ਪਾਕਿਸਤਾਨ: ਕੋਲਾ ਖਾਨ ‘ਚ ਮਿਥੇਨ ਧਮਾਕੇ ਵਿੱਚ 6 ਮਜ਼ਦੂਰਾਂ ਦੀ ਮੌਤ
March 4, 2023
![](http://mehakewattan.com/wp-content/uploads/2023/03/2023_3image_00_05_3382097879-ll.jpg)
ਦੱਖਣੀ-ਪੱਛਮੀ ਪਾਕਿਸਤਾਨ ‘ਚ ਕੋਲਾ ਖਾਨ ਦੇ ਇਕ ਹਿੱਸੇ ‘ਚ ਮਿਥੇਨ ਧਮਾਕਾ ਹੋਣ ਕਾਰਨ 6 ਮਜ਼ਦੂਰਾਂ ਦੀ ਮੌਤ ਹੋ ਗਈ ਅਤੇ 5 ਦੇ ਜ਼ਖ਼ਮੀ ਹੋਣ ਦੀ ਖ਼ਬਰ ਹੈ। ਅਧਿਕਾਰੀਆਂ ਨੇ ਸ਼ੁੱਕਰਵਾਰ ਨੂੰ ਇਹ ਜਾਣਕਾਰੀ ਦਿੱਤੀ। ਮਾਈਨਜ਼ ਇੰਸਪੈਕਟਰ ਮੁਹੰਮਦ ਅਕਰਮ ਨੇ ਦੱਸਿਆ ਕਿ ਇਹ ਧਮਾਕਾ ਵੀਰਵਾਰ ਨੂੰ ਦੱਖਣੀ-ਪੱਛਮੀ ਬਲੋਚਿਸਤਾਨ ਸੂਬੇ ਦੇ ਹਰਨਈ ਜ਼ਿਲ੍ਹੇ ‘ਚ ਹੋਇਆ।
ਬਚਾਅ ਟੀਮਾਂ ਨੂੰ ਫਸੇ ਮਜ਼ਦੂਰਾਂ ਤੱਕ ਪਹੁੰਚਣ ਅਤੇ ਧਮਾਕੇ ‘ਚ ਮਾਰੇ ਗਏ ਲੋਕਾਂ ਦੀਆਂ ਲਾਸ਼ਾਂ ਨੂੰ ਕੱਢਣ ਵਿੱਚ 24 ਘੰਟੇ ਲੱਗ ਗਏ। ਪਾਕਿਸਤਾਨੀ ਕੋਲਾ ਖਾਨ ਦੇ ਕਾਮੇ ਅਕਸਰ ਸ਼ਿਕਾਇਤ ਕਰਦੇ ਹਨ ਕਿ ਖਾਨ ਮਾਲਕ ਸੁਰੱਖਿਆ ਸਾਵਧਾਨੀ ਵਰਤਣ ਅਤੇ ਜ਼ਰੂਰੀ ਸਾਜ਼ੋ-ਸਾਮਾਨ ਲਗਾਉਣ ਵਿੱਚ ਅਸਫਲ ਰਹਿੰਦੇ ਹਨ। ਹਾਲਾਂਕਿ, ਖ਼ਤਰੇ ਅਤੇ ਘੱਟ ਮਜ਼ਦੂਰੀ ਦੇ ਬਾਵਜੂਦ ਹਜ਼ਾਰਾਂ ਮਜ਼ਦੂਰ ਬਲੋਚਿਸਤਾਨ ਦੀਆਂ ਖਾਨਾਂ ਵਿੱਚ ਕੰਮ ਕਰਨਾ ਜਾਰੀ ਰੱਖਦੇ ਹਨ, ਜਿੱਥੇ ਪਾਕਿਸਤਾਨ ਦੇ ਦੂਜੇ ਹਿੱਸਿਆਂ ਨਾਲੋਂ ਬੇਰੁਜ਼ਗਾਰੀ ਵੱਧ ਹੈ।