ਦਰਿਆ ਪਾਰ ਕਰ ਰਹੇ ਲੋਕਾਂ ਦੀ ਬੇੜੀ ਅਚਾਨਕ ਡੁੱਬੀ

ਫਾਜ਼ਿਲਕਾ : ਫਾਜ਼ਿਲਕਾ ਦੇ ਨਾਲ ਲੱਗਦੇ ਪਿੰਡ ਦੋਨਾ ਨਾਨਕਾ ਇਲਾਕੇ ਅੰਦਰ ਪਿਛਲੇ ਕਈ ਦਿਨਾਂ ਤੋਂ ਹੜ੍ਹਾਂ ਨੇ ਦਸਤਕ ਦਿੱਤੀ ਹੋਈ ਹੈ ਅਤੇ ਲੋਕਾਂ ਦਾ ਸੜਕ ਨਾਲ ਸੰਪਰਕ ਟੁੱਟ ਚੁੱਕਿਆਂ ਹੈ। ਇਸ ਦੇ ਚੱਲਦੇ ਪਿੰਡਾਂ ਦੇ ਲੋਕ ਜਦੋਂ ਆਪਣੇ ਕੰਮਕਾਜ ਲਈ 10 ਤੋਂ 12 ਦੇ ਕਰੀਬ ਵਿਅਕਤੀ ਬੇੜੀ ਰਾਹੀਂ ਦਰਿਆ ਪਾਰ ਕਰ ਰਹੇ ਸਨ ਤਾਂ ਅਚਾਨਕ ਹੀ ਬੇੜੀ ਡੁੱਬ ਗਈ। ਇਸ ਮੌਕੇ ਲੋਕਾਂ ਨੇ ਬੜੀ ਮੁਸ਼ਕਿਲ ਨਾਲ ਆਪਣੀ ਜਾਨ ਬਚਾਈ।

ਇਸ ਸਬੰਧੀ ਪਿੰਡ ਦੇ ਸਰਪੰਚ ਬੂੜ ਸਿੰਘ ਨੇ ਜਾਣਕਾਰੀ ਦਿੰਦੇ ਹੋਏ ਦੱਸਿਆ ਕਿ ਉਹ ਪਿਛਲੇ ਕਈ ਦਿਨਾਂ ਤੋਂ ਹੜ੍ਹਾਂ ਦੀ ਲਪੇਟ ‘ਚ ਹਨ ਤਾਂ ਹਰ ਰੋਜ਼ ਕੋਈ ਨਾ ਕੋਈ ਬੇੜੀ ਰਾਹੀਂ ਦਰਿਆ ਪਾਰ ਕਰਕੇ ਸ਼ਹਿਰ ਆਪਣੇ ਕੰਮ ਕਾਜ ਆਉਂਦਾ ਹੈ ਤਾਂ ਅੱਜ ਇੱਕ ਔਰਤ ਸਮੇਤ 12 ਜਣੇ ਬੇੜੀ ਰਾਹੀਂ ਦਰਿਆ ਪਾਰ ਕਰ ਰਹੇ ਸਨ ਤਾਂ ਅਚਾਨਕ ਹੀ ਬੇੜੀ ਅੰਦਰ ਪਾਣੀ ਵੜ ਗਿਆ ਅਤੇ ਬੇੜੀ ਡੁੱਬ ਗਈ।

ਉਨ੍ਹਾਂ ਦੱਸਿਆ ਕਿ ਕੁੱਝ ਲੋਕ ਤਾਂ ਤੈਰਨਾ ਜਾਣਦੇ ਸਨ ਅਤੇ ਕੁੱਝ ਦਰਖ਼ੱਤਾਂ ਨੂੰ ਫੜ੍ਹ ਕੇ ਦਰਖ਼ਤਾਂ ਦੇ ਉਪਰ ਚੜ੍ਹ ਗਏ, ਜਿਸਦੇ ਚੱਲਦੇ ਬੜੀ ਮੁਸ਼ਕਿਲ ਨਾਲ ਲੋਕਾਂ ਨੇ ਆਪਣੀ ਜਾਣ ਬਚਾਈ। ਸਰਪੰਚ ਅਤੇ ਹੋਰ ਲੋਕਾਂ ਨੇ ਦੱਸਿਆ ਕਿ ਉਨ੍ਹਾਂ ਦੇ ਕੋਲ ਕੁੱਝ ਸਮਾਨ, ਮੋਬਾਇਲ ਸਨ, ਜਿਨ੍ਹਾਂ ਦਾ ਨੁਕਸਾਨ ਹੋ ਗਿਆ ਹੈ ਅਤੇ ਬੇੜੀ ਡੁੱਬਣ ਦਾ ਕਾਰਨ ਬੇੜੀ ਕੰਡਮ ਸੀ।