ਚੀਨ ਬਣਾ ਰਿਹੈ ਦੁਨੀਆ ਦਾ ਸਭ ਤੋਂ ਵੱਡਾ ‘ਟੈਲੀਸਕੋਪ’, ਜਾਣੋ ਖਾਸੀਅਤਾਂ

ਬੀਜਿੰਗ: ਚੀਨ ਸੂਰਜ ਦਾ ਅਧਿਐਨ ਕਰਨ ਲਈ ਦੁਨੀਆ ਦਾ ਸਭ ਤੋਂ ਵੱਡਾ ਰੇਡੀਓ ਟੈਲੀਸਕੋਪ ਬਣਾ ਰਿਹਾ ਹੈ। ਇਸ ਦੂਰਬੀਨ ਦੀ ਵਰਤੋਂ ਕੋਰੋਨਲ ਮਾਸ ਇਜੈਕਸ਼ਨ (CME) ਨਾਲ ਜੁੜੀ ਸਮਝ ਨੂੰ ਵਿਕਸਿਤ ਕਰਨ ਲਈ ਕੀਤੀ ਜਾਵੇਗੀ। ਸੂਰਜ ਤੋਂ ਨਿਕਲਣ ਵਾਲੇ ਸੀਐਮਈ ਤੋਂ ਧਰਤੀ ਪ੍ਰਭਾਵਿਤ ਹੁੰਦੀ ਹੈ। ਦਾਓਚੇਂਗ ਸੋਲਰ ਰੇਡੀਓ ਟੈਲੀਸਕੋਪ (DSRT) ਦੱਖਣ-ਪੱਛਮੀ ਚੀਨ ਦੇ ਸਿਚੁਆਨ ਸੂਬੇ ਵਿੱਚ ਇੱਕ ਪਠਾਰ ‘ਤੇ ਬਣਾਇਆ ਜਾ ਰਿਹਾ ਹੈ। ਇਹ ਦੂਰਬੀਨ 313 ਵੱਡੀਆਂ-ਵੱਡੀਆਂ ਡਿਸ਼ਾਂ ਨੂੰ ਜੋੜ ਕੇ ਬਣਾਈ ਜਾਵੇਗੀ। ਹਰੇਕ ਡਿਸ਼ ਦਾ ਵਿਆਸ 6 ਮੀਟਰ ਹੋਵੇਗਾ। ਇਹ ਸਾਰੀਆਂ ਡਿਸ਼ ਮਿਲ ਕੇ 3.14 ਕਿਲੋਮੀਟਰ ਦੇ ਘੇਰੇ ਦੇ ਨਾਲ ਇੱਕ ਚੱਕਰ ਬਣਾਉਣਗੀਆਂ।

ਕੋਰੋਨਲ ਮਾਸ ਇਜੈਕਸ਼ਨ (ਸੀਐਮਈ) ਦੁਆਰਾ ਸੂਰਜ ਤੋਂ ਨਿਕਲਣ ਵਾਲੇ ਚਾਰਜ ਕਣਾਂ ਦਾ ਅਧਿਐਨ ਕਰਨ ਲਈ ਸੂਰਜ ਦੀ ਤਸਵੀਰ ਬਣਾਉਣ ਲਈ ਰੇਡੀਓ ਤਰੰਗਾਂ ਦੀ ਵਰਤੋਂ ਕੀਤੀ ਜਾਵੇਗੀ। ਚੁੰਬਕੀ ਖੇਤਰ ਵਿੱਚ ਤਬਦੀਲੀ ਨਾਲ ਸੂਰਜ ਦੇ ਉੱਪਰ ਬਣੇ ਸਨਸਪਾਟ ਤੋਂ ਚਾਰਜ ਕੀਤੇ ਕਣ ਨਿਕਲਦੇ ਹਨ। ਜੇਕਰ ਇਹ ਸਿੱਧਾ ਧਰਤੀ ਵੱਲ ਆਉਣ, ਤਾਂ ਇਸ ਨਾਲ ਪਾਵਰ ਗਰਿੱਡ ਅਤੇ ਸੈਟੇਲਾਈਟ ਪ੍ਰਣਾਲੀਆਂ ਵਿੱਚ ਸਮੱਸਿਆਵਾਂ ਪੈਦਾ ਹੋ ਸਕਦੀਆਂ ਹਨ। ਕਈ ਵਾਰ ਇਹ ਪੁਲਾੜ ਯਾਤਰੀਆਂ ਦੀ ਜਾਨ ਨੂੰ ਖਤਰੇ ਵਿੱਚ ਪਾ ਸਕਦਾ ਹੈ। ਉਸੇ ਸਮੇਂ, ਇਹ ਰਾਤ ਨੂੰ ਧਰਤੀ ਦੇ ਆਸਮਾਨ ਵਿੱਚ ਧਰੁਵੀ ਲਾਈਟਾਂ ਵਾਂਗ ਦਿਖਾਈ ਦਿੰਦੇ ਹਨ।

ਇਸ ਸਾਲ ਦੇ ਅੰਤ ਤੱਕ ਹੋਵੇਗਾ ਤਿਆਰ

ਜੂਨ ਵਿੱਚ ਗਲੋਬਲ ਟਾਈਮਜ਼ ਨੇ ਇਸ ਟੈਲੀਸਕੋਪ ਦੇ ਨਿਰਮਾਣ ਦੀਆਂ ਤਸਵੀਰਾਂ ਪ੍ਰਕਾਸ਼ਿਤ ਕੀਤੀਆਂ ਸਨ। ਸਾਊਥ ਚਾਈਨਾ ਮਾਰਨਿੰਗ ਪੋਸਟ ਨੇ ਦੱਸਿਆ ਕਿ ਇਸ ਨੂੰ ਇਸ ਸਾਲ ਦੇ ਅੰਤ ਤੱਕ ਬਣਾਇਆ ਜਾਵੇਗਾ। ਇਸ ਟੈਲੀਸਕੋਪ ਦਾ ਨਿਰਮਾਣ ਧਰਤੀ ਆਧਾਰਿਤ ਵਾਤਾਵਰਨ ਨਿਗਰਾਨੀ ਨੈੱਟਵਰਕ (ਚੀਨੀ ਮੈਰੀਡੀਅਨ) ਦਾ ਹਿੱਸਾ ਹੈ। ਇਸ ਪ੍ਰੋਜੈਕਟ ਵਿੱਚ ਸੂਰਜ ਦੀਆਂ ਗਤੀਵਿਧੀਆਂ ਦੀ ਨਿਗਰਾਨੀ ਕਰਨ ਲਈ ਚੀਨੀ ਸਪੈਕਟਰਲ ਰੇਡੀਓਹੇਲੀਓਗ੍ਰਾਫ ਵੀ ਸ਼ਾਮਲ ਹੈ, ਜੋ ਕਿ ਅੰਦਰੂਨੀ ਮੰਗੋਲੀਆ ਵਿੱਚ ਬਣਾਇਆ ਜਾ ਰਿਹਾ ਹੈ।

12 ਮੰਜ਼ਿਲਾ ਇਮਾਰਤ ਵਾਲਾ ਟੈਲੀਸਕੋਪ ਰੋ ਰਿਹਾ ਤਿਆਰ 

ਅਮਰੀਕਾ ਦਾ ਜੇਮਜ਼ ਵੈਬ ਸਪੇਸ ਟੈਲੀਸਕੋਪ ਪੁਲਾੜ ਵਿੱਚ ਸਭ ਤੋਂ ਸ਼ਕਤੀਸ਼ਾਲੀ ਦੂਰਬੀਨ ਹੈ। ਪਰ ਹੁਣ ਧਰਤੀ ‘ਤੇ ਸਭ ਤੋਂ ਵੱਡੀ ਦੂਰਬੀਨ ਬਣਾਈ ਜਾ ਰਹੀ ਹੈ। ਇਸ ਦਾ ਨਾਂ ਮੈਗੇਲਨ ਟੈਲੀਸਕੋਪ ਹੈ, ਜਿਸ ਬਾਰੇ ਦੱਸਿਆ ਜਾ ਰਿਹਾ ਹੈ ਕਿ ਇਹ 12 ਮੰਜ਼ਿਲਾ ਇਮਾਰਤ ਤੋਂ ਉੱਚੀ ਹੋਵੇਗਾ। ਇਸ ਟੈਲੀਸਕੋਪ ਰਾਹੀਂ ਵਿਗਿਆਨੀ ਪੁਲਾੜ ਵਿੱਚ ਕਈ ਗੁਣਾ ਡੂੰਘਾਈ ਨਾਲ ਦੇਖ ਸਕਣਗੇ।