ਨਿਊਜ਼ੀਲੈਂਡ ‘ਚ ਸੂਟਕੇਸ ‘ਚੋਂ ਮਿਲੀਆਂ ਸਨ ਬੱਚਿਆਂ ਦੀਆਂ ਲਾਸ਼ਾਂ

ਸਿਓਲ : ਦੱਖਣੀ ਕੋਰੀਆ ਦੀ ਪੁਲਸ ਨੇ ਵੀਰਵਾਰ ਨੂੰ ਕਿਹਾ ਕਿ ਉਨ੍ਹਾਂ ਨੇ ਦੋ ਬੱਚਿਆਂ ਦੀ ਮਾਂ ਮੰਨੀ ਜਾਣ ਵਾਲੀ ਇੱਕ ਔਰਤ ਨੂੰ ਗ੍ਰਿਫ਼ਤਾਰ ਕੀਤਾ ਹੈ, ਜਿਹਨਾਂ ਦੇ ਅਵਸ਼ੇਸ਼ ਪਿਛਲੇ ਮਹੀਨੇ ਨਿਊਜ਼ੀਲੈਂਡ ਵਿੱਚ ਇੱਕ ਸੂਟਕੇਸ ਵਿੱਚੋਂ ਮਿਲੇ ਸਨ। ਰਾਇਟਰਜ਼ ਦੇ ਅਨੁਸਾਰ ਕੋਰੀਆਈ ਮੂਲ ਦੀ ਨਿਊਜ਼ੀਲੈਂਡਰ ‘ਤੇ ਕਤਲ ਦਾ ਦੋਸ਼ ਲਗਾਇਆ ਗਿਆ ਹੈ। ਕੋਰੀਅਨ ਨੈਸ਼ਨਲ ਪੁਲਸ ਏਜੰਸੀ ਨੇ ਕਿਹਾ ਕਿ ਗਲੋਬਲ ਪੁਲਸ ਏਜੰਸੀ ਇੰਟਰਪੋਲ ਦੁਆਰਾ ਰੈੱਡ ਨੋਟਿਸ ਜਾਰੀ ਕੀਤੇ ਜਾਣ ਤੋਂ ਬਾਅਦ 40 ਸਾਲਾ ਔਰਤ ਨੂੰ ਦੱਖਣ-ਪੂਰਬੀ ਸ਼ਹਿਰ ਉਲਸਾਨ ਤੋਂ ਗ੍ਰਿਫ਼ਤਾਰ ਕੀਤਾ ਗਿਆ ਸੀ।

ਅਧਿਕਾਰੀਆਂ ਨੇ ਦੱਸਿਆ ਕਿ ਔਰਤ ‘ਤੇ 2018 ਵਿੱਚ ਆਕਲੈਂਡ ਵਿੱਚ ਆਪਣੇ 7 ਸਾਲ ਅਤੇ 10 ਸਾਲ ਦੇ ਬੱਚਿਆਂ ਦਾ ਕਤਲ ਕਰਨ ਤੋਂ ਬਾਅਦ ਦੱਖਣੀ ਕੋਰੀਆ ਭੱਜਣ ਦਾ ਸ਼ੱਕ ਸੀ। ਉਨ੍ਹਾਂ ਕਿਹਾ ਕਿ ਦੱਖਣੀ ਕੋਰੀਆ ਦੀ ਅਦਾਲਤ ਇਸ ਗੱਲ ਦੀ ਸਮੀਖਿਆ ਕਰੇਗੀ ਕਿ ਸ਼ੱਕੀ ਨੂੰ ਨਿਊਜ਼ੀਲੈਂਡ ਦੇ ਹਵਾਲੇ ਕੀਤਾ ਜਾਵੇ ਜਾਂ ਨਹੀਂ। ਉੱਧਰ ਨਿਊਜ਼ੀਲੈਂਡ ਪੁਲਸ ਨੇ ਕਿਹਾ ਕਿ ਵਾਰੰਟ ਕਤਲ ਦੇ ਦੋ ਦੋਸ਼ਾਂ ਦੇ ਸਬੰਧ ਵਿੱਚ ਸੀ ਅਤੇ ਉਨ੍ਹਾਂ ਨੇ ਦੋਵਾਂ ਦੇਸ਼ਾਂ ਵਿਚਕਾਰ ਇੱਕ ਸੰਧੀ ਦੇ ਪ੍ਰਬੰਧਾਂ ਦੇ ਤਹਿਤ ਔਰਤ ਦੀ ਹਵਾਲਗੀ ਲਈ ਅਰਜ਼ੀ ਦਿੱਤੀ ਹੈ। ਉਨ੍ਹਾਂ ਨੇ ਕਿਹਾ ਕਿ ਉਨ੍ਹਾਂ ਨੇ ਦੱਖਣੀ ਕੋਰੀਆ ਦੇ ਅਧਿਕਾਰੀਆਂ ਨੂੰ ਔਰਤ ਨੂੰ ਹਵਾਲਗੀ ਹੋਣ ਤੱਕ ਜੇਲ੍ਹ ਵਿੱਚ ਰੱਖਣ ਲਈ ਕਿਹਾ ਹੈ।

ਡਿਟੈਕਟਿਵ ਇੰਸਪੈਕਟਰ ਟੋਫਿਲਾਉ ਫਾਮਾਨੂਆ ਵੇਏਲੁਆ ਨੇ ਇੱਕ ਬਿਆਨ ਵਿੱਚ ਕਿਹਾ ਕਿ ਇੰਨੇ ਥੋੜ੍ਹੇ ਸਮੇਂ ਵਿੱਚ ਕਿਸੇ ਨੂੰ ਵਿਦੇਸ਼ ਵਿੱਚ ਹਿਰਾਸਤ ਵਿੱਚ ਰੱਖਣਾ ਸਭ ਕੁਝ ਕੋਰੀਅਨ ਅਧਿਕਾਰੀਆਂ ਦੀ ਸਹਾਇਤਾ ਅਤੇ ਸਾਡੇ ਨਿਊਜ਼ੀਲੈਂਡ ਪੁਲਸ ਇੰਟਰਪੋਲ ਸਟਾਫ ਦੁਆਰਾ ਤਾਲਮੇਲ ਦੇ ਨਾਲ ਸੰਭਵ ਹੈ।ਉਸਨੇ ਕਿਹਾ ਕਿ ਜਾਂਚ “ਬਹੁਤ ਚੁਣੌਤੀਪੂਰਨ” ਸੀ ਅਤੇ ਨਿਊਜ਼ੀਲੈਂਡ ਅਤੇ ਵਿਦੇਸ਼ਾਂ ਵਿੱਚ ਪੁੱਛਗਿੱਛ ਜਾਰੀ ਹੈ।ਵੈਲੂਆ ਨੇ ਕਿਹਾ ਕਿ ਪੁਲਸ ਇਸ ਬਾਰੇ ਕੋਈ ਟਿੱਪਣੀ ਨਹੀਂ ਕਰੇਗੀ ਕਿਉਂਕਿ ਮਾਮਲਾ ਹੁਣ ਅਦਾਲਤ ਵਿੱਚ ਹੈ।ਜ਼ਿਕਰਯੋਗ ਹੈ ਕਿ ਨਿਊਜ਼ੀਲੈਂਡ ਪੁਲਸ ਨੇ ਉਦੋਂ ਕਤਲ ਦੀ ਜਾਂਚ ਸ਼ੁਰੂ ਕੀਤੀ ਸੀ, ਜਦੋਂ ਆਕਲੈਂਡ ਵਿੱਚ ਇੱਕ ਪਰਿਵਾਰ ਨੂੰ ਸੂਟਕੇਸਾਂ ਵਿੱਚ ਬੱਚਿਆਂ ਦੇ ਅਵਸ਼ੇਸ਼ ਮਿਲੇ ਜੋ ਉਹਨਾਂ ਨੇ ਨੀਲਾਮੀ ਵਿੱਚ ਖਰੀਦੇ ਸਨ।

ਪਰਿਵਾਰ ਨੇ ਸਟੋਰੇਜ ਲਾਕਰ ਦੀ ਸਮੱਗਰੀ ‘ਤੇ ਆਨਲਾਈਨ ਬੋਲੀ ਲਗਾਈ ਸੀ। ਇਹ ਬੋਲੀਆਂ ਖਰੀਦਦਾਰਾਂ ਨੂੰ ਨੀਲਾਮੀ ਤੋਂ ਪਹਿਲਾਂ ਸਮੱਗਰੀ ਦੇ ਅੰਦਰ ਦੇਖਣ ਦੀ ਇਜਾਜ਼ਤ ਨਹੀਂ ਦਿੰਦੀਆਂ। ਅਜਿਹੀ ਸਥਿਤੀ ਵਿੱਚ ਇਹ ਬੋਲੀ ਸਿਰਫ਼ ਮਾਲ ਦੇ ਬਾਹਰੀ ਰੂਪ ਨੂੰ ਦੇਖ ਕੇ ਕੀਤੀ ਜਾਂਦੀ ਹੈ। ਅਜਿਹੀਆਂ ਨੀਲਾਮੀ ‘ਤੇ ਕਈ ਵੱਡੇ ਟੀਵੀ ਸ਼ੋਅ ਵੀ ਬਣੇ ਹਨ। ਲਾਸ਼ ਮਿਲਣ ਵਾਲੇ ਪਰਿਵਾਰ ਦਾ ਮੌਤ ਨਾਲ ਕੋਈ ਲੈਣਾ-ਦੇਣਾ ਨਹੀਂ ਸੀ।ਪੁਲਸ ਦਾ ਮੰਨਣਾ ਹੈ ਕਿ ਬੱਚਿਆਂ ਦੀਆਂ ਲਾਸ਼ਾਂ ਕਰੀਬ ਤਿੰਨ ਤੋਂ ਚਾਰ ਸਾਲਾਂ ਤੋਂ ਸੂਟਕੇਸ ਵਿੱਚ ਬੰਦ ਸਨ। ਦੋਵੇਂ ਸੂਟਕੇਸ ਇੱਕੋ ਆਕਾਰ ਦੇ ਹਨ। ਪੁਲਸ ਅਨੁਸਾਰ ਜਿਸ ਪਰਿਵਾਰ ਨੇ ਇਹ ਵਸਤੂ ਸਟੋਰੇਜ ਯੂਨਿਟ ਤੋਂ ਖਰੀਦੀ ਹੈ, ਉਹ ਕਿਸੇ ਵੀ ਤਰ੍ਹਾਂ ਇਸ ਘਟਨਾ ਵਿੱਚ ਸ਼ਾਮਲ ਨਹੀਂ ਹੈ।