ਅਮਰੀਕੀ ਅਦਾਲਤ-: ਟਵਿੱਟਰ ਨੂੰ ਆਫ਼ਿਸ ਖਾਲੀ ਕਰਨ ਦੇ ਹੁਕਮ

ਟਵਿੱਟਰ ਨੂੰ ਅਮਰੀਕਾ ਦੀ ਇਕ ਅਦਾਲਤ ਤੋਂ ਵੱਡਾ ਝਟਕਾ ਲੱਗਾ ਹੈ। ਅਦਾਲਤ ਨੇ ਐਲਨ ਮਸਕ ਦੁਆਰਾ ਚਲਾਏ ਜਾ ਰਹੇ ਟਵਿੱਟਰ ਨੂੰ ਕਿਰਾਏ ਦਾ ਭੁਗਤਾਨ ਨਾ ਕਰਨ ‘ਤੇ ਦਫ਼ਤਰ ਦੀ ਬਿਲਡਿੰਗ ਛੱਡਣ ਦਾ ਨਿਰਦੇਸ਼ ਦਿੱਤਾ ਹੈ। ਡੇਨਵਰ ਬਿਜ਼ਨੈੱਸ ਜਰਨਲ ਦੀ ਇਕ ਰਿਪੋਰਟ ਅਨੁਸਾਰ ਟਵਿੱਟਰ ਆਫ਼ਿਸ ਦੇ ਮਕਾਨ ਮਾਲਕ ਨੂੰ ਫਰਵਰੀ 2020 ਵਿੱਚ 9,68,000 ਡਾਲਰ ਦਾ ਲੈਟਰ ਆਫ਼ ਕ੍ਰੈਡਿਟ ਪ੍ਰਦਾਨ ਕੀਤਾ ਗਿਆ ਸੀ। ਮਾਰਚ ‘ਚ ਪੈਸਾ ਖਤਮ ਹੋ ਗਿਆ ਅਤੇ ਮਾਈਕ੍ਰੋ-ਬਲੌਗਿੰਗ ਪਲੇਟਫਾਰਮ ਨੇ ਉਦੋਂ ਤੋਂ ਕਿਰਾਏ ਦਾ ਭੁਗਤਾਨ ਨਹੀਂ ਕੀਤਾ, ਜੋ ਕਿ ਪ੍ਰਤੀ ਮਹੀਨਾ ਲਗਭਗ $27,000 ਹੈ।

ਮਈ ‘ਚ ਮਕਾਨ ਮਾਲਕ ਟਵਿੱਟਰ ਦੇ ਖ਼ਿਲਾਫ਼ ਅਦਾਲਤ ਵਿੱਚ ਗਿਆ ਅਤੇ ਜੱਜ ਨੇ ਆਦੇਸ਼ ਜਾਰੀ ਕੀਤਾ ਕਿ ਸ਼ੈਰਿਫ ਨੂੰ 49 ਦਿਨਾਂ ਦੇ ਅੰਦਰ ਟਵਿੱਟਰ ਨੂੰ ਹਟਾਉਣਾ ਹੋਵੇਗਾ। ਜਨਤਕ ਛਾਂਟੀ ਤੋਂ ਪਹਿਲਾਂ ਟਵਿੱਟਰ ਦਫ਼ਤਰ ਨੇ ਘੱਟੋ-ਘੱਟ 300 ਕਰਮਚਾਰੀਆਂ ਨੂੰ ਨਿਯੁਕਤ ਕੀਤਾ ਸੀ। ਟਵਿੱਟਰ ‘ਤੇ ਜਨਵਰੀ ਵਿੱਚ ਮੁਕੱਦਮਾ ਕੀਤਾ ਗਿਆ ਸੀ ਕਿਉਂਕਿ ਇਹ ਸਾਨ ਫਰਾਂਸਿਸਕੋ ‘ਚ ਆਪਣੇ ਆਫ਼ਿਸ ਦੀ ਜਗ੍ਹਾ ਦੇ ਕਿਰਾਏ ‘ਚ $136,250 ਦਾ ਭੁਗਤਾਨ ਕਰਨ ਵਿੱਚ ਅਸਫਲ ਰਿਹਾ ਸੀ।

ਮਕਾਨ ਮਾਲਕ ਨੇ ਪਿਛਲੇ ਸਾਲ 16 ਦਸੰਬਰ ਨੂੰ ਕੰਪਨੀ ਨੂੰ ਸੂਚਿਤ ਕੀਤਾ ਸੀ ਕਿ ਜੇਕਰ ਕਿਰਾਏ ਦਾ ਭੁਗਤਾਨ ਨਾ ਕੀਤਾ ਗਿਆ ਤਾਂ ਉਹ ਹਾਰਟਫੋਰਡ ਬਿਲਡਿੰਗ ਦੀ 30ਵੀਂ ਮੰਜ਼ਿਲ ਲਈ 5 ਦਿਨਾਂ ਵਿੱਚ ਲੀਜ਼ ‘ਤੇ ਡਿਫਾਲਟ ਹੋ ਜਾਵੇਗੀ। ਫਰਵਰੀ ਵਿੱਚ ਟਵਿੱਟਰ ਨੇ ਭਾਰਤ ਵਿੱਚ ਆਪਣੇ 3 ‘ਚੋਂ 2 ਦਫ਼ਤਰਾਂ ਨੂੰ ਬੰਦ ਕਰ ਦਿੱਤਾ ਅਤੇ ਕਰਮਚਾਰੀਆਂ ਨੂੰ ਘਰੋਂ ਕੰਮ ਕਰਨ ਲਈ ਕਿਹਾ। ਕੰਪਨੀ ਨੇ ਆਪਣਾ ਸਿੰਗਾਪੁਰ ਦਫ਼ਤਰ ਵੀ ਬੰਦ ਕਰ ਦਿੱਤਾ ਹੈ।