ਪਬਜੀ ਰਾਹੀਂ ਦੋਸਤੀ,4 ਬੱਚਿਆਂ ਨੂੰ ਲੈ ਕੇ ਭਾਰਤ ਪਹੁੰਚੀ ਪਾਕਿਸਤਾਨੀ ਔਰਤ

ਨੋਇਡਾ-ਉੱਤਰ ਪ੍ਰਦੇਸ਼ ਦੇ ਨੋਇਡਾ ’ਚ ਇਕ ਅਜਿਹਾ ਮਾਮਲਾ ਸਾਹਮਣੇ ਆਇਆ ਹੈ, ਜਿਸ ਬਾਰੇ ਜਾਣ ਕੇ ਤੁਸੀਂ ਹੈਰਾਨ ਰਹਿ ਜਾਓਗੇ। ਜਿੱਥੇ ਪਬਜੀ ਗੇਮ ਪਾਰਟਨਰ ਨਾਲ ਜ਼ਿੰਦਗੀ ਗੁਜ਼ਾਰਨ ਲਈ ਪਾਕਿਸਤਾਨ ਦੀ ਇਕ ਔਰਤ ਆਪਣੇ 4 ਬੱਚਿਆਂ ਸਮੇਤ 2 ਦੇਸ਼ਾਂ ਦੇ ਬਾਰਡਰ ਪਾਰ ਕਰ ਕੇ ਰਬੂਪੁਰਾ ਕਸਬੇ ’ਚ ਪਹੁੰਚ ਗਈ। ਔਰਤ ਨੇਪਾਲ ਦੇ ਰਸਤੇ ਲੱਗਭਗ ਇਕ ਮਹੀਨਾ ਪਹਿਲਾਂ ਭਾਰਤ ਪਹੁੰਚੀ ਅਤੇ ਰਬੂਪੁਰਾ ਦੇ ਸਚਿਨ ਨਾਲ ਸ਼ੁੱਕਰਵਾਰ ਰਾਤ ਤੱਕ ਰਹੀ। ਸੀਮਾ ਕੋਲ ਭਾਰਤ ’ਚ ਰਹਿਣ ਦਾ ਕੋਈ ਜਾਇਜ਼ ਦਸਤਾਵੇਜ਼ ਨਹੀਂ ਹੈ।

ਭਾਰਤੀ ਨਾਗਰਿਕਤਾ ਹਾਸਲ ਕਰਨ ਲਈ ਨੌਜਵਾਨ ਅਤੇ ਉਕਤ ਔਰਤ ਵਿਆਹ ਕਰਨ ਦੀ ਕੋਸ਼ਿਸ਼ ’ਚ ਸਨ। ਸੂਤਰਾਂ ਮੁਤਾਬਕ ਰਬੂਪੁਰਾ ਦੇ ਅੰਬੇਡਕਰ ਨਗਰ ਨਿਵਾਸੀ ਸਚਿਨ (22) ਦੀ ਕੁਝ ਮਹੀਨੇ ਪਹਿਲਾਂ ਪਬਜੀ ਗੇਮ ਖੇਡਣ ਦੌਰਾਨ ਪਾਕਿਸਤਾਨ ਦੀ ਔਰਤ (ਸੀਮਾ) ਨਾਲ ਦੋਸਤੀ ਹੋ ਗਈ। ਔਰਤ ਕਰਾਚੀ ਦੀ ਰਹਿਣ ਵਾਲੀ ਹੈ ਅਤੇ 4 ਬੱਚਿਆਂ ਦੀ ਮਾਂ ਹੈ।