ਭਾਰਤ ਨੇ ਆਖਰੀ ਮਿੰਟ ’ਚ ਗੋਲ ਕਰ ਕੇ ਆਇਰਲੈਂਡ ਨੂੰ 1-0 ਨਾਲ ਹਰਾਇਆ

ਭੁਵਨੇਸ਼ਵਰ– ਭਾਰਤੀ ਟੀਮ ਨੇ ਸ਼ੁੱਕਰਵਾਰ ਨੂੰ ਇੱਥੇ ਐੱਫ. ਆਈ. ਐੱਚ. ਪ੍ਰੋ ਲੀਗ ਮੈਚ ਦੇ ਆਖਰੀ ਮਿੰਟ ਵਿਚ ਗੁਰਜੰਟ ਸਿੰਘ ਦੇ ਗੋਲ ਦੀ ਮਦਦ ਨਾਲ ਹੇਠਲੀ ਰੈਂਕਿੰਗ ’ਤੇ ਕਾਬਜ਼ ਆਇਰਲੈਂਡ ਨੂੰ 1-0 ਨਾਲ ਹਰਾ ਦਿੱਤਾ। ਮੈਚ ਵਿਚ ਜ਼ਿਆਦਾਤਰ ਸਮੇਂ ਆਇਰਲੈਂਡ ਨੇ ਆਪਣੇ ਮਜ਼ਬੂਤ ਡਿਫੈਂਸ ਨਾਲ ਭਾਰਤੀਆਂ ਨੂੰ ਨਿਰਾਸ਼ ਕੀਤਾ ਪਰ ਗੁਰਜੰਟ ਨੇ ਘਰੇਲੂ ਟੀਮ ਨੂੰ ਸ਼ਰਮਸਾਰ ਹੋਣ ਤੋਂ ਬਚਾਅ ਲਿਆ। 

ਗੁਰਜੰਟ ਨੇ 60ਵੇਂ ਮਿੰਟ ਵਿਚ ਸਟ੍ਰਾਈਕ ਸਰਕਲ ਦੇ ਉੱਪਰ ਤੋਂ ਤਾਕਤਵਾਰ ਸ਼ਾਟ ਲਾ ਕੇ ਆਇਰਲੈਂਡ ਦੇ ਗੋਲਕੀਪਰ ਨੂੰ ਝਕਾਨੀ ਦਿੰਦੇ ਹੋਏ ਗੋਲ ਕਰ ਦਿੱਤਾ। ਚੌਥੀ ਰੈਂਕਿੰਗ ’ਤੇ ਕਾਬਜ਼ ਭਾਰਤ ਨੂੰ 6 ਪੈਨਲਟੀ ਕਾਰਨਰ ਮਿਲੇ ਪਰ ਉਹ ਕਿਸੇ ਨੂੰ ਵੀ ਗੋਲ ਵਿਚ ਨਹੀਂ ਬਦਲ ਸਕੀ। ਰੈਂਕਿੰਗ ਵਿਚ 11ਵੇਂ ਸਥਾਨ ’ਤੇ ਕਾਬਜ਼ ਆਇਰਲੈਂਡ ਨੂੰ ਤਿੰਨ ਪੈਨਲਟੀ ਕਾਰਨਰ ਮਿਲੇ। ਭਾਰਤੀਆਂ ਦੀ ਸ਼ੁਰੂਆਤ ਖਰਾਬ ਰਹੀ ਤੇ ਖਿਡਾਰੀਆਂ ਵਿਚ ਉਸ ਤਰ੍ਹਾਂ ਦੀ ਊਰਜਾ ਦੀ ਕਮੀ ਦਿਸੀ, ਜਿਹੜੀ ਉਸ ਨੇ ਵੀਰਵਾਰ ਨੂੰ ਆਸਟ੍ਰੇਲੀਆ ਵਿਰੁੱਧ 10 ਗੋਲਾਂ ਦੇ ਰੋਮਾਂਚਕ ਮੈਚ ਵਿਚ ਦਿਖਾਈ ਸੀ। ਭਾਰਤ ਹੁਣ ਅਗਲੇ ਮੈਚ ਵਿਚ 19 ਫਰਵਰੀ ਨੂੰ ਰਾਓਰਕੇਲਾ ਵਿਚ ਸਪੇਨ ਨਾਲ ਖੇਡੇਗਾ।