ਭਾਰਤ ਨੇ ਮੈਡਾਗਾਸਕਰ ਨੂੰ 5,000 ਮੀਟ੍ਰਿਕ ਟਨ ਚੌਲਾਂ ਦੀ ਖੇਪ ਸੌਂਪੀ

ਨਿਊਯਾਰਕ – ਭਾਰਤ ਨੇ ਬੁੱਧਵਾਰ ਨੂੰ ਮੈਡਾਗਾਸਕਰ ਨੂੰ ਮਨੁੱਖੀ ਸਹਾਇਤਾ ਵਜੋਂ 5,000 ਮੀਟ੍ਰਿਕ ਟਨ ਚੌਲ ਸੌਂਪੇ। ਇਹ ਜਾਣਕਾਰੀ ਇੱਕ ਅਧਿਕਾਰਤ ਬਿਆਨ ਵਿੱਚ ਦਿੱਤੀ ਗਈ। ਮੈਡਾਗਾਸਕਰ ਦੇ ਇਵੋਲੋਹਾ ਪੈਲੇਸ ਵਿੱਚ ਇੱਕ ਅਧਿਕਾਰਤ ਸਮਾਰੋਹ ਵਿੱਚ ਭਾਰਤ ਦੇ ਰਾਜਦੂਤ ਅਭੈ ਕੁਮਾਰ ਨੇ ਮੈਡਾਗਾਸਕਰ ਦੇ ਰਾਸ਼ਟਰਪਤੀ ਆਂਦਰੇ ਰਾਜੋਲੀਨਾ ਨੂੰ ਚੌਲਾਂ ਦੀ ਖੇਪ ਸੌਂਪੀ।

ਵਿਦੇਸ਼ ਮੰਤਰੀ ਐੱਸ. ਜੈਸ਼ੰਕਰ ਨੇ ਇੱਕ ਟਵੀਟ ਵਿੱਚ ਕਿਹਾ, ‘ਭਾਰਤ ਹਮੇਸ਼ਾ ਹਿੰਦ ਮਹਾਸਾਗਰ ਦੇ ਗੁਆਂਢੀ ਮੈਡਾਗਾਸਕਰ ਦੇ ਨਾਲ ਖੜ੍ਹਾ ਹੈ। ਅਸੀਂ ਸੁਰੱਖਿਅਤ ਅਤੇ ਖੁਸ਼ਹਾਲ ਇੰਡੋ-ਪੈਸੀਫਿਕ ਲਈ ਆਪਣੇ ‘ਸਾਗਰ ਵਿਜ਼ਨ’ ਤਹਿਤ ਕੰਮ ਕਰਨਾ ਜਾਰੀ ਰੱਖਾਂਗੇ। ਪਹਿਲਾਂ ਗੁਆਂਢੀ।’ ਮੈਡਾਗਾਸਕਰ ਵਿੱਚ ਭਾਰਤੀ ਰਾਜਦੂਤ ਨੇ ਕਿਹਾ ਕਿ ਹਿੰਦ ਮਹਾਸਾਗਰ ਦੇ ਦੋ ਗੁਆਂਢੀਆਂ ਨੇ ਪ੍ਰਾਚੀਨ ਸੱਭਿਆਚਾਰਕ ਸਬੰਧ ਸਾਂਝੇ ਕੀਤੇ ਹਨ ਜੋ ਮਾਲਾਗਾਸੀ ਭਾਸ਼ਾ ਵਿੱਚ 300 ਤੋਂ ਵੱਧ ਸੰਸਕ੍ਰਿਤ ਸ਼ਬਦਾਂ ਦੀ ਮੌਜੂਦਗੀ ਵਿੱਚ ਸਪੱਸ਼ਟ ਹਨ।