ਜਾਪਾਨ ‘ਚ ਵਾਪਰਿਆ ਹਾਦਸਾ, ਡੈਮ ਨਾਲ ਟਕਰਾਇਆ ਕਰੂਜ਼ ਜਹਾਜ਼

ਟੋਕੀਓ – ਜਾਪਾਨ ਵਿਚ ਯੋਕੋਹਾਮਾ ਬੰਦਰਗਾਹ ‘ਤੇ ਇਕ ਕਰੂਜ਼ ਜਹਾਜ਼ ਦੇ ਡੈਮ ਨਾਲ ਟਕਰਾ ਜਾਣ ਦੀ ਸੂਚਨਾ ਮਿਲੀ ਹੈ। ਇਸ ਹਾਦਸੇ ਵਿਚ ਕਰੀਬ 10 ਲੋਕ ਜ਼ਖ਼ਮੀ ਹੋ ਗਏ। ਇਸ ਘਟਨਾ ਦੀ ਜਾਣਕਾਰੀ ਸਥਾਨਕ ਮੀਡੀਆ ਵਲੋਂ ਦਿੱਤੀ ਗਈ ਹੈ। ਜਾਪਾਨ ਕੋਸਟ ਗਾਰਡ ਨੂੰ ਵੀਰਵਾਰ ਨੂੰ ਸਥਾਨਕ ਸਮੇਂ ਅਨੁਸਾਰ ਰਾਤ ਕਰੀਬ 20.20 ਵਜੇ ਘਟਨਾ ਦੀ ਸੂਚਨਾ ਮਿਲੀ ਸੀ। 

ਇਸ ਸਬੰਧ ਵਿਚ ਉਨ੍ਹਾਂ ਨੇ ਕਿਹਾ ਕਿ ਕਰੂਜ਼ ਜਹਾਜ਼ ਯੋਕੋਹਾਮਾ ਬੰਦਰਗਾਹ ਤੋਂ ਕਾਵਾਸਾਕੀ ਸ਼ਹਿਰ ਲਈ ਵਾਪਸ ਜਾਂਦੇ ਸਮੇਂ ਡੈਮ ਨਾਲ ਟਕਰਾ ਗਿਆ। ਯੋਕੋਹਾਮਾ ਸਿਟੀ ਫਾਇਰ ਬਿਉਰੋ ਦੇ ਅਨੁਸਾਰ, ਇਸ ਹਾਦਸੇ ਦੌਰਾਨ ਜਹਾਜ਼ ਵਿੱਚ ਸਵਾਰ 10 ਜ਼ਖ਼ਮੀ ਲੋਕਾਂ ਨੂੰ ਹਸਪਤਾਲ ਲਿਜਾਇਆ ਗਿਆ। ਇਨ੍ਹਾਂ ‘ਚੋਂ 8 ਲੋਕ ਗੰਭੀਰ ਰੂਪ ‘ਚ ਜ਼ਖ਼ਮੀ ਹੋਏ ਹਨ। ਦੱਸ ਦੇਈਏ ਕਿ ਇਹ ਯਾਤਰੀ ਜਹਾਜ਼ 14.98 ਮੀਟਰ ਲੰਬਾ ਸੈਂਟਾ ਕਰੂਜ਼ ਸੀ। ਯੋਕੋਹਾਮਾ ਕੋਸਟ ਗਾਰਡ ਦਫ਼ਤਰ ਦੇ ਅਨੁਸਾਰ, ਜਹਾਜ਼ ਵਿੱਚ ਕੁੱਲ 13 ਯਾਤਰੀ ਅਤੇ ਚਾਲਕ ਦਲ ਦੇ ਮੈਂਬਰ ਸਵਾਰ ਸਨ।