8 ਮਹੀਨਿਆਂ ਦੀ ਗਰਭਵਤੀ ਅਦਾਕਾਰਾ ਦੀ ਦਿਲ ਦਾ ਦੌਰਾ ਪੈਣ ਕਾਰਨ ਮੌਤ

ਮੁੰਬਈ– ਮਸ਼ਹੂਰ ਮਲਿਆਲਮ ਟੈਲੀਵਿਜ਼ਨ ਅਦਾਕਾਰਾ ਪ੍ਰਿਆ, ਜੋ ‘ਕਰੂਥਮੁਥੂ’ ’ਚ ਆਪਣੀ ਭੂਮਿਕਾ ਲਈ ਸਭ ਤੋਂ ਵਧ ਜਾਣੀ ਜਾਂਦੀ ਹੈ, ਦੀ ਬੁੱਧਵਾਰ ਨੂੰ ਦਿਲ ਦਾ ਦੌਰਾ ਪੈਣ ਕਾਰਨ ਮੌਤ ਹੋ ਗਈ। ਅਦਾਕਾਰਾ 8 ਮਹੀਨਿਆਂ ਦੀ ਗਰਭਵਤੀ ਸੀ ਤੇ ਡਾਕਟਰ ਇਸ ਸਮੇਂ ਆਈ. ਸੀ. ਯੂ. ’ਚ ਉਸ ਦੇ ਬੱਚੇ ਨੂੰ ਬਚਾਉਣ ਦੀ ਕੋਸ਼ਿਸ਼ ਕਰ ਰਹੇ ਹਨ। ਪ੍ਰਿਆ, ਜੋ ਕਿ ਪੇਸ਼ੇ ਤੋਂ ਡਾਕਟਰ ਵੀ ਸੀ, ਨੇ ਵਿਆਹ ਤੋਂ ਬਾਅਦ ਅਦਾਕਾਰੀ ਤੋਂ ਬ੍ਰੇਕ ਲੈ ਲਈ ਸੀ। ਉਸ ਦੇ ਦਿਹਾਂਤ ਦੀ ਖ਼ਬਰ ਅਦਾਕਾਰ ਕਿਸ਼ੋਰ ਸੱਤਿਆ ਨੇ ਆਪਣੇ ਇੰਸਟਾਗ੍ਰਾਮ ਅਕਾਊਂਟ ’ਤੇ ਸਾਂਝੀ ਕੀਤੀ ਹੈ।

ਅਦਾਕਾਰਾ ਦੀ ਇਕ ਤਸਵੀਰ ਸਾਂਝੀ ਕਰਦਿਆਂ ਉਸ ਨੇ ਮਲਿਆਲਮ ’ਚ ਲਿਖਿਆ, “ਮਲਿਆਲਮ ਟੈਲੀਵਿਜ਼ਨ ਸੈਕਟਰ ’ਚ ਇਕ ਹੋਰ ਅਚਾਨਕ ਮੌਤ। ਡਾਕਟਰ ਪ੍ਰਿਆ ਦੀ ਦਿਲ ਦਾ ਦੌਰਾ ਪੈਣ ਨਾਲ ਮੌਤ ਹੋ ਗਈ। ਉਹ 8 ਮਹੀਨਿਆਂ ਦੀ ਗਰਭਵਤੀ ਸੀ। ਬੱਚਾ ਆਈ. ਸੀ. ਯੂ. ’ਚ ਹੈ। ਉਸ ਨੂੰ ਸਿਹਤ ਸਬੰਧੀ ਕੋਈ ਸਮੱਸਿਆ ਨਹੀਂ ਸੀ। ਕੱਲ ਉਹ ਰੁਟੀਨ ਚੈੱਕਅੱਪ ਲਈ ਹਸਪਤਾਲ ਗਈ ਸੀ ਤੇ ਅਚਾਨਕ ਦਿਲ ਦਾ ਦੌਰਾ ਪੈ ਗਿਆ।’’

ਅਦਾਕਾਰ ਨੇ ਅੱਗੇ ਕਿਹਾ, ‘‘ਜੋ ਮਾਂ ਰੋ ਰਹੀ ਹੈ, ਉਹ ਆਪਣੀ ਇਕਲੌਤੀ ਧੀ ਦੀ ਮੌਤ ਨੂੰ ਸਵੀਕਾਰ ਨਹੀਂ ਕਰ ਪਾ ਰਹੀ ਹੈ। ਪਤੀ ਨੰਨਾ ਦਾ ਦਰਦ, ਪ੍ਰਿਆ ਨਾਲ 6 ਮਹੀਨਿਆਂ ਤੋਂ ਬਿਨਾਂ ਕਿਤੇ ਜਾ ਕੇ ਸਾਥ ਦੇਣ ਵਾਲਾ, ਬੀਤੀ ਰਾਤ ਹਸਪਤਾਲ ਜਾਂਦੇ ਸਮੇਂ ਮੇਰੇ ਮਨ ’ਚ ਉਦਾਸੀ ਭਰ ਗਈ। ਤੁਸੀਂ ਉਨ੍ਹਾਂ ਨੂੰ ਦਿਲਾਸਾ ਦੇਣ ਲਈ ਕੀ ਕਹੋਗੇ, ਰੱਬ ਨੇ ਆਪਣੇ ਲੋਕਾਂ ਨਾਲ ਇੰਨੀ ਬੇਰਹਿਮੀ ਕਿਉਂ ਦਿਖਾਈ ਜੋ ਵਿਸ਼ਵਾਸੀ ਸਨ, ਮੇਰੇ ਮਨ ’ਚ ਇਹ ਸਵਾਲ ਵਾਰ-ਵਾਰ ਆਉਂਦਾ ਰਿਹਾ।’’