GST ਰਿਟਰਨ ਭਰਨ ਵਾਲਿਆਂ ਦੀ ਗਿਣਤੀ ‘ਚ ਜ਼ਬਰਦਸਤ ਵਾਧਾ

ਨਵੀਂ ਦਿੱਲੀ – ਕਰਦਾਤਿਆਂ ਦੀ ਪਾਲਣਾ ’ਚ ਸੁਧਾਰ ਕਾਰਨ ਅਪ੍ਰੈਲ, 2023 ਤਕ 5 ਸਾਲਾਂ ਵਿਚ ਜੀ. ਐੱਸ. ਟੀ. ਰਿਟਰਨ ਦਾਖਲ ਕਰਨ ਵਾਲਿਆਂ ਦੀ ਗਿਣਤੀ’ਚ ਜ਼ਬਰਦਸਤ ਵਾਧਾ ਹੋਇਆ ਹੈ। ਰਿਟਰਨ ਦਾਖ਼ਲ ਕਰਨ ਵਾਲਿਆਂ ਦੀ ਗਿਣਤੀ ਲਗਭਗ 65 ਫ਼ੀਸਦੀ ਵਧ ਕੇ 1.13 ਕਰੋੜ ਹੋ ਗਈ ਹੈ। ਵਿੱਤ ਮੰਤਰਾਲਾ ਨੇ ਇਸ ਦੀ ਜਾਣਕਾਰੀ ਐਤਵਾਰ ਨੂੰ ਦਿੱਤੀ ਹੈ।

ਦੱਸ ਦੇਈਏ ਕਿ ਗੁੱਡਜ਼ ਐਂਡ ਸਰਵਿਸਿਜ਼ ਟੈਕਸ (ਜੀ. ਐੱਸ. ਟੀ.) ਤਹਿਤ ਰਜਿਸਟਰਡ ਸਰਗਰਮ ਕਰਦਾਤਿਆਂ ਦੀ ਗਿਣਤੀ ਵਧ ਕੇ 1.40 ਕਰੋੜ ਹੋ ਗਈ ਹੈ, ਜੋ ਅਪ੍ਰੈਲ 2018 ’ਚ 1.06 ਕਰੋੜ ਸੀ। ਇਸ ਦੇ ਨਾਲ ਹੀ ਮੰਤਰਾਲਾ ਨੇ ਦੱਸਿਆ ਕਿ ਚਾਲੂ ਮਾਲੀ ਸਾਲ ’ਚ ਫਾਈਲਿੰਗ ਮਹੀਨੇ ਦੇ ਅਖੀਰ ਤਕ 90 ਫ਼ੀਸਦੀ ਯੋਗ ਕਰਦਾਤੇ ਜੀ. ਐੱਸ. ਟੀ. ਆਰ.-3ਬੀ. ਰਿਟਰਨ ਦਾਖਲ ਕਰ ਰਹੇ ਹਨ। ਇਹ ਅੰਕੜਾ ਜੀ. ਐੱਸ. ਟੀ. ਲਾਗੂ ਹੋਣ ਦੇ ਪਹਿਲੇ ਸਾਲ 2017-18 ’ਚ 68 ਫ਼ੀਸਦੀ ਸੀ।

ਮੰਤਰਾਲਾ ਨੇ ਸੋਸ਼ਲ ਨੈੱਟਵਰਕਿੰਗ ਮੰਚ ‘ਐਕਸ’ ’ਤੇ ਪੋਸਟ ਕੀਤਾ ਕਿ ਜੀ. ਐੱਸ. ਟੀ. ਨਿਯਮਾਂ ਤੇ ਪ੍ਰਕਿਰਿਆਵਾਂ ਵਿਚ ਸਰਲੀਕਰਨ ਦੇ ਨਤੀਜੇ ਵਜੋਂ ਯੋਗ ਕਰਦਾਤਿਆਂ ਵਲੋਂ ਰਿਟਰਨ ਦਾਖਲ ਕਰਨ ਦਾ ਫ਼ੀਸਦੀ ਵਧ ਗਿਆ ਹੈ। 1 ਜੁਲਾਈ, 2017 ਨੂੰ ਪੂਰੇ ਦੇਸ਼ ਵਿਚ ਜੀ. ਐੱਸ. ਟੀ. ਲਾਗੂ ਕੀਤਾ ਗਿਆ ਸੀ। ਇਸ ਵਿਚ ਐਕਸਾਈਜ਼ ਡਿਊਟੀ, ਸਰਵਿਸ ਟੈਕਸ ਤੇ ਵੈਟ ਵਰਗੇ ਇਕ ਦਰਜਨ ਤੋਂ ਵੱਧ ਸਥਾਨਕ ਟੈਕਸਾਂ ਨੂੰ ਸ਼ਾਮਲ ਕੀਤਾ ਗਿਆ ਸੀ। ਜੀ. ਐੱਸ. ਟੀ. ਆਰ.-3ਬੀ. ਦਾਖਲ ਕਰਨ ਵਾਲਿਆਂ ਦੀ ਗਿਣਤੀ ਅਪ੍ਰੈਲ, 2018 ’ਚ 72.49 ਲੱਖ ਤੋਂ ਵਧ ਕੇ ਅਪ੍ਰੈਲ, 2023 ਤਕ 1.13 ਕਰੋੜ ਹੋ ਗਈ। ਜੀ. ਐੱਸ. ਟੀ. ਆਰ.-3ਬੀ. ਬਾਹਰੀ ਸਪਲਾਈ ਵੇਰਵੇ ਅਤੇ ਟੈਕਸ ਭੁਗਤਾਨ ਦਾਖਲ ਕਰਨ ਲਈ ਮਹੀਨਾਵਾਰ ਰਿਟਰਨ ਫਾਰਮ ਹੈ।

ਮੰਤਰਾਲਾ ਨੇ ਐਕਸ ’ਤੇ ਇਕ ਹੋਰ ਪੋਸਟ ਵਿਚ ਕਿਹਾ ਕਿ ਜੀ. ਐੱਸ. ਟੀ. ਵਿਚ ਅਸਰਦਾਰ ਨੀਤੀ ਅਤੇ ਪ੍ਰਣਾਲੀ ਸਬੰਧੀ ਤਬਦੀਲੀਆਂ ਕਾਰਨ ਪਿਛਲੇ ਕੁਝ ਸਾਲਾਂ ’ਚ ਜੀ. ਐੱਸ. ਟੀ. ਰਿਟਰਨ ਦਾਖਲ ਕਰਨ ਦੇ ਪਾਲਣਾ ਪੱਧਰ ਵਿਚ ਸੁਧਾਰ ਹੋਇਆ ਹੈ। ਮੰਤਰਾਲਾ ਨੇ ਕਿਹਾ ਕਿ ਪਿਛਲੇ ਕੁਝ ਸਾਲਾਂ ’ਚ ਰਿਟਰਨ ਫਾਈਲਿੰਗ ਵਿਚ ਪਾਲਣਾ ਦਰ ’ਚ ਵਾਧਾ ਸੁਧਾਰ ਦਾ ਸੰਕੇਤ ਦਿੰਦਾ ਹੈ। ਨਵੰਬਰ ’ਚ ਮਹੀਨਾਵਾਰ ਜੀ. ਐੱਸ. ਟੀ. ਕੁਲੈਕਸ਼ਨ 1.68 ਲੱਖ ਕਰੋੜ ਰੁਪਏ ਰਹੀ। ਚਾਲੂ ਮਾਲੀ ਸਾਲ ’ਚ ਇਹ 6ਵੀਂ ਵਾਰ ਹੈ ਕਿ ਮਹੀਨਾਵਾਰ ਗ੍ਰਾਸ ਜੀ. ਐੱਸ. ਟੀ. ਕੁਲੈਕਸ਼ਨ 1.60 ਲੱਖ ਕਰੋੜ ਰੁਪਏ ਨੂੰ ਪਾਰ ਕਰ ਗਿਆ ਹੈ। ਅਪ੍ਰੈਲ ਵਿਚ ਜੀ. ਐੱਸ. ਟੀ. ਕੁਲੈਕਸ਼ਨ ਰਿਕਾਰਡ 1.87 ਲੱਖ ਕਰੋੜ ਰੁਪਏ ’ਤੇ ਪਹੁੰਚ ਗਈ ਸੀ।