ਫਿਲੀਪੀਨਜ਼ ‘ਚ ਤੂਫ਼ਾਨ ‘ਨੋਰੂ’ ਨੇ ਲਈ 8 ਲੋਕਾਂ ਦੀ ਜਾਨ, 3 ਹੋਰ ਲਾਪਤਾ

ਮਨੀਲਾ – ਫਿਲੀਪੀਨਜ਼ ਦੇ ਲੂਜੋਨ ਟਾਪੂ ‘ਤੇ ਹਫ਼ਤੇ ਦੇ ਅੰਤ ‘ਚ ਤੇਜ਼ ਹਵਾਵਾਂ ਅਤੇ ਮੀਂਹ ਨਾਲ ਆਏ ਤੇਜ਼ ਤੂਫ਼ਾਨ ‘ਨੋਰੂ’ ਕਾਰਨ ਅੱਠ ਲੋਕਾਂ ਦੀ ਮੌਤ ਹੋ ਗਈ ਅਤੇ 3 ਹੋਰ ਲਾਪਤਾ ਹੋ ਗਏ। ਇਕ ਸਰਕਾਰੀ ਏਜੰਸੀ ਨੇ ਮੰਗਲਵਾਰ ਨੂੰ ਇਹ ਜਾਣਕਾਰੀ ਦਿੱਤੀ। ਨੈਸ਼ਨਲ ਡਿਜ਼ਾਸਟਰਜ਼, ਰਿਸਕ ਅਤੇ ਮੈਨੇਜਮੈਂਟ ਕੌਂਸਲ ਨੇ ਐਤਵਾਰ ਦੁਪਹਿਰ ਨੂੰ ਤੂਫ਼ਾਨ ਦੇ ਆਉਣ ਦੇ ਕੁਝ ਘੰਟਿਆਂ ਬਾਅਦ ਮਨੀਲਾ ਦੇ ਉੱਤਰ ਵਿੱਚ ਬੁਲਾਕਾਨ ਸੂਬੇ ਵਿੱਚ ਅਚਾਨਕ ਆਏ ਹੜ੍ਹ ਵਿੱਚ ਪੰਜ ਬਚਾਅ ਕਰਮਚਾਰੀਆਂ ਦੀ ਮੌਤ ਦੀ ਪੁਸ਼ਟੀ ਕੀਤੀ।

ਏਜੰਸੀ ਨੇ ਕਿਹਾ ਕਿ ਉਸ ਨੂੰ ਤੂਫ਼ਾਨ ਨਾਲ ਸਬੰਧਤ ਤਿੰਨ ਹੋਰ ਮੌਤਾਂ, ਕਿਊਜ਼ਨ ਸੂਬੇ ਵਿੱਚ 1 ਅਤੇ ਜ਼ੈਂਬਲਜ਼ ਸੂਬੇ ਵਿੱਚ 2 ਲੋਕਾਂ ਦੀ ਮੌਤ ਦੀ ਸੂਚਨਾ ਮਿਲੀ ਹੈ। ਹਾਲਾਂਕਿ ਏਜੰਸੀ ਨੇ ਇਸ ਸਬੰਧ ‘ਚ ਜ਼ਿਆਦਾ ਜਾਣਕਾਰੀ ਨਹੀਂ ਦਿੱਤੀ ਹੈ। ਏਜੰਸੀ ਨੇ ਕਿਹਾ ਕਿ ਮਨੀਲਾ ਦੇ ਦੱਖਣ-ਪੂਰਬ ‘ਚ ਬੀਕੋਲ ਇਲਾਕੇ ‘ਚ ਤਿੰਨ ਹੋਰ ਲੋਕ ਲਾਪਤਾ ਹਨ। ਨੋਰੂ ਸੋਮਵਾਰ ਰਾਤ ਨੂੰ ਮੱਧ ਲੁਜ਼ੋਨ ਖੇਤਰ ਨੂੰ ਪਾਰ ਕੀਤਾ ਅਤੇ ਫਿਲੀਪੀਨਜ਼ ਤੋਂ ਬਾਹਰ ਨਿਕਲ ਗਿਆ।

ਨੋਰੂ ਇਸ ਸਾਲ ਫਿਲੀਪੀਨਜ਼ ਨਾਲ ਟਕਰਾਉਣ ਵਾਲਾ 11ਵਾਂ ਅਤੇ ਸਭ ਤੋਂ ਸ਼ਕਤੀਸ਼ਾਲੀ ਚੱਕਰਵਾਤ ਹੈ। ਇਸ ਨੇ ਫ਼ਸਲਾਂ ਨੂੰ ਤਬਾਹ ਕਰ ਦਿੱਤਾ, ਘਰਾਂ ਨੂੰ ਨੁਕਸਾਨ ਪਹੁੰਚਾਇਆ, ਬਿਜਲੀ ਦੀਆਂ ਟਰਾਂਸਮਿਸ਼ਨ ਲਾਈਨਾਂ ਨੂੰ ਸੁੱਟ ਦਿੱਤਾ ਅਤੇ ਕੇਂਦਰੀ ਲੁਜੋਨ ਟਾਪੂ ਦੇ ਕਈ ਖੇਤਰਾਂ ਵਿੱਚ ਹੜ੍ਹ ਆ ਗਿਆ।