ਚੇਨਈ ਓਪਨ : ਅੰਕਿਤਾ ਰੈਨਾ ਨੂੰ ਮਹਿਲਾ ਸਿੰਗਲਜ਼ ਦੇ ਡਰਾਅ ‘ਚ ਵਾਈਲਡ ਕਾਰਡ ਮਿਲਿਆ

ਚੇਨਈ, – ਭਾਰਤ ਦੀ ਚੋਟੀ ਦੀ ਮਹਿਲਾ ਸਿੰਗਲਜ਼ ਖਿਡਾਰਨ ਅੰਕਿਤਾ ਰੈਨਾ ਨੂੰ ਮੰਗਲਵਾਰ ਨੂੰ 12 ਤੋਂ 18 ਸਤੰਬਰ ਤੱਕ ਹੋਣ ਵਾਲੇ ਚੇਨਈ ਓਪਨ ਟੈਨਿਸ ਲਈ ਵਾਈਲਡ ਕਾਰਡ ਦਿੱਤਾ ਗਿਆ। ਡਬਲਯੂ. ਟੀ. ਏ. 250 ਪੱਧਰ ਦੇ ਟੂਰਨਾਮੈਂਟ ਵਿੱਚ 29 ਸਾਲਾ ਅੰਕਿਤਾ ਦੇ ਨਾਲ 2014 ਦੀ ਵਿੰਬਲਡਨ ਰਨਰ-ਅੱਪ ਕੈਨੇਡਾ ਦੀ ਯੂਜਿਨੀ ਬੂਚਾਰਡ ਨੂੰ ਵੀ ਵਾਈਲਡ ਕਾਰਡ ਦਿੱਤਾ ਗਿਆ ਹੈ।

ਤਾਮਿਲਨਾਡੂ ਟੈਨਿਸ ਐਸੋਸੀਏਸ਼ਨ (ਟੀ. ਐਨ. ਟੀ. ਏ. ) ਦੇ ਪ੍ਰਧਾਨ ਅਤੇ ਸਾਬਕਾ ਭਾਰਤੀ ਖਿਡਾਰੀ ਵਿਜੇ ਅਮ੍ਰਿੰਤਰਾਜ ਨੇ ਇੱਥੇ ਇੱਕ ਪ੍ਰੈਸ ਕਾਨਫਰੰਸ ਵਿੱਚ ਕਿਹਾ, “ਅੰਕਿਤਾ ਅਤੇ ਬੂਚਾਰਡ ਨੂੰ 32 ਖਿਡਾਰੀਆਂ ਦੇ ਮੁੱਖ ਸਿੰਗਲ ਡਰਾਅ ਲਈ ਵਾਈਲਡ ਕਾਰਡ ਦਿੱਤੇ ਗਏ ਹਨ।”ਬਾਕੀ ਦੋ (ਵਾਈਲਡ ਕਾਰਡ) ਟਾਪ-20 ਵਿੱਚ ਕਿਸੇ ਵੀ ਖਿਡਾਰੀ ਨੂੰ ਦਿੱਤੇ ਜਾਣਗੇ ਜੋ ਇੱਥੇ ਆ ਕੇ ਖੇਡਣ ਲਈ ਤਿਆਰ ਹਨ।’ 

ਅੰਮ੍ਰਿਤਰਾਜ ਨੇ ਕਿਹਾ ਕਿ ਡਬਲਯੂ. ਟੀ. ਏ ਨਿਯਮਾਂ ਦੇ ਮੁਤਾਬਕ ਰੈਨਾ ਅਤੇ ਬੂਚਾਰਡ ਦੋਵਾਂ ਨੂੰ ਮਹਿਲਾ ਸਿੰਗਲ ਡਰਾਅ ‘ਚ ਵਾਈਲਡ ਕਾਰਡ ਦਿੱਤੇ ਗਏ ਹਨ। ਇਸ ਦੌਰਾਨ ਸ਼ਰਮਦਾ ਬਾਲੂ ਅਤੇ ਰੀਆ ਭਾਟੀਆ ਦੀ ਭਾਰਤੀ ਜੋੜੀ ਨੂੰ ਡਬਲਜ਼ ਡਰਾਅ ਵਿੱਚ ਵਾਈਲਡ ਕਾਰਡ ਮਿਲਿਆ ਹੈ।”ਅੰਮ੍ਰਿਤਰਾਜ ਨੇ ਕਿਹਾ ਕਿ ਉਹ ਇਸ ਗੱਲ ਦੀ ਪੁਸ਼ਟੀ ਨਹੀਂ ਕਰ ਸਕਦੇ ਕਿ ਧਾਕੜ ਟੈਨਿਸ ਖਿਡਾਰਨ ਸਾਨੀਆ ਮਿਰਜ਼ਾ ਇਸ ਟੂਰਨਾਮੈਂਟ ਦਾ ਹਿੱਸਾ ਬਣੇਗੀ ਜਾਂ ਨਹੀਂ। ਸਾਨੀਆ ਨੇ ਪੈਰ ‘ਚ ਸੱਟ ਕਾਰਨ ਯੂ. ਐੱਸ. ਓਪਨ ਤੋਂ ਨਾਂ ਵਾਪਸ ਲੈ ਲਿਆ ਹੈ। 

ਸਾਨੀਆ ਪੈਰ ਦੀ ਸੱਟ ਕਾਰਨ ਯੂਐਸ ਓਪਨ ਤੋਂ ਹਟ ਗਈ ਹੈ। ਵਿਸ਼ਵ ਦੀ ਸਾਬਕਾ ਨੰਬਰ ਚਾਰ ਕੈਰੋਲਿਨ ਗਾਰਸੀਆ ਦੇ ਸਿੰਗਲ ਡਰਾਅ ‘ਚ ਚੋਟੀ ਦਾ ਦਰਜਾ ਪ੍ਰਾਪਤ ਹੋਣ ਦੀ ਸੰਭਾਵਨਾ ਹੈ। ਉਸ ਨੇ ਹਾਲ ਹੀ ਵਿੱਚ ਪੇਤਰਾ ਕਵੀਤੋਵਾ ਨੂੰ ਹਰਾ ਕੇ ਸਿਨਸਿਨਾਟੀ ਮਾਸਟਰਜ਼ ਖਿਤਾਬ ਨਾਲ ਰੈਂਕਿੰਗ ਵਿੱਚ ਸਿਖਰਲੇ 20 ਵਿੱਚ ਵਾਪਸੀ ਕੀਤੀ ਹੈ। ਵਿਸ਼ਵ ਦੀ 29ਵੇਂ ਨੰਬਰ ਦੀ ਖਿਡਾਰਨ ਐਲੀਸਨ-ਰਿਸਕੇ ਅਤੇ ਬੈਲਜੀਅਮ ਦੀ ਐਲਿਸ ਮਰਟੇਨਸ (ਵਿਸ਼ਵ ਰੈਂਕਿੰਗ 32) ਟੂਰਨਾਮੈਂਟ ਵਿੱਚ ਹਿੱਸਾ ਲੈਣ ਵਾਲੀਆਂ ਹੋਰ ਚੋਟੀ ਦੀਆਂ ਖਿਡਾਰੀਆਂ ਵਿੱਚ ਸ਼ਾਮਲ ਹਨ।