ਰਾਮ ਰਹੀਮ ਨੇ ਸੁਨਾਰੀਆ ਜੇਲ੍ਹ ‘ਚੋਂ ਲਿਖੀ ਚਿੱਠੀ, ਸੰਗਤ ਨੂੰ ਕਹੀਆਂ ਇਹ ਗੱਲਾਂ

ਸਿਰਸਾ – ਡੇਰਾ ਸੱਚਾ ਸੌਦਾ ’ਚ ਸਥਾਪਨਾ ਦਿਵਸ ਮੌਕੇ ਪ੍ਰੋਗਰਾਮ ਦਾ ਆਯੋਜਨ ਕੀਤਾ ਗਿਆ। ਸਿਰਸਾ ਡੇਰੇ ’ਚ ਹੋਏ ਇਸ ਪ੍ਰੋਗਰਾਮ ’ਚ ਹਰਿਆਣਾ, ਪੰਜਾਬ, ਰਾਜਸਥਾਨ ਸਣੇ ਸੂਬਿਆਂ ਤੋਂ ਵੱਡੀ ਗਿਣਤੀ ’ਚ ਸੰਗਤਾਂ ਪੁੱਜੀਆਂ। ਇਸ ਦੌਰਾਨ ਰੋਹਤਕ ਦੀ ਸੁਨਾਰੀਆ ਜੇਲ੍ਹ ’ਚੋਂ ਆਈ ਗੁਰਮੀਤ ਰਾਮ ਰਹੀਮ ਦੀ ਚਿੱਠੀ ਸੰਗਤ ਨੂੰ ਪੜ੍ਹ ਕੇ ਸੁਣਾਈ ਗਈ। ਚਿੱਠੀ ’ਚ ਆਪਣੀ ਸੰਗਤ ਨੂੰ ਗੁਰਮੀਤ ਰਾਮ ਰਹੀਮ ਨੇ ਏਕਤਾ ਬਣਾਈ ਰੱਖਣ ਤੇ ਏਕੇ ’ਚ ਰਹਿਣ ਦਾ ਸੰਦੇਸ਼ ਭੇਜਿਆ ਹੈ।

ਰਾਮ ਰਹੀਮ ਨੇ ਸੰਗਤਾਂ ਨੂੰ ਆਖਿਆ ਹੈ ਕਿ ਤੁਸੀਂ ਆਪਣੇ ਗੁਰੂ ਦੇ ਹੀ ਬਣ ਕੇ ਰਹਿਣਾ ਹੈ। ਗੁਰੂ ਹੋਣ ਦੇ ਨਾਤੇ ਮੇਰੇ ਵਲੋ ਹੀ ਤੁਹਾਡਾ ਮਾਰਗਦਰਸ਼ਨ ਕੀਤਾ ਜਾਵੇਗਾ। ਇਸ ਮੌਕੇ ਰਾਮ ਰਹੀਮ ਨੇ ਸੰਗਤ ਨੂੰ 157ਵਾਂ ਮਾਨਵਤਾ ਭਲਾਈ ਦਾ ਨਵਾਂ ਕੰਮ ਸ਼ੁਰੂ ਕਰਨ ਲਈ ਕਿਹਾ ਸੀ। ਡੇਰਾ ਪ੍ਰਬੰਧਕਾਂ ਵੱਲੋਂ ਉੱਤਮ ਸੰਸਕਾਰ ਦਾ ਨਵਾਂ ਕੰਮ ਸੰਗਤਾਂ ਨੂੰ ਨਾਰਾ ਲਵਾ ਕੇ ਸ਼ੁਰੂ ਕਰਵਾਇਆ ਗਿਆ। ਇਸ ਤਹਿਤ ਡੇਰੇ ਦੀ ਸੰਗਤ ਹਰ ਹਫਤੇ ਦੇ 3 ਦਿਨ ਛੋਟੇ ਬੱਚਿਆਂ ਨੂੰ ਮਾਨਵਤਾ ਭਲਾਈ ਦੇ ਕੰਮਾਂ ਬਾਰੇ ਜਾਣੂ ਕਰਵਾੲਗੀ।

ਇਸ ਮੌਕੇ 75 ਲੋੜਵੰਦ ਪਰਿਵਾਰਾਂ ਨੂੰ ਡੇਰਾ ਦੇ ਫੂਡ ਬੈਂਕ ਵਲੋ ਰਾਸ਼ਨ ਤੇ ਕੱਪੜੇ ਵੰਡੇ ਗਏ। ਡੇਰੇ ’ਚ ਸਥਾਪਨਾ ਦਿਵਸ ’ਤੇ ਪ੍ਰੋਗਰਾਮ ਨੂੰ ਲੈ ਕੇ ਪੁਲਸ ਵਲੋਂ ਸੁਰੱਖਿਆ ਦੇ ਪੂਰੇ ਇੰਤਜ਼ਾਮ ਕੀਤੇ ਗਏ ਸਨ।