ICICI ਬੈਂਕ ਦਾ ਏਕੀਕ੍ਰਿਤ ਸ਼ੁੱਧ ਲਾਭ ਮਾਰਚ ਤਿਮਾਹੀ ‘ਚ 27 ਫ਼ੀਸਦੀ ਵਧਿਆ

ਮੁੰਬਈ- ਨਿੱਜੀ ਖੇਤਰ ਦੇ ਆਈ.ਸੀ.ਆਈ.ਸੀ.ਆਈ. ਬੈਂਕ ਨੇ ਸ਼ਨੀਵਾਰ ਨੂੰ ਕਿਹਾ ਕਿ ਵਿੱਤੀ ਸਾਲ 2022-23 ਦੀ ਮਾਰਚ ਤਿਮਾਹੀ ਲਈ ਉਸ ਦਾ ਏਕੀਕ੍ਰਿਤ ਸ਼ੁੱਧ ਲਾਭ ਸਾਲਾਨਾ ਆਧਾਰ ‘ਤੇ 27.64 ਫੀਸਦੀ ਵਧ ਕੇ 9,852.70 ਕਰੋੜ ਰੁਪਏ ਹੋ ਗਿਆ ਹੈ। ਸਟੈਂਡਅਲੋਨ ਆਧਾਰ ‘ਤੇ ਸਭ ਤੋਂ ਵੱਡੇ ਨਿੱਜੀ ਖੇਤਰ ਦੇ ਬੈਂਕ ਦਾ ਸ਼ੁੱਧ ਲਾਭ ਮਾਰਚ ਤਿਮਾਹੀ ‘ਚ ਲਗਭਗ 30 ਫੀਸਦੀ ਵਧ ਕੇ 9,121.87 ਕਰੋੜ ਰੁਪਏ ਹੋ ਗਿਆ।

ਸਮੀਖਿਆ ਅਧੀਨ ਤਿਮਾਹੀ ‘ਚ ਆਈ.ਸੀ.ਆਈ.ਸੀ.ਆਈ. ਬੈਂਕ ਦੀ ਕੁੱਲ ਆਮਦਨ 36,108.88 ਕਰੋੜ ਰੁਪਏ ਰਹੀ, ਜੋ ਇਕ ਸਾਲ ਪਹਿਲਾਂ ਦੀ ਮਿਆਦ ‘ਚ 27,412.32 ਕਰੋੜ ਰੁਪਏ ਸੀ। ਬੈਂਕ ਦਾ ਕੁੱਲ ਖਰਚ ਸਾਲਾਨਾ ਆਧਾਰ ‘ਤੇ 17,119.38 ਕਰੋੜ ਰੁਪਏ ਤੋਂ ਵਧ ਕੇ 22,282.50 ਕਰੋੜ ਰੁਪਏ ਹੋ ਗਿਆ। ਬੈਂਕ ਨੇ ਦੱਸਿਆ ਕਿ 31 ਮਾਰਚ, 2023 ਤੱਕ ਕੁੱਲ ਕਰਜ਼ਿਆਂ ‘ਚ ਕੁੱਲ ਗੈਰ-ਕਾਰਗੁਜ਼ਾਰੀ ਸੰਪਤੀਆਂ (ਐੱਨਪੀਏ) ਦਾ ਹਿੱਸਾ 2.81 ਫੀਸਦੀ ਸੀ। ਇਹ ਅੰਕੜਾ ਇਕ ਸਾਲ ਪਹਿਲਾਂ ਦੀ ਇਸੇ ਮਿਆਦ ‘ਚ 3.60 ਫੀਸਦੀ ਅਤੇ ਦਸੰਬਰ 2022 ਦੀ ਤਿਮਾਹੀ ‘ਚ 3.07 ਫੀਸਦੀ ਸੀ।