ਆਸਟ੍ਰੇਲੀਆ ਅਤੇ ਨਿਊਜ਼ੀਲੈਂਡ ਦੇ ਨੇਤਾ ਕਰੀਬੀ ਰੱਖਿਆ ਸਬੰਧਾਂ ‘ਤੇ ਹੋਏ ਸਹਿਮਤ

ਕੈਨਬਰਾ – ਆਸਟ੍ਰੇਲੀਆ ਅਤੇ ਨਿਊਜ਼ੀਲੈਂਡ ਦੇ ਨੇਤਾ ਬੁੱਧਵਾਰ ਨੂੰ ਨਜ਼ਦੀਕੀ ਰੱਖਿਆ ਸਬੰਧਾਂ ਨੂੰ ਮਜ਼ਬੂਤ ਕਰਨ ਲਈ ਸਹਿਮਤ ਹੋਏ ਕਿਉਂਕਿ ਨਿਊਜ਼ੀਲੈਂਡ ਤਥਾਕਥਿਤ AUKUS ਭਾਈਵਾਲੀ ਰਾਹੀਂ ਸੰਯੁਕਤ ਰਾਜ ਤੇ ਬ੍ਰਿਟੇਨ ਨਾਲ ਉੱਨਤ ਫੌਜੀ ਤਕਨਾਲੋਜੀਆਂ ਨੂੰ ਸਾਂਝਾ ਕਰਨ ‘ਤੇ ਵਿਚਾਰ ਕਰ ਰਿਹਾ ਹੈ। ਨਿਊਜ਼ੀਲੈਂਡ ਦੇ ਪ੍ਰਧਾਨ ਮੰਤਰੀ ਕ੍ਰਿਸਟੋਫਰ ਲਕਸਨ ਨੇ ਅਕਤੂਬਰ ਵਿੱਚ ਆਪਣੀ ਚੋਣ ਮਗਰੋਂ ਗੱਠਜੋੜ ਸਰਕਾਰ ਬਣਾਉਣ ਤੋਂ ਬਾਅਦ ਆਸਟ੍ਰੇਲੀਆ ਨੂੰ ਆਪਣੀ ਪਹਿਲੀ ਵਿਦੇਸ਼ੀ ਫੇਰੀ ਦੀ ਮੰਜ਼ਿਲ ਬਣਾਇਆ।

ਲਕਸਨ ਨੇ ਕਿਹਾ ਕਿ ਉਹ ਅਤੇ ਉਸਦੇ ਆਸਟ੍ਰੇਲੀਆਈ ਹਮਰੁਤਬਾ ਐਂਥਨੀ ਅਲਬਾਨੀਜ਼ ਸਿਡਨੀ ਵਿੱਚ ਆਪਣੀ ਮੀਟਿੰਗ ਵਿੱਚ ਸਹਿਮਤ ਹੋਏ ਕਿ ਦੋਵਾਂ ਦੇਸ਼ਾਂ ਦੇ ਰੱਖਿਆ ਅਤੇ ਵਿਦੇਸ਼ ਮੰਤਰੀ 2024 ਦੇ ਸ਼ੁਰੂ ਵਿੱਚ ਮਿਲਣਗੇ। ਲਕਸਨ ਨੇ ਕਿਹਾ,“ਅਸੀਂ ਜਾਣਦੇ ਹਾਂ ਕਿ ਅਸੀਂ ਇੱਕ ਵਧੇਰੇ ਚੁਣੌਤੀਪੂਰਨ ਅਤੇ ਗੁੰਝਲਦਾਰ ਸੰਸਾਰ ਵਿਚ ਰਹਿ ਰਹੇ ਹਾਂ। ਲਕਸਨ ਨੇ ਪੱਤਰਕਾਰਾਂ ਨੂੰ ਕਿਹਾ,“ਸਾਡੇ ਇਕਲੌਤੇ ਸਹਿਯੋਗੀ ਆਸਟ੍ਰੇਲੀਆ ਨਾਲ ਨਜ਼ਦੀਕੀ ਸੁਰੱਖਿਆ ਅਤੇ ਰੱਖਿਆ ਸਬੰਧ ਹਨ, ਜੋ ਕਿ ਬਹੁਤ ਬੁਨਿਆਦੀ ਹਨ। ਲਕਸਨ ਨੇ ਅੱਗੇ ਕਿਹਾ,”ਨਿਊਜ਼ੀਲੈਂਡ ਗਠਜੋੜ ਵਿੱਚ ਆਪਣਾ ਯੋਗਦਾਨ ਦੇਣ ਲਈ ਵਚਨਬੱਧ ਹੈ ਅਤੇ ਮੈਂ ਦ੍ਰਿੜ ਹਾਂ ਕਿ ਨਿਊਜ਼ੀਲੈਂਡ ਆਸਟ੍ਰੇਲੀਆ ਦੇ ਨਾਲ ਬਣਿਆ ਰਹੇਗਾ ਕਿਉਂਕਿ ਅਸੀਂ ਆਪਣੇ ਸਾਂਝੇ ਹਿੱਤਾਂ ਅਤੇ ਸਾਡੇ ਸਾਂਝੇ ਮੁੱਲਾਂ ਨੂੰ ਅੱਗੇ ਵਧਾਉਣਾ ਚਾਹੁੰਦੇ ਹਾਂ”।

ਲਕਸਨ ਨੇ ਕਿਹਾ ਕਿ ਨਿਊਜ਼ੀਲੈਂਡ AUKUS ਪਿਲਰ 2 ਵਿੱਚ ਸ਼ਾਮਲ ਹੋਣ ਵਿੱਚ ਦਿਲਚਸਪੀ ਰੱਖਦਾ ਹੈ: ਜਿਸ ਵਿਚ ਨਕਲੀ ਬੁੱਧੀ, ਇਲੈਕਟ੍ਰਾਨਿਕ ਯੁੱਧ ਅਤੇ ਹਾਈਪਰਸੋਨਿਕਸ ਸਮੇਤ ਉੱਨਤ ਫੌਜੀ ਸਮਰੱਥਾਵਾਂ ਨੂੰ ਵਿਕਸਤ ਕਰਨ ਤੇ ਸਾਂਝਾ ਕਰਨ ਲਈ ਤਿੰਨ ਭਾਈਵਾਲਾਂ ਵਿਚਕਾਰ ਇੱਕ ਵਚਨਬੱਧਤਾ ਸ਼ਾਮਲ ਹੈ। ਉੱਧਰ ਅਲਬਾਨੀਜ਼ ਨੇ ਕਿਹਾ, “ਜਿੰਨਾ ਜ਼ਿਆਦਾ ਅਸੀਂ ਸਹਿਯੋਗ ਕਰਾਂਗੇ, ਸਾਡੇ ਦੋਵਾਂ ਦੇਸ਼ਾਂ ਲਈ ਉੱਨਾ ਹੀ ਬਿਹਤਰ ਲਾਭ ਹੋਵੇਗਾ।”