ਯੁਵਰਾਜ ਸਿੰਘ ਸੰਧੂ ਨੇ ਜਿੱਤਿਆ ਜੰਮੂ-ਕਸ਼ਮੀਰ ਓਪਨ ਗੋਲਫ ਟੂਰਨਾਮੈਂਟ

ਚੰਡੀਗੜ੍ਹ ਦੇ ਯੁਵਰਾਜ ਸਿੰਘ ਸੰਧੂ ਨੇ 40 ਲੱਖ ਰੁਪਏ ਦਾ ਜੰਮੂ-ਕਸ਼ਮੀਰ ਓਪਨ ਗੋਲਫ ਟੂਰਨਾਮੈਂਟ ਸੱਤ ਸ਼ਾਟ ਦੇ ਫਰਕ ਨਾਲ ਜਿੱਤ ਲਿਆ ਹੈ। ਤੀਜੇ ਰਾਊਂਡ ਤੋਂ ਬਾਅਦ ਸੰਧੂ ਕੋਲ ਚਾਰ ਸ਼ਾਟ ਦੀ ਬੜ੍ਹਤ ਸੀ। ਉਸ ਨੇ ਆਖਰੀ ਦੌਰ ਵਿੱਚ ਇਕ ਅੰਡਰ 71 ਦਾ ਸਕੋਰ ਬਣਾਇਆ ਅਤੇ 13 ਅੰਡਰ 275 ਦੇ ਕੁੱਲ ਸਕੋਰ ਨਾਲ ਟੂਰਨਾਮੈਂਟ ਜਿੱਤਣ ਵਿੱਚ ਕਾਮਯਾਬ ਰਿਹਾ। ਸੰਧੂ ਦੀ ਇਹ ਉਸਦੇ ਕਰੀਅਰ ਦੀ ਚੌਥੀ ਜਿੱਤ ਅਤੇ ਸੀਜ਼ਨ ਦਾ ਤੀਜਾ ਖਿਤਾਬ ਹੈ।

ਸੰਧੂ ਨੂੰ ਜਿੱਤ ਨਾਲ ਛੇ ਲੱਖ ਰੁਪਏ ਦਾ ਚੈੱਕ ਮਿਲਿਆ। ਬੈਂਗਲੁਰੂ ਦੀ ਖਲਿਨ ਜੋਸ਼ੀ ਦੂਜੇ ਅਤੇ ਗੁਰੂਗ੍ਰਾਮ ਦੇ ਮਨੂ ਗੰਡਾਸ ਤੀਜੇ ਸਥਾਨ ‘ਤੇ ਰਹੇ। ਜਿੱਤ ਤੋਂ ਬਾਅਦ ਸੰਧੂ ਨੇ ਕਿਹਾ- ਮੈਂ ਇਸ ਹਫਤੇ ਥੋੜ੍ਹਾ ਘਬਰਾਇਆ ਹੋਇਆ ਸੀ ਕਿਉਂਕਿ ਮੈਂ ਇੰਡੋਨੇਸ਼ੀਆ ‘ਚ ਏਸ਼ੀਅਨ ਡਿਵੈਲਪਮੈਂਟ ਟੂਰ ਦੌਰਾਨ ਚੰਗਾ ਸਕੋਰ ਨਹੀਂ ਬਣਾ ਸਕਿਆ ਸੀ। ਮੈਂ ਸੋਚਿਆ ਕਿ ਮੈਨੂੰ ਥੋੜ੍ਹਾ ਭਰੋਸਾ ਚਾਹੀਦਾ ਹੈ। 

ਮੇਰੇ ਪਿਤਾ ਨੇ ਅੱਜ ਸਵੇਰੇ ਜੰਮੂ ਪਹੁੰਚ ਕੇ ਮੈਨੂੰ ਹੈਰਾਨ ਕਰ ਦਿੱਤਾ। ਮੈਨੂੰ ਸੱਚਮੁੱਚ ਰਾਹਤ ਮਿਲੀ ਜਦੋਂ ਮੈਂ ਉਨ੍ਹਾਂ ਨੂੰ ਆਪਣੇ ਮੈਚ ਤੋਂ ਪਹਿਲਾਂ ਗੋਲਫ ਕੋਰਸ ‘ਤੇ ਦੇਖਿਆ। ਮੈਂ ਅੱਜ ਇਸ ਨੂੰ ਚੰਗੀ ਤਰ੍ਹਾਂ ਕਰਨ ਵਿਚ ਕਾਮਯਾਬ ਰਿਹਾ। ਮੈਂ 13 ਨੰਬਰ ਦੇ ਹੋਲ ‘ਤੇ 9 ਫੁੱਟ ਦਾ ਸ਼ਾਟ ਮਾਰ ਕੇ ਬਰਡੀ ਬਣਾਈ ਤੇ ਇਸ ਤੋਂ ਬਾਅਦ, ਮੈਨੂੰ ਲੱਗਾ ਕਿ ਇਹ ਮੈਚ ਮੇਰੇ ਕੋਲ ਹੈ। ਮੇਰੇ ਲਈ ਹਫ਼ਤੇ ਦੀ ਮੁੱਖ ਗੱਲ ਮੇਰਾ ਵਧੀਆ ਕੋਰਸ ਪ੍ਰਬੰਧਨ ਸੀ। ਤੁਹਾਨੂੰ ਇਸਦੇ ਲਈ 100 ਫੀਸਦੀ ਵਚਨਬੱਧ ਹੋਣਾ ਪਏਗਾ ਅਤੇ ਮੈਂ ਹਫ਼ਤੇ ਦੇ ਜ਼ਿਆਦਾਤਰ ਹਿੱਸੇ ਲਈ ਇਹੋ ਕੀਤਾ ਹੈ।