IND vs PAK : ਏਸ਼ੀਆ ਕੱਪ ‘ਚ ਪਾਕਿ ਨੂੰ ਅੱਠ ਵਾਰ ਹਰਾ ਚੁੱਕਾ ਹੈ ਭਾਰਤ, ਜਾਣੋ ਰਿਕਾਰਡ

ਭਾਰਤ ਤੇ ਪਾਕਿਸਤਾਨ ਦਾ ਮੈਚ ਕ੍ਰਿਕਟ ਪ੍ਰਸ਼ੰਸਕਾਂ ਦੀ ਪਹਿਲੀ ਪਸੰਦ ਰਿਹਾ ਹੈ। ਭਾਵੇਂ ਉਹ ਏਸ਼ੀਆ ਕੱਪ ਹੋਵੇ ਜਾਂ ਵਿਸ਼ਵ ਕੱਪ ਜਾਂ ਫਿਰ ਕੋਈ ਹੋਰ ਫਾਰਮੈਟ। 10 ਮਹੀਨਿਆਂ ਬਾਅਦ 28 ਅਗਸਤ ਨੂੰ ਦੁਬਈ ‘ਚ ਏਸ਼ੀਆ ਕੱਪ ‘ਚ ਦੋਵੇਂ ਦੇਸ਼ ਆਹਮੋ-ਸਾਹਮਣੇ ਹੋਣਗੇ। ਇਸ ਤੋਂ ਪਹਿਲਾਂ ਦੋਵੇਂ ਇਸ ਮੈਦਾਨ ‘ਤੇ 24 ਅਕਤੂਬਰ 2021 ‘ਚ ਟੀ20 ਵਿਸ਼ਵ ਕੱਪ ਖੇਡੇ ਸਨ, ਜਿਸ ‘ਚ ਪਾਕਿਸਤਾਨ ਨੂੰ 10 ਵਿਕਟਾਂ ਨਾਲ ਜਿੱਤ ਮਿਲੀ ਸੀ। ਦੂਜੇ ਪਾਸੇ ਏਸ਼ੀਆ ਕੱਪ ਟੂਰਨਾਮੈਂਟ ‘ਚ ਭਾਰਤ-ਪਾਕਿ ਵਿਚਾਲੇ ਮੈਚਾਂ ਦੀ ਗੱਲ ਕਰੀਏ ਤਾਂ ਟੀਮ ਇੰਡੀਆ ਦਾ ਇੱਥੇ ਪਲੜਾ ਭਾਰੀ ਹੈ। ਉਸ ਨੇ 14 ਮੈਚਾਂ ‘ਚ 8 ‘ਚ ਜਿੱਤ ਦਰਜ ਕੀਤੀ ਹੈ, ਜਦਕਿ ਪਾਕਿ ਨੂੰ ਪੰਜ ‘ਚ ਜਿੱਤ ਮਿਲੀ ਹੈ।

ਸਭ ਦੋਂ ਅਹਿਮ ਗੱਲ ਇਹ ਹੈ ਕਿ ਏਸ਼ੀਆ ਕੱਪ ‘ਚ ਬਾਅਦ ‘ਚ ਬੱਲੇਬਾਜ਼ੀ ਕਰਨ ਵਾਲੀ ਟੀਮ ਜ਼ਿਆਦਾ ਫਾਇਦੇ ‘ਚ ਰਹੀ ਹੈ ਟੀਚੇ ਦਾ ਪਿੱਛਾ ਕਰਦੇ ਹੋਏ ਭਾਰਤ ਨੇ 7 ਤੇ ਪਾਕਿਸਤਾਨ ਨੇ 3 ਵਾਰ ਜਿੱਤ ਦਰਜ ਕੀਤੀ ਹੈ। ਭਾਰਤ-ਪਾਕਿ ਮੁਕਾਬਲੇ ਤੋਂ ਇਲਾਵਾ ਵੈਸੇ ਵੀ ਏਸ਼ੀਆ ਕੱਪ ‘ਚ ਭਾਰਤ ਸਰਵਸ੍ਰੇਸ਼ਠ ਟੀਮ ਰਹੀ ਹੈ। ਭਾਰਤ 7 ਵਾਰ ਜੇਤੂ ਰਿਹਾ ਹੈ, ਜਦਕਿ ਤਿੰਨ ਵਾਰ ਉਪਜੇਤੂ ਰਿਹਾ ਹੈ, ਜਦਕਿ ਪਾਕਿਸਤਾਨ ਤਿੰਨ ਵਾਰ ਉਪਜੇਤੂ ਰਿਹਾ ਹੈ। ਪਾਕਿਸਤਾਨ ਨੇ ਦੋ ਵਾਰ ਖਿਤਾਬ ਜਿੱਤੇ ਹਨ।

ਅਜੇ ਤਕ ਫਾਈਨਲ ‘ਚ ਨਹੀਂ ਖੇਡੇ ਭਾਰਤ-ਪਾਕਿ

ਏਸ਼ੀਆ ਕੱਪ ‘ਚ ਭਾਰਤ-ਪਾਕਿ ਇਕ ਵਾਰ ਵੀ ਫਾਈਨਲ ‘ਚ ਨਹੀਂ ਖੇਡੇ ਹਨ। ਭਾਰਤ ਨੇ ਕੁਲ 10 ਫਾਈਨਲ ਖੇਡੇ ਹਨ। ਇਨ੍ਹਾਂ ‘ਚੋਂ ਅੱਠ ਖ਼ਿਤਾਬੀ ਮੁਕਾਬਲੇ ਸ਼੍ਰੀਲੰਕਾ ਨਾਲ ਹੋਏ ਹਨ। ਭਾਰਤ ਨੇ ਪੰਜ ਤਾਂ ਸ਼੍ਰੀਲੰਕਾ ਨੇ ਤਿੰਨ ਵਾਰ ਜਿੱਤ ਦਰਜ ਕੀਤੀ ਹੈ। ਇਸ ਤੋਂ ਇਲਾਵਾ ਪਿਛਲੇ ਦੋ ਫਾਈਨਲ ਭਾਰਤ ਤੇ ਬੰਗਲਾਦੇਸ਼ ਦਰਮਿਆਨ ਹੋਏ ਹਨ। ਇਨ੍ਹਾਂ ‘ਚੋਂ ਭਾਰਤ ਦੋਵੇਂ ਵਾਰ ਜੇਤੂ ਰਿਹਾ। ਪਾਕਿਸਤਾਨ ਚਾਰ ਵਾਰ ਫਾਈਨਲ ਖੇਡ ਚੁੱਕਾ ਹੈ। ਇਨ੍ਹਾਂ ‘ਚੋਂ ਦੋ ਵਾਰ ਜੇਤੂ ਤਾਂ ਦੋ ਵਾਰ ਉਪ ਜੇਤੂ ਬਣਿਆ ਹੈ। ਪਾਕਿਸਤਾਨ ਦਾ ਚਾਰੋਂ ਵਾਰ ਫਾਈਨਲ ਮੈਚ ਸ਼੍ਰੀਲੰਕਾ ਨਾਲ ਹੋਇਆ ਹੈ।

ਤਿੰਨ ਵਾਰ ਹੋ ਸਕਦੇ ਹਨ ਭਾਰਤ-ਪਾਕਿ ਆਹਮੋ-ਸਾਹਮਣੇ

6 ਟੀਮਾਂ ਦੇ ਏਸ਼ੀਆ ਕੱਪ ‘ਚ ਭਾਰਤ ਤੇ ਪਾਕਿਸਤਾਨ ਗਰੁੱਪ ਏ ‘ਚ ਹਨ। ਜਦਕਿ ਇਕ ਟੀਮ ਕੁਆਲੀਫਾਇਰ ਤੋਂ ਆਵੇਗੀ। ਗਰੁੱਪ ਬੀ ‘ਚ ਸ਼੍ਰੀਲੰਕਾ, ਬੰਗਲਾਦੇਸ਼ ਤੇ ਅਫਗਾਨਿਸਤਾਨ ਹਨ। ਹਰ ਗਰੁੱਪ ਦੀਆਂ ਦੋ ਟੀਮਾਂ ਸੁਪਰ-4 ‘ਚ ਪ੍ਰਵੇਸ਼ ਕਰਨਗੀਆਂ। ਗਰੁੱਪ ‘ਚ ‘ਚ ਤੀਜੀ ਕੁਆਲੀਫਾਇਰ ਟੀਮ ਟੀਮ ਯੂ. ਏ. ਈ., ਹਾਂਗਕਾਂਗ, ਸਿੰਗਾਪੁਰ ਤੇ ਕੁਵੈਤ ‘ਚੋਂ ਇਕ ਹੋਵੇਗੀ। ਕੋਈ ਵੱਡਾ ਉਲਟਫੇਰ ਨਹੀਂ ਹੋਇਆ ਤਾਂ ਭਾਰਤ ਤੇ ਪਾਕਿਸਤਾਨ ਸੁਪਰ-4 ‘ਚ ਆਸਾਨੀ ਨਾਲ ਪੁੱਜ ਜਾਣਗੇ।

ਸੁਪਰ-4 ‘ਚ ਹਰ ਟੀਮ ਇਕ-ਦੂਜੇ ਨਾਲ ਮੈਚ ਖੇਡੇਗੀ। ਅਜਿਹੇ ‘ਚ ਭਾਰਤ ਤੇ ਪਾਕਿਸਤਾਨ ਦਰਮਿਆਨ ਦੂਜਾ ਮੁਕਾਬਲਾ ਸੁਪਰ-4 ‘ਚ ਵੀ ਦੇਖਣ ਨੂੰ ਮਿਲੇਗਾ। ਚੋਟੀ ਦੀਆਂ ਦੋ ਟੀਮਾਂ ਦਾ ਫਾਈਨਲ ਹੋਵੇਗਾ। ਭਾਰਤ ਤੇ ਪਾਕਿਸਤਾਨ ਹੋਰਨਾਂ ਦੇਸ਼ਾਂ ਦੇ ਮੁਕਾਬਲੇ ਕਾਫ਼ੀ ਮਜ਼ਬੂਤ ਟੀਮਾਂ ਹਨ। ਇਸ ਲਈ ਪੂਰੇ ਆਸਾਰ ਹਨ ਕਿ ਇਸ ਵਾਰ ਖ਼ਿਤਾਬੀ ਜੰਗ ਭਾਰਤ ਤੇ ਪਾਕਿਸਤਾਨ ਦਰਮਿਆਨ ਦੇਖਣ ਨੂੰ ਮਿਲੇਗੀ। ਜੇਕਰ ਅਜਿਹਾ ਹੋਇਆ ਤਾਂ ਇਕ ਹੀ ਟੂਰਨਾਮੈਂਟ ‘ਚ ਭਾਰਤ-ਪਾਕਿ ਦੇ ਤਿੰਨ ਮੁਕਾਬਲੇ ਹੋ ਸਕਦੇ ਹਨ।