17 ਸਾਲ ਬਾਅਦ ਪਾਕਿਸਤਾਨ ‘ਚ ਟੈਸਟ ਸੀਰੀਜ਼ ਖੇਡੇਗਾ ਇੰਗਲੈਂਡ

ਲਾਹੌਰ— ਪਾਕਿਸਤਾਨ ਕ੍ਰਿਕਟ ਬੋਰਡ (ਪੀ. ਸੀ. ਬੀ.) ਨੇ ਇਸ ਸਾਲ ਦਸੰਬਰ ‘ਚ ਤਿੰਨ ਮੈਚਾਂ ਦੀ ਟੈਸਟ ਸੀਰੀਜ਼ ਲਈ ਇੰਗਲੈਂਡ ਦੇ ਪਾਕਿਸਤਾਨ ਦੌਰੇ ਦੀ ਪੁਸ਼ਟੀ ਕਰ ਦਿੱਤੀ ਹੈ। ਇੰਗਲੈਂਡ 17 ਸਾਲ ਬਾਅਦ ਪਾਕਿਸਤਾਨ ‘ਚ ਟੈਸਟ ਸੀਰੀਜ਼ ਖੇਡੇਗਾ। ਇਸ ਤੋਂ ਪਹਿਲਾਂ ਇੰਗਲੈਂਡ 20 ਸਤੰਬਰ ਤੋਂ 2 ਅਕਤੂਬਰ ਤੱਕ ਕਰਾਚੀ ਅਤੇ ਲਾਹੌਰ ਵਿੱਚ ਮੇਜ਼ਬਾਨ ਟੀਮ ਨਾਲ ਸੱਤ ਟੀ-20 ਮੈਚ ਖੇਡੇਗਾ।

ਤਿੰਨ ਟੈਸਟ ਮੈਚਾਂ ਦੀ ਲੜੀ ਰਾਵਲਪਿੰਡੀ (01-05 ਦਸੰਬਰ), ਮੁਲਤਾਨ (09-13 ਦਸੰਬਰ) ਅਤੇ ਕਰਾਚੀ (17-21 ਦਸੰਬਰ) ਵਿੱਚ ਖੇਡੀ ਜਾਵੇਗੀ। ਇੰਗਲੈਂਡ ਨੇ ਆਖਰੀ ਵਾਰ 2005 ਵਿੱਚ ਪਾਕਿਸਤਾਨ ਦਾ ਦੌਰਾ ਕੀਤਾ ਸੀ, ਜਦੋਂ ਮੇਜ਼ਬਾਨ ਟੀਮ ਨੇ ਮਹਿਮਾਨ ਟੀਮ ਨੂੰ 2-0 ਨਾਲ ਹਰਾਇਆ ਸੀ। ਇੰਗਲੈਂਡ ਨੇ 2000 ਵਿੱਚ ਨਾਸਿਰ ਹੁਸੈਨ ਦੀ ਕਪਤਾਨੀ ਵਿੱਚ ਪਾਕਿਸਤਾਨ ਵਿੱਚ ਆਪਣਾ ਆਖਰੀ ਟੈਸਟ ਜਿੱਤਿਆ ਸੀ। ਇੰਗਲੈਂਡ ਨੇ ਮੁਲਤਾਨ ‘ਚ ਤੀਜਾ ਟੈਸਟ ਖੇਡਦੇ ਹੋਏ ਸੀਰੀਜ਼ 1-0 ਨਾਲ ਆਪਣੇ ਨਾਂ ਕਰ ਲਈ ਸੀ।

ਪੀ. ਸੀ. ਬੀ. ਦੇ ਅੰਤਰਰਾਸ਼ਟਰੀ ਕ੍ਰਿਕਟ ਦੇ ਨਿਰਦੇਸ਼ਕ ਜ਼ਾਕਿਰ ਖਾਨ ਨੇ ਕਿਹਾ, “ਸਾਨੂੰ ਖੁਸ਼ੀ ਹੈ ਕਿ ਪਾਕਿਸਤਾਨ ਅਤੇ ਇੰਗਲੈਂਡ ਦੀ ਟੈਸਟ ਮੁਕਾਬਲੇਬਾਜ਼ੀ ਦਸੰਬਰ ਵਿੱਚ ਸਾਡੇ ਦੇਸ਼ ‘ਚ ਦੇਖਣ ਨੂੰ ਮਿਲੇਗੀ ਜਿਸ ਨੇ ਇਤਿਹਾਸਕ ਤੌਰ ‘ਤੇ ਕਈ ਨਜ਼ਦੀਕੀ ਅਤੇ ਸਖ਼ਤ ਮੁਕਾਬਲੇ ਵਾਲੇ ਮੈਚ ਵੇਖੇ ਹਨ। ਪਿਛਲੀ ਵਾਰ 2005 ‘ਚ ਦੋਵੇਂ ਟੀਮਾਂ ਨੇ ਪਾਕਿਸਤਾਨ ਵਿੱਚ ਇੱਕ ਮੈਚ ਖੇਡਿਆ ਸੀ। ਮੈਨੂੰ ਯਕੀਨ ਹੈ ਕਿ ਇਹ ਸੀਰੀਜ਼ ਵਿਸ਼ਵ ਕ੍ਰਿਕਟ ਪ੍ਰੇਮੀਆਂ ਦੀਆਂ ਉਮੀਦਾਂ ‘ਤੇ ਖਰੀ ਉਤਰੇਗੀ ਜੋ  ਸਖਤ ਮੁਕਾਬਲੇ ਵਾਲੇ ਅਤੇ ਰੋਮਾਂਚਕ ਮੈਚ ਦੇਖਣਾ ਚਾਹੁੰਦੇ ਹਨ।

ਇੰਗਲੈਂਡ ਕ੍ਰਿਕਟ ਬੋਰਡ (ਈ.ਸੀ.ਬੀ.) ਦੇ ਅੰਤਰਿਮ ਮੁੱਖ ਕਾਰਜਕਾਰੀ ਕਲੇਰ ਕਾਨਰ ਨੇ ਕਿਹਾ, ”ਸਾਡੀ ਪੁਰਸ਼ ਟੈਸਟ ਟੀਮ  2005 ਤੋਂ ਬਾਅਦ ਪਹਿਲੀ ਵਾਰ ਪਾਕਿਸਤਾਨ ‘ਚ ਖੇਡੇਗੀ ਜੋ ਕਿ ਇਤਿਹਾਸਕ ਹੋਵੇਗੀ। ਸਾਨੂੰ ਪਾਕਿਸਤਾਨ ਵਿੱਚ ਕ੍ਰਿਕਟ ਪ੍ਰੇਮੀਆਂ ਦੇ ਸਾਹਮਣੇ ਟੈਸਟ ਕ੍ਰਿਕਟ ਖੇਡਣ ਦਾ ਮੌਕਾ ਮਿਲਣ ‘ਤੇ ਖੁਸ਼ੀ ਹੈ। ਅਸੀਂ ਹਾਲ ਹੀ ਦੇ ਮਹੀਨਿਆਂ ਵਿੱਚ ਪੀਸੀਬੀ ਨਾਲ ਮਿਲ ਕੇ ਕੰਮ ਕਰ ਰਹੇ ਹਾਂ। ਸਾਡੀ ਟੈਸਟ ਅਤੇ ਟੀ-20 ਸੀਰੀਜ਼ ਨੂੰ ਸਾਰਿਆਂ ਲਈ ਰੋਮਾਂਚਕ ਬਣਾਉਣ ਲਈ ਮੈਂ ਉਨ੍ਹਾਂ ਦਾ ਧੰਨਵਾਦੀ ਹਾਂ।