈ ਪ੍ਰਕਿਰਿਆਵਾਂ ਨੂੰ ਵੀ ਅੱਪਡੇਟ ਕਰਨਗੇ। 

ਸੀਈਓ ਮਾਈਕਲ ਰੂਸੋ ਨੇ ਇੱਕ ਬਿਆਨ ਵਿੱਚ ਲਿਖਿਆ  ਕਿ ਏਅਰ ਕੈਨੇਡਾ ਦਿਵਿਆਂਗ ਯਾਤਰੀਆਂ ਨੂੰ ਉਡਾਣ ਭਰਨ ਵੇਲੇ ਆਉਂਦੀਆਂ ਚੁਣੌਤੀਆਂ ਨੂੰ ਪਛਾਣਦਾ ਹੈ ਅਤੇ ਸੁਵਿਧਾਜਨਕ ਅਤੇ ਨਿਰੰਤਰ ਸੇਵਾ ਪ੍ਰਦਾਨ ਕਰਨ ਦੀ ਆਪਣੀ ਜ਼ਿੰਮੇਵਾਰੀ ਨੂੰ ਸਵੀਕਾਰ ਕਰਦਾ ਹੈ। ਕਈ ਵਾਰ ਅਸੀਂ ਇਸ ਵਚਨਬੱਧਤਾ ਨੂੰ ਪੂਰਾ ਨਹੀਂ ਕਰਦੇ, ਜਿਸ ਲਈ ਅਸੀਂ ਦਿਲੋਂ ਮੁਆਫੀ ਮੰਗਦੇ ਹਾਂ। ਸਭ ਤੋਂ ਮਹੱਤਵਪੂਰਨ ਗੱਲ ਇਹ ਹੈ ਕਿ ਜਿਵੇਂ-ਜਿਵੇਂ ਦਿਵਿਆਂਗ ਯਾਤਰੀ ਸਾਨੂੰ ਦੱਸਣਗੇ ਤਾਂ ਅਸੀਂ ਉਨ੍ਹਾਂ ਦੀ ਸਹੂਲਤ ਮੁਤਾਬਕ ਲਗਾਤਾਰ ਸੁਧਾਰ ਕਰਦੇ ਰਹਾਂਗੇ।”

ਇਹ ਤਬਦੀਲੀਆਂ ਚਾਰ ਦਿਵਿਆਂਗ ਯਾਤਰੀਆਂ ਦੇ ਏਅਰ ਕੈਨੇਡਾ ਨਾਲ ਉਡਾਣ ਭਰਨ ਦੇ ਆਪਣੇ “ਅਮਾਨਵੀ” ਤਜ਼ਰਬਿਆਂ ਬਾਰੇ ਜਨਤਕ ਤੌਰ ‘ਤੇ ਇਸ ਸਾਲ ਬੋਲਣ ਤੋਂ ਬਾਅਦ ਆਈਆਂ ਹਨ। ਉਨ੍ਹਾਂ ਦੀਆਂ ਕਹਾਣੀਆਂ ਵਿੱਚ ਆਪਣੇ ਆਪ ਨੂੰ ਹਵਾਈ ਜਹਾਜ਼ ਤੋਂ ਖਿੱਚਣ, ਸਟਾਫ ਦੁਆਰਾ ਸੁੱਟੇ ਜਾਣ, ਉਨ੍ਹਾਂ ਦੀ ਵ੍ਹੀਲਚੇਅਰ ਨੂੰ ਪਿੱਛੇ ਛੱਡਣ ਅਤੇ ਵ੍ਹੀਲਚੇਅਰਾਂ ਦੇ ਵਿਚਕਾਰ ਟ੍ਰਾਂਸਫਰ ਦੌਰਾਨ ਉਨ੍ਹਾਂ ਦਾ ਵੈਂਟੀਲੇਟਰ ਟੁੱਟਣ ਅਤੇ ਡਿਸਕਨੈਕਟ ਹੋਣ ਦੇ ਤਜ਼ਰਬੇ ਸ਼ਾਮਲ ਸਨ – ਇਹ ਉਹ ਦਰਦਨਾਕ ਘਟਨਾਵਾਂ ਜਿਨ੍ਹਾਂ ਨੂੰ ਉਨ੍ਹਾਂ ਦੇ ਵਕੀਲਾਂ ਨੇ ਜਾਣੂ ਕਰਵਾਇਆ ਹੈ। cerebral palsy ਨਾਲ ਪੀੜਤ ਰੌਡਨੀ ਹਾਜਿਨਸ ਨੂੰ ਅਗਸਤ ਵਿੱਚ ਲਾਸ ਵੇਗਾਸ ਵਿੱਚ ਏਅਰ ਕੈਨੇਡਾ ਦੀ ਫਲਾਈਟ ਤੋਂ ਆਪਣੇ ਆਪ ਨੂੰ ਖਿੱਚਣ ਲਈ ਮਜਬੂਰ ਹੋਣਾ ਪਿਆ ਸੀ ਕਿਉਂਕਿ ਉਸ ਨੂੰ ਇਹ ਦੱਸਿਆ ਗਿਆ ਸੀ ਕਿ ਏਅਰ ਲਾਈਨ ਵਲੋਂ ਵ੍ਹੀਲਚੇਅਰ ਸਹਾਇਤਾ ਉਪਲਬਧ ਨਹੀਂ ਸੀ।

ਕਵਾਡ ਸਪੈਸਟਿਕ ਸੇਰੇਬ੍ਰਲ ਪਾਲਸੀ ਨਾਲ ਪੀੜਤ ਬੀ.ਸੀ.-ਅਧਾਰਿਤ ਕਾਮੇਡੀਅਨ ਰਿਆਨ ਲੈਚੈਂਸ ਨੇ ਕਿਹਾ ਕਿ ਮਈ ਵਿੱਚ ਵੈਨਕੂਵਰ ਵਿੱਚ ਇੱਕ ਫਲਾਈਟ ਤੋਂ ਉਤਰਨ ਦੀ ਕੋਸ਼ਿਸ਼ ਕਰਦੇ ਸਮੇਂ ਉਹ ਡਿੱਗ ਗਿਆ ਅਤੇ ਜ਼ਖਮੀ ਹੋ ਗਿਆ। ਪਿਛਲੇ ਮਹੀਨੇ ਕੈਨੇਡਾ ਦੀ ਮੁੱਖ ਪਹੁੰਚਯੋਗਤਾ ਅਧਿਕਾਰੀ ਸਟੈਫਨੀ ਕੈਡੀਅਕਸ  ਨੇ ਕਿਹਾ ਕਿ ਏਅਰਲਾਈਨ ਨੇ ਟੋਰਾਂਟੋ ਵਿੱਚ ਆਪਣੀ ਵ੍ਹੀਲਚੇਅਰ ਛੱਡ ਦਿੱਤੀ ਜਦੋਂ ਉਹ ਵਾਪਸ ਵੈਨਕੂਵਰ ਗਈ ਸੀ। ਟੋਰਾਂਟੋ ਦੀ ਅਲੇਸੀਆ ਡੀ ਵਰਜੀਲੀਓ, ਜੋ ਪਾਵਰ ਵ੍ਹੀਲਚੇਅਰ ਦੀ ਵਰਤੋਂ ਕਰਦੀ ਹੈ, ਉਸਦਾ ਵੈਂਟੀਲੇਟਰ ਬੰਦ ਹੋ ਗਿਆ ਸੀ ਅਤੇ ਉਸਦੇ ਸਿਰ ‘ਤੇ ਲਿਫਟ ਡਿੱਗ ਗਈ ਸੀ।

ਫੈਡਰਲ ਟਰਾਂਸਪੋਰਟ ਮੰਤਰੀ ਪਾਬਲੋ ਰੋਡਰਿਗਜ਼ ਨੇ ਇਸ ਹਫਤੇ ਏਅਰਲਾਈਨ ਦੇ ਪ੍ਰਤੀਨਿਧਾਂ ਨੂੰ ਪਾਰਲੀਮੈਂਟ ਹਿੱਲ ‘ਤੇ ਬੁਲਾਇਆ ਤਾਂ ਜੋ ਦਿਵਿਆਂਗ ਯਾਤਰੀਆਂ ਪ੍ਰਤੀ ਬਣਦੀ ਜ਼ਿੰਮੇਵਾਰੀ ਦਾ ਹੱਲ ਕਰਨ ਲਈ “ਇੱਕ ਯੋਜਨਾ ਪੇਸ਼ ਕੀਤੀ ਜਾ ਸਕੇ”। ਰੂਸੋ ਵੀਰਵਾਰ ਨੂੰ ਹੋਈ ਮੀਟਿੰਗ ਵਿਚ ਏਅਰ ਕੈਨੇਡਾ ਦੇ ਉਪ-ਪ੍ਰਧਾਨ ਸਮੇਤ ਮੌਜੂਦ ਸਨ। ਮੀਟਿੰਗ ਤੋਂ ਬਾਅਦ ਮੀਡੀਆ ਵਿੱਚ ਰੌਡਰਿਗਜ਼ ਨੇ ਕਿਹਾ ਕਿ ਉਸਨੇ ਰੂਸੋ ਨੂੰ ਦੱਸਿਆ ਕਿ ਏਅਰਲਾਈਨ ਦੀ ਮੌਜੂਦਾ ਯੋਜਨਾ “ਕਾਰਜ ਨਹੀਂ ਕਰ ਰਹੀ ਸੀ।”

ਉਸਨੇ ਕਿਹਾ “ਅਸੀਂ ਏਅਰ ਕੈਨੇਡਾ ਨੂੰ ਕਿਹਾ ਕਿ ਜੋ ਹੋਇਆ ਉਹ ਅਸਵੀਕਾਰਨਯੋਗ ਹੈ ਅਤੇ ਉਹ ਸਾਡੇ ਨਾਲ ਸਹਿਮਤ ਹਨ”। ਮੀਟਿੰਗ ਵਿੱਚ ਸ਼ਾਮਲ ਹੋਏ ਵਿਭਿੰਨਤਾ, ਸ਼ਮੂਲੀਅਤ ਅਤੇ ਅਪੰਗਤਾ ਮੰਤਰੀ ਕਮਲ ਖੇੜਾ ਨੇ ਕਿਹਾ, “ਅਸੀਂ ਉਨ੍ਹਾਂ ਦੇ ਸੀਈਓ ਨੂੰ ਇਹ ਸਪੱਸ਼ਟ ਕਰ ਦਿੱਤਾ ਹੈ ਕਿ ਨਾ ਸਿਰਫ ਏਅਰਲਾਈਨਾਂ ਨੂੰ ਜਵਾਬਦੇਹ ਬਣਾਉਣ ਦੀ ਲੋੜ ਹੈ, ਉਹਨਾਂ ਨੂੰ ਬਹੁਤ ਵਧੀਆ ਕਰਨ ਦੀ ਲੋੜ ਹੈ, ਅਤੇ ਉਹਨਾਂ ਨੂੰ ਥੋੜੇ ਸਮੇਂ ਅਤੇ ਲੰਬੇ ਸਮੇਂ ਲਈ ਇੱਕ ਵਿਆਪਕ ਯੋਜਨਾ ਨੂੰ ਅੱਗੇ ਵਧਾਉਣ ਦੀ ਲੋੜ ਹੈ।” ਰੌਡਰਿਗਜ਼ ਅਤੇ ਖੇੜਾ ਨੇ ਕਿਹਾ ਕਿ ਉਹ ਦਸੰਬਰ ਵਿੱਚ ਏਅਰ ਕੈਨੇਡਾ ਨਾਲ ਦੁਬਾਰਾ ਮੁਲਾਕਾਤ ਕਰਨਗੇ।