ਇਕ ਭਾਰਤੀ ਸਮੇਤ ਤਿੰਨ ਹੋਰ ‘2022 ਗੋਲਕੀਪਰਜ਼ ਗਲੋਬਲ ਗੋਲਸ’ ਪੁਰਸਕਾਰ ਨਾਲ ਸਨਮਾਨਿਤ

ਨਿਊਯਾਰਕ – ਭਾਰਤ ਦੀ ਰਾਧਿਕਾ ਬੱਤਰਾ, ਅਫਗਾਨਿਸਤਾਨ ਦੀ ਜ਼ਾਰਾ ਜੋਆ, ਯੁਗਾਂਡਾ ਦੀ ਵੈਨੇਸਾ ਨਕਾਤੇ ਅਤੇ ਯੂਰਪੀਅਨ ਯੂਨੀਅਨ ਦੀ ਮੁਖੀ ਉਰਸੁਲਾ ਵਾਨ ਡੇਰ ਲੇਅਨ ਨੂੰ ਸੰਯੁਕਤ ਰਾਸ਼ਟਰ ਦੇ ਟਿਕਾਊ ਵਿਕਾਸ ਟੀਚਿਆਂ (ਐੱਸ.ਡੀ.ਜੀ.) ਦੀ ਪ੍ਰਾਪਤੀ ਲਈ ਉਨ੍ਹਾਂ ਦੇ ਬੇਮਿਸਾਲ ਕੰਮ ਲਈ ਬਿਲ ਐਂਡ ਮੇਲਿੰਡਾ ਗੇਟਸ ਫਾਊਂਡੇਸ਼ਨ ਵੱਲੋਂ ਸਨਮਾਨਿਤ ਕੀਤਾ ਗਿਆ। ਫਾਊਂਡੇਸ਼ਨ ਨੇ ਕਿਹਾ ਕਿ ਨਿਊਯਾਰਕ ਦੇ ਲਿੰਕਨ ਸੈਂਟਰ ‘ਚ ਮੰਗਲਵਾਰ ਨੂੰ ਇਕ ਸ਼ਾਨਦਾਰ ਸਮਾਰੋਹ ‘ਚ ਇਨ੍ਹਾਂ ਲੋਕਾਂ ਨੂੰ ‘ਗੋਲਕੀਪਰਜ਼ ਗਲੋਬਲ ਗੋਲਸ ਐਵਾਰਡਸ’ ਪ੍ਰਦਾਨ ਕੀਤੇ ਗਏ। ਸਮਾਜ ਵਿਚ ਬਦਲਾਅ ਲਿਆਉਣ ਵਾਲੇ ਇਹਨਾਂ ਚਾਰ ਲੋਕਾਂ” ਨੂੰ ਉਹਨਾਂ ਦੇ ਭਾਈਚਾਰੇ ਅਤੇ ਦੁਨੀਆ ਭਰ ਵਿੱਚ ਸਸਟੇਨੇਬਲ ਡਿਵੈਲਪਮੈਂਟ ਟੀਚਿਆਂ ਪ੍ਰਤੀ ਉਹਨਾਂ ਦੇ ਸ਼ਾਨਦਾਰ ਕੰਮ ਲਈ ਸਨਮਾਨਿਤ ਕੀਤਾ ਗਿਆ। 

ਗੈਰ-ਲਾਭਕਾਰੀ ਸੰਸਥਾ ‘ਏਵਰੀ ਇਨਫੈਂਟ ਮੈਟਰਸ’ ਦੀ ਸਹਿ-ਸੰਸਥਾਪਕ ਬੱਤਰਾ ਨੂੰ ਭਾਰਤ ਵਿੱਚ ਪਛੜੇ ਬੱਚਿਆਂ ਨੂੰ ਬਿਹਤਰ ਸਿਹਤ ਹੱਲ ਪ੍ਰਦਾਨ ਕਰਨ ਵਿੱਚ ਉਸਦੇ ਕੰਮ ਲਈ ਸਨਮਾਨਿਤ ਕੀਤਾ ਗਿਆ। ਅਫਗਾਨਿਸਤਾਨ ਵਿੱਚ ਆਨਲਾਈਨ ਨਿਊਜ਼ ਏਜੰਸੀ ‘ਰੁਖਸਾਨਾ ਮੀਡੀਆ’ ਦੀ ਸੰਸਥਾਪਕ ਪੱਤਰਕਾਰ ਜ਼ਾਰਾ ਜ਼ੋਇਆ ਨੂੰ ਅਫਗਾਨਿਸਤਾਨ ਨਾਲ ਜੁੜੇ ਲੋਕਾਂ ਦੀਆਂ ਕਹਾਣੀਆਂ ਦੱਸਣ ਵਿੱਚ ਉਸ ਦੀ ਵਚਨਬੱਧਤਾ ਅਤੇ ਸਮਰਪਣ ਲਈ ਸਨਮਾਨਿਤ ਕੀਤਾ ਗਿਆ। ਅਵਾਰਡ-ਵਿਜੇਤਾ ਵੈਨੇਸਾ ਨਕਾਟੇ ਇੱਕ ਯੂਗਾਂਡਾ ਜਲਵਾਯੂ ਕਾਰਕੁਨ ਹੈ ਅਤੇ ਅਫਰੀਕਾ-ਅਧਾਰਤ ਰਾਈਜ਼ ਅੱਪ ਮੂਵਮੈਂਟ ਅਤੇ ਗ੍ਰੀਨ ਸਕੂਲ ਪ੍ਰੋਜੈਕਟ ਦੀ ਸੰਸਥਾਪਕ ਹੈ। ਇਸ ਦੇ ਨਾਲ ਹੀ ਯੂਰਪੀਅਨ ਕਮਿਸ਼ਨ ਦੇ ਪ੍ਰਧਾਨ ਉਰਸੁਲਾ ਵਾਨ ਡੇਰ ਲੇਅਨ ਨੂੰ ਆਪਣੇ ਦੇਸ਼ ਵਿੱਚ ਸਮਾਜਿਕ ਕ੍ਰਾਂਤੀ ਲਿਆਉਣ ਲਈ ਇਨਾਮ ਦਿੱਤਾ ਗਿਆ। 

ਪੁਰਸਕਾਰ ਦੇ ਜੇਤੂਆਂ ਦੀ ਘੋਸ਼ਣਾ ‘ਗੋਲਕੀਪਰਜ਼ ਅਵਾਰਡ ਸਮਾਰੋਹ’ ਵਿੱਚ ਕੀਤੀ ਗਈ ਸੀ ਜਿਸ ਵਿੱਚ ਗਲੋਬਲ ਨੇਤਾਵਾਂ, ਪ੍ਰਭਾਵਸ਼ਾਲੀ ਸ਼ਖਸੀਅਤਾਂ, ਸਮਾਜ ਵਿਚ ਬਦਲਾਅ ਲਿਆਉਣ ਵਾਲੇ ਵਿਅਕਤੀਆਂ ਨੇ ਹਿੱਸਾ ਲਿਆ ਸੀ। ਪੁਰਸਕਾਰ ਦੇਣ ਵਾਲਿਆਂ ਵਿੱਚ ਮਲਾਲਾ ਫੰਡ ਦੀ ਸਹਿ-ਸੰਸਥਾਪਕ ਅਤੇ ਨੋਬਲ ਪੁਰਸਕਾਰ ਜੇਤੂ ਮਲਾਲਾ ਯੂਸਫ਼ਜ਼ਈ ਅਤੇ ਮਨੋਰੰਜਨ ਉਦਯੋਗ ਅਤੇ ਯੂਨੀਕੋਰਨ ਆਈਲੈਂਡ ਦੀ ਸੰਸਥਾਪਕ ਲਿਲੀ ਸਿੰਘ ਵੀ ਸ਼ਾਮਲ ਸਨ। ਬਿਲ ਗੇਟਸ ਅਤੇ ਮੇਲਿੰਡਾ ਫ੍ਰੈਂਚ ਗੇਟਸ ਦੁਆਰਾ ਪੇਸ਼ ਕੀਤਾ ਗਿਆ 2022 ਗਲੋਬਲ ਗੋਲਕੀਪਰ ਅਵਾਰਡ, ਇੱਕ ਅਜਿਹੇ ਨੇਤਾ ਨੂੰ ਮਾਨਤਾ ਦਿੰਦਾ ਹੈ ਜਿਸਨੇ ਟਿਕਾਊ ਵਿਕਾਸ ਟੀਚਿਆਂ ਨੂੰ ਪ੍ਰਾਪਤ ਕਰਨ ਲਈ ਵਿਸ਼ਵਵਿਆਪੀ ਤਰੱਕੀ ਕੀਤੀ ਹੈ। 

ਫਾਊਂਡੇਸ਼ਨ ਨੇ ਕਿਹਾ ਕਿ ਬੱਤਰਾ ਨੇ ਨਵੀਂ ਦਿੱਲੀ ਦੀ ਇੱਕ ਝੁੱਗੀ ਝੌਂਪੜੀ ਵਾਲੀ ਬਸਤੀ ਵਿਚ ਸਥਿਤ ਹਸਪਤਾਲ ਵਿੱਚ ਰੈਜ਼ੀਡੈਂਟ ਡਾਕਟਰ ਵਜੋਂ ਕੰਮ ਕਰਦੇ ਹੋਏ ‘ਏਵਰੀ ਚਾਈਲਡ ਮੈਟਰਸ’ ਦੀ ਸਥਾਪਨਾ ਕੀਤੀ ਸੀ। 2017 ਵਿੱਚ ਇਸ ਸੰਸਥਾ ਦੀ ਸ਼ੁਰੂਆਤ ਤੋਂ ਲੈ ਕੇ ਹੁਣ ਤੱਕ 40,000 ਤੋਂ ਵੱਧ ਕਮਜ਼ੋਰ ਔਰਤਾਂ ਨੂੰ ਜਨਮ ਤੋਂ ਪਹਿਲਾਂ ਵਿਟਾਮਿਨ ਦਿੱਤੇ ਗਏ ਅਤੇ 65,000 ਤੋਂ ਵੱਧ ਪਰਿਵਾਰਾਂ ਨੂੰ ਲਿੰਗ ਅਸਮਾਨਤਾ ਨੂੰ ਹੱਲ ਕਰਨ ਅਤੇ ਟੀਬੀ, HIV/ਏਡਜ਼, ਅਤੇ ਸਮਾਜਿਕ ਵਰਜਿਤਾਂ ਨੂੰ ਤੋੜਨ ਬਾਰੇ ਸਿੱਖਿਅਤ ਕੀਤਾ ਗਿਆ।