ਪੱਛਮੀ ਯੂਰਪ ‘ਚ ਤੂਫਾਨ ਕਾਰਨ ਸਕੂਲ, ਆਵਾਜਾਈ, ਬਿਜਲੀ, ਉਡਾਣਾਂ ਬੁਰੀ ਤਰ੍ਹਾਂ ਪ੍ਰਭਾਵਿਤ

ਪੈਰਿਸ: ਪੱਛਮੀ ਯੂਰਪ ਦੇ ਦੇਸ਼ਾਂ ‘ਚ ਆਏ ਤੂਫਾਨ ਸਿਯਾਰਨ ਕਾਰਨ ਫਰਾਂਸ ਦੇ ਐਟਲਾਂਟਿਕ ਤੱਟੀ ਇਲਾਕਿਆਂ ‘ਚ 200 ਕਿਲੋਮੀਟਰ ਪ੍ਰਤੀ ਘੰਟੇ ਦੀ ਰਫਤਾਰ ਨਾਲ ਹਵਾਵਾਂ ਚੱਲ ਰਹੀਆਂ ਹਨ। ਵੀਰਵਾਰ ਨੂੰ ਤੇਜ਼ ਹਵਾਵਾਂ ਕਾਰਨ ਕਈ ਥਾਵਾਂ ‘ਤੇ ਦਰੱਖਤ ਉੱਖੜ ਗਏ, ਘਰਾਂ ਦੇ ਸ਼ੀਸ਼ੇ ਟੁੱਟ ਗਏ ਅਤੇ ਫਰਾਂਸ ਦੇ ਲਗਭਗ 12 ਲੱਖ ਘਰ ਬਿਜਲੀ ਤੋਂ ਸੱਖਣੇ ਹੋ ਗਏ। ਤੇਜ਼ ਹਵਾਵਾਂ ਅਤੇ ਮੀਂਹ ਨੇ ਦੱਖਣੀ ਇੰਗਲੈਂਡ ਅਤੇ ਚੈਨਲ ਆਈਲੈਂਡਜ਼ ਨੂੰ ਵੀ ਪ੍ਰਭਾਵਿਤ ਕੀਤਾ, ਜਿੱਥੇ 160 ਕਿਲੋਮੀਟਰ ਪ੍ਰਤੀ ਘੰਟੇ ਤੋਂ ਵੱਧ ਦੀ ਰਫ਼ਤਾਰ ਨਾਲ ਹਵਾਵਾਂ ਦਰਜ ਕੀਤੀਆਂ ਗਈਆਂ।

ਕੋਰਨਵਾਲ ਅਤੇ ਡੇਵੋਨ ਦੇ ਤੱਟਵਰਤੀ ਖੇਤਰਾਂ ਵਿਚ ਡਿੱਗਣ ਅਤੇ ਪਾਣੀ ਭਰਨ ਕਾਰਨ ਸਵੇਰੇ ਆਵਾਜਾਈ ਵਿਚ ਵਿਘਨ ਪਿਆ ਅਤੇ ਸਕੂਲ ਵੀ ਬੰਦ ਰਹੇ। ਜਰਸੀ, ਗਰੇਨਸੀ ਅਤੇ ਐਲਡਰਨੀ ਦੇ ਚੈਨਲ ਆਈਲੈਂਡਜ਼ ਦੇ ਹਵਾਈ ਅੱਡਿਆਂ ਤੋਂ ਉਡਾਣਾਂ ਰੱਦ ਕਰ ਦਿੱਤੀਆਂ ਗਈਆਂ। ਨੀਦਰਲੈਂਡ ਦੀ ਏਅਰਲਾਈਨ KLM ਨੇ ਅੱਜ ਦੁਪਹਿਰ ਤੋਂ ਦਿਨ ਲਈ ਉਡਾਣਾਂ ਦੀ ਆਵਾਜਾਈ ‘ਤੇ ਪਾਬੰਦੀ ਲਗਾ ਦਿੱਤੀ ਹੈ। ਦੇਸ਼ ਵਿਚ ਚੱਲ ਰਹੀਆਂ ਤੇਜ਼ ਹਵਾਵਾਂ ਕਾਰਨ ਕੇਐਲਐਮ ਨੇ ਇਹ ਕਦਮ ਚੁੱਕਿਆ ਹੈ। 

ਯੇਲ ਕਲਾਈਮੇਟ ਕਨੈਕਸ਼ਨ ਦੇ ਮੌਸਮ ਵਿਗਿਆਨੀ ਅਤੇ ਵਿਗਿਆਨ ਲੇਖਕ ਬੌਬ ਹੈਨਸਨ ਨੇ ਬੁੱਧਵਾਰ ਨੂੰ ਕਿਹਾ, “ਇਹ ਬ੍ਰਿਟੇਨ ਅਤੇ ਫਰਾਂਸ ਲਈ ਕਈ ਸਾਲਾਂ ਬਾਅਦ ਆਉਣ ਵਾਲਾ ਤੂਫਾਨ ਜਾਪਦਾ ਹੈ।” ਉਸਨੇ ਕਿਹਾ ਕਿ ਸੀਆਰਨ ਇਕ “ਇੱਕ ਪੀੜ੍ਹੀ ਵਿੱਚ ਆਉਣ ਵਾਲਾ ਤੂਫਾਨ” ਬਣ ਸਕਦਾ ਹੈ। ਫਰਾਂਸ ਵਿਚ ਮੌਸਮ ਨਾਲ ਸਬੰਧਤ ਇਕ ਮੌਤ ਦੀ ਪੁਸ਼ਟੀ ਪਹਿਲਾਂ ਹੀ ਹੋ ਚੁੱਕੀ ਹੈ। ਟਰਾਂਸਪੋਰਟ ਮੰਤਰੀ ਕਲੇਮੈਂਟ ਬਿਊਨ ਨੇ ਕਿਹਾ ਕਿ ਉੱਤਰੀ ਫਰਾਂਸ ਦੇ ਅੰਦਰੂਨੀ ਆਇਸਨੇ ਖੇਤਰ ਵਿਚ ਇਕ ਟਰੱਕ ਡਰਾਈਵਰ ਦੀ ਮੌਤ ਹੋ ਗਈ ਜਦੋਂ ਇਕ ਦਰੱਖਤ ਉਸ ਦੇ ਵਾਹਨ ਨਾਲ ਟਕਰਾ ਗਿਆ। ਮੌਸਮ ਵਿਭਾਗ ਦੀ ਖ਼ਬਰ ਮੁਤਾਬਕ ਬ੍ਰਿਟੇਨੀ ਤੱਟ ਨਾਲ ਲੱਗਦੇ ਇਲਾਕਿਆਂ ‘ਚ ਹਵਾ ਦੀ ਰਫ਼ਤਾਰ 180 ਕਿਲੋਮੀਟਰ ਪ੍ਰਤੀ ਘੰਟਾ ਦਰਜ ਕੀਤੀ ਗਈ। ਨੌਰਮੈਂਡੀ ਤੱਟ ‘ਤੇ ਇਸ ਦੀ ਰਫ਼ਤਾਰ 160 ਕਿਲੋਮੀਟਰ ਪ੍ਰਤੀ ਘੰਟਾ ਸੀ, ਜਦੋਂ ਕਿ ਅੰਦਰਲੇ ਪਾਸੇ 150 ਕਿਲੋਮੀਟਰ ਪ੍ਰਤੀ ਘੰਟੇ ਦੀ ਰਫਤਾਰ ਨਾਲ ਹਵਾਵਾਂ ਚੱਲੀਆਂ।

ਪੱਛਮੀ ਫਰਾਂਸ ਦੇ ਕਈ ਖੇਤਰਾਂ ਵਿਚ ਰੇਲ ਸੇਵਾਵਾਂ ਵੀ ਰੱਦ ਕਰ ਦਿੱਤੀਆਂ ਗਈਆਂ ਹਨ। ਬਿਊਨ ਨੇ ਲੋਕਾਂ ਨੂੰ ਘਰਾਂ ਵਿਚ ਰਹਿਣ ਲਈ ਕਿਹਾ ਹੈ ਜਾਂ ਘੱਟੋ-ਘੱਟ ਉਨ੍ਹਾਂ ਖੇਤਰਾਂ ਵਿਚ ਯਾਤਰਾ ਕਰਦੇ ਸਮੇਂ ਸਾਵਧਾਨ ਰਹਿਣ ਲਈ ਕਿਹਾ ਹੈ ਜਿਨ੍ਹਾਂ ਲਈ ਮੌਸਮ ਦੀ ਚੇਤਾਵਨੀ ਜਾਰੀ ਕੀਤੀ ਗਈ ਹੈ। ਬਿਜਲੀ ਪ੍ਰਦਾਤਾ ਏਨੇਡਿਸ ਨੇ ਇਕ ਬਿਆਨ ਵਿਚ ਘੋਸ਼ਣਾ ਕੀਤੀ ਕਿ ਤੂਫਾਨ ਕਾਰਨ ਵੀਰਵਾਰ ਸਵੇਰ ਤੱਕ ਲਗਭਗ 1.2 ਮਿਲੀਅਨ ਫਰਾਂਸੀਸੀ ਘਰਾਂ ਵਿਚ ਬਿਜਲੀ ਗੁੱਲ ਹੋ ਗਈ ਸੀ।