ਕਲਯੁੱਗੀ ਪੁੱਤ ਨੇ ਸ਼ਰਾਬ ਖ਼ਾਤਰ ਮਾਂ ਦੀ ਕੀਤੀ ਕੁੱਟਮਾਰ
![](http://mehakewattan.com/wp-content/uploads/2024/04/2024_4image_00_35_197931491fight-ll.jpg)
ਲੁਧਿਆਣਾ – ਸ਼ਰਾਬ ਖ਼ਾਤਰ ਇਕ ਕਲਯੁੱਗੀ ਪੁੱਤ ਨੇ ਮਾਂ ਨਾਲ ਕੁੱਟਮਾਰ ਕੀਤੀ। ਮਾਂ ਨਾਲ ਹੱਥੋਪਾਈ ਕਰਦੇ ਦੇਖ ਕੇ ਲੋਕਾਂ ਨੇ ਮਾਂ ਨੂੰ ਛੁਡਾਇਆ ਤੇ ਪੁੱਤ ਦੀ ਛਿੱਤਰ-ਪਰੇਡ ਕੀਤੀ, ਜਿਸ ਤੋਂ ਬਾਅਦ ਮਾਂ ਨੇ ਚੱਪਲ ਨਾਲ ਪੁੱਤ ਨੂੰ ਕੁੱਟਿਆ। ਘਟਨਾ ਥਾਣਾ ਡਿਵੀਜ਼ਨ ਨੰ. 5 ਅਧੀਨ ਆਉਂਦੀ ਚੌਕੀ ਕੋਚਰ ਮਾਰਕੀਟ ਸਥਿਤ ਜਵਾਹਰ ਨਗਰ ਕੈਂਪ ਇਲਾਕੇ ਦੀ ਹੈ। ਜਾਣਕਾਰੀ ਮੁਤਾਬਕ ਜਵਾਹਰ ਨਗਰ ਕੈਂਪ ’ਚ ਊਸ਼ਾ ਨਾਮੀ ਔਰਤ ਫਰੂਟ ਦੀ ਰੇਹੜੀ ਲਗਾ ਕੇ ਘਰ ਦਾ ਗੁਜ਼ਾਰਾ ਕਰਦੀ ਹੈ, ਜਦਕਿ ਸ਼ਰਾਬੀ ਪੁੱਤ ਆਮ ਤੌਰ ’ਤੇ ਨਸ਼ੇ ਦੀ ਖ਼ਾਤਰ ਮਾਂ ਨਾਲ ਕੁੱਟਮਾਰ ਕਰਦਾ ਹੈ।
ਬੁੱਧਵਾਰ ਨੂੰ ਵੀ ਪੁੱਤ ਨੂੰ ਅਚਾਨਕ ਸ਼ਰਾਬ ਦੀ ਤਲਬ ਉੱਠੀ ਤਾਂ ਉਸ ਨੇ ਮਾਂ ਦੀ ਰੇਹੜੀ ’ਤੇ ਜਾ ਕੇ ਗੱਲੇ ’ਚੋਂ ਨਕਦੀ ਚੋਰੀ ਕਰਨ ਦੀ ਕੋਸ਼ਿਸ਼ ਕੀਤੀ। ਮਾਂ ਨੇ ਉਸ ਨੂੰ ਰੋਕਿਆ ਤਾਂ ਉਸ ਨੇ ਮਾਂ ਨਾਲ ਕੁੱਟਮਾਰ ਕੀਤੀ। ਉਸ ਦੀ ਇਹ ਹਰਕਤ ਆਲੇ-ਦੁਆਲੇ ਦੇ ਲੋਕਾਂ ਤੋਂ ਬਰਦਾਸ਼ਤ ਨਹੀਂ ਹੋਈ ਤੇ ਉਨ੍ਹਾਂ ਨੇ ਮਾਂ ਦਾ ਬਚਾਅ ਕੀਤਾ ਤੇ ਪੁੱਤ ਦੀ ਛਿੱਤਰ-ਪਰੇਡ ਕਰ ਦਿੱਤੀ। ਮਾਂ ਊਸ਼ਾ ਨੇ ਦੱਸਿਆ ਕਿ ਉਸ ਦਾ ਇਕਲੌਤਾ ਪੁੱਤ ਸ਼ਰਾਬ ਪੀਣ ਦਾ ਆਦੀ ਹੈ। ਰੋਜ਼ਾਨਾ ਉਹ ਸ਼ਰਾਬ ਖ਼ਾਤਰ ਉਸ ਨਾਲ ਕੁੱਟਮਾਰ ਤੇ ਗਾਲੀ-ਗਲੋਚ ਕਰਦਾ ਹੈ। ਕਾਫ਼ੀ ਦੇਰ ਤੱਕ ਹੋਏ ਹੰਗਾਮੇ ਦੇ ਬਾਵਜੂਦ ਪੁਲਸ ਨਹੀਂ ਦਿਖਾਈ ਦਿੱਤੀ।