ਬਾਬਰ ਨੂੰ ਹੁਣ ਪੂਰੇ ਸਮਰਥਨ ਦੀ ਲੋੜ : ਹਫੀਜ਼
ਲਾਹੌਰ,- ਪਾਕਿਸਤਾਨ ਦੇ ਸਾਬਕਾ ਕਪਤਾਨ ਅਤੇ ਕ੍ਰਿਕਟ ਬੋਰਡ ਦੀ ਤਕਨੀਕੀ ਕਮੇਟੀ ਦੇ ਮੈਂਬਰ ਮੁਹੰਮਦ ਹਫੀਜ਼ ਨੇ ਅਗਲੇ ਮਹੀਨੇ ਭਾਰਤ ਵਿਚ ਹੋਣ ਵਾਲੇ ਵਿਸ਼ਵ ਕੱਪ ਤੋਂ ਪਹਿਲਾਂ ਕਪਤਾਨ ਬਾਬਰ ਆਜ਼ਮ ਦਾ ਸਮਰਥਨ ਕਰਨ ਅਤੇ ਆਤਮਵਿਸ਼ਵਾਸ ਵਧਾਉਣ ਦੀ ਗੱਲ ਕੀਤੀ। ਸ਼ਨੀਵਾਰ ਨੂੰ ਮੀਡੀਆ ਨਾਲ ਗੱਲ ਕਰਦੇ ਹੋਏ ਹਫੀਜ਼ ਨੇ ਬਾਬਰ ਦੀ ਕਪਤਾਨੀ ਦੀ ਆਲੋਚਨਾ ਦਾ ਹਵਾਲਾ ਦਿੰਦੇ ਹੋਏ ਕਿਹਾ ਕਿ ਏਸ਼ੀਆ ਕੱਪ ‘ਚ ਪਾਕਿਸਤਾਨ ਦੀ ਹਾਰ ਲਈ ਇਕੱਲੇ ਉਸ ਨੂੰ ਜ਼ਿੰਮੇਵਾਰ ਨਹੀਂ ਠਹਿਰਾਇਆ ਜਾ ਸਕਦਾ।
ਹਫੀਜ਼ ਨੇ ਕਿਹਾ, ”ਏਸ਼ੀਆ ਕੱਪ ਦੇ ਫਾਈਨਲ ‘ਚ ਨਾ ਪਹੁੰਚਣ ਲਈ ਇਕੱਲੇ ਉਸ ‘ਤੇ ਦੋਸ਼ ਲਗਾਉਣਾ ਸਹੀ ਨਹੀਂ ਹੈ। ਅਸੀਂ ਫਾਈਨਲ ਵਿੱਚ ਪਹੁੰਚਣ ਦਾ ਸਿਹਰਾ ਸਿਰਫ਼ ਕਪਤਾਨ ਨੂੰ ਦੇਣ ਲਈ ਤਿਆਰ ਨਹੀਂ ਹਾਂ, ਇਸ ਲਈ ਅਸੀਂ ਸਿਰਫ਼ ਉਸ ਨੂੰ ਹੀ ਏਸ਼ੀਆ ਕੱਪ ਦੇ ਫਾਈਨਲ ਵਿੱਚ ਨਾ ਪਹੁੰਚਣ ਦਾ ਦੋਸ਼ ਕਿਉਂ ਦੇਈਏ। ਕ੍ਰਿਕਟ ਇੱਕ ‘ਟੀਮ ਗੇਮ’ ਹੈ।
ਉਨ੍ਹਾਂ ਕਿਹਾ ਕਿ ਇਸ ਸਮੇਂ ਦੇਸ਼ ਦੇ ਕ੍ਰਿਕਟ ਜਗਤ ਨੂੰ ਬਾਬਰ ਅਤੇ ਉਨ੍ਹਾਂ ਦੀ ਟੀਮ ਦਾ ਸਮਰਥਨ ਕਰਨ ਦੀ ਲੋੜ ਹੈ। ਹਫੀਜ਼ ਨੇ ਕਿਹਾ, ”ਇਹ ਸਾਰੇ ਖਿਡਾਰੀ ਲੰਬੇ ਸਮੇਂ ਤੋਂ ਬਾਬਰ ਦੀ ਅਗਵਾਈ ‘ਚ ਇਕ-ਦੂਜੇ ਨਾਲ ਖੇਡ ਰਹੇ ਹਨ, ਇਸ ਲਈ ਸਾਨੂੰ ਕੁਝ ਕਮਜ਼ੋਰ ਪਹਿਲੂਆਂ ਦਾ ਧਿਆਨ ਰੱਖਣਾ ਹੋਵੇਗਾ। ਪਾਕਿਸਤਾਨ ਵਿਸ਼ਵ ਕੱਪ ਵਿੱਚ ਚੋਟੀ ਦੇ ਚਾਰ ਦਾਅਵੇਦਾਰਾਂ ਵਿੱਚ ਸ਼ਾਮਲ ਹੋਵੇਗਾ।