ਪਾਕਿਸਤਾਨ ’ਚ ਕੈਨੇਡਾ ਦੀ ਮਸ਼ਹੂਰ ਕੌਫੀ ਸ਼ਾਪ ਖੁੱਲ੍ਹਣ ’ਤੇ ਲੱਗੀ ਲੋਕਾਂ ਦੀ ਲੰਮੀ ਲਾਈਨ

ਲਾਹੌਰ – ਸੋਸ਼ਲ ਮੀਡੀਆ ’ਤੇ ਇਕ ਵੀਡੀਓ ਵਾਇਰਲ ਹੋ ਰਹੀ ਹੈ, ਜੋ ਪਾਕਿਸਤਾਨ ਦੀ ਦੱਸੀ ਜਾ ਰਿਹਾ ਹੈ। ਵੀਡੀਓ ’ਚ ਲਾਹੌਰ ’ਚ ਮਸ਼ਹੂਰ ਕੈਨੇਡੀਅਨ ਕੌਫੀ ਸ਼ਾਪ ਦੇ ਖੁੱਲ੍ਹਣ ’ਤੇ ਲੰਮੀ ਲਾਈਨ ਲੱਗੀ ਦਿਖਾਈ ਦੇ ਰਹੀ ਹੈ, ਜਿਸ ਦੀ ਕਾਫੀ ਚਰਚਾ ਹੋ ਰਹੀ ਹੈ।

ਦਰਅਸਲ ਇਕ ਪਾਸੇ ਜਿਥੇ ਪਾਕਿਸਤਾਨ ’ਚ ਮਹਿੰਗਾਈ ਤੇ ਬੇਰੁਜ਼ਗਾਰੀ ਆਪਣੇ ਸਿਖਰ ’ਤੇ ਹੈ, ਉਥੇ ਦੂਜੇ ਪਾਸੇ ਲੋਕ ਮਹਿੰਗੀ ਕੌਫੀ ਦਾ ਆਨੰਦ ਲੈਣ ਲਈ ਲੰਮੀ ਲਾਈਨ ’ਚ ਖੜ੍ਹੇ ਹਨ। ਤੁਹਾਨੂੰ ਦੱਸ ਦੇਈਏ ਕਿ ਪਾਕਿਸਤਾਨ ’ਚ ਮੌਜੂਦਾ ਮਹਿੰਗਾਈ ਦਰ 45 ਸਾਲਾਂ ’ਚ ਸਭ ਤੋਂ ਵੱਧ ਹੈ ਤੇ ਰੋਜ਼ਾਨਾ ਵਰਤੋਂ ’ਚ ਆਉਂਦੀਆਂ ਚੀਜ਼ਾਂ ਬਹੁਤ ਮਹਿੰਗੀਆਂ ਹੋ ਗਈਆਂ ਹਨ।

ਇਸ ਵਾਇਰਲ ਵੀਡੀਓ ’ਚ ਦੇਖਿਆ ਜਾ ਰਿਹਾ ਹੈ ਕਿ ਕਿਵੇਂ ਲੋਕ ਕੈਨੇਡੀਅਨ ਕੌਫੀ ਸ਼ਾਪ ਦੇ ਨਵੇਂ ਸਟੋਰ ’ਚ ਲੰਮੀ ਲਾਈਨ ਲਗਾ ਕੇ ਕੌਫੀ ਦਾ ਮਜ਼ਾ ਲੈਣਾ ਚਾਹੁੰਦੇ ਹਨ। ਵੀਡੀਓ ’ਚ ਦੇਖਿਆ ਜਾ ਰਿਹਾ ਹੈ ਕਿ ਲੋਕ ਦੁਕਾਨ ਦੇ ਅੰਦਰ ਬੈਠੇ ਹਨ ਤੇ ਵੱਡੀ ਗਿਣਤੀ ’ਚ ਲੋਕ ਸਟੋਰ ਦੇ ਬਾਹਰ ਵੀ ਲਾਈਨ ’ਚ ਖੜ੍ਹੇ ਹਨ। ਦਰਅਸਲ ਕੈਨੇਡਾ ਦੇ ਮਸ਼ਹੂਰ ਕੌਫੀ ਬ੍ਰਾਂਡ ਟਿਮ ਹਾਰਟਨਸ ਨੇ ਪਾਕਿਸਤਾਨ ਦੇ ਲਾਹੌਰ ’ਚ ਦੇਸ਼ ’ਚ ਇਕ ਨਵਾਂ ਤੇ ਆਪਣਾ ਪਹਿਲਾ ਕੌਫੀ ਸਟੋਰ ਖੋਲ੍ਹਿਆ ਹੈ। ਅਜਿਹੇ ’ਚ ਆਊਟਲੈੱਟ ਖੁੱਲ੍ਹਣ ਤੋਂ ਬਾਅਦ ਉਥੇ ਲੋਕਾਂ ਦੀ ਭੀੜ ਇਕੱਠੀ ਹੋ ਗਈ ਤੇ ਜਲਦ ਹੀ ਲੋਕਾਂ ਦੀ ਗਿਣਤੀ ਇੰਨੀ ਵੱਧ ਗਈ ਕਿ ਸਟੋਰ ਦੇ ਬਾਹਰ ਵੀ ਲਾਈਨਾਂ ਲੱਗ ਗਈਆਂ।