ਉੱਤਰੀ ਕੋਰੀਆ ਦੇ ਡਰੋਨ ਵੱਲੋਂ ਹਵਾਈ ਖੇਤਰ ਦੀ ਉਲੰਘਣਾ

ਸਿਓਲ –ਦੱਖਣੀ ਕੋਰੀਆ ਨੇ ਕਿਹਾ ਕਿ ਉਸ ਨੇ ਉੱਤਰੀ ਕੋਰੀਆ ਦੇ ਡਰੋਨ ਵੱਲੋਂ ਉਸਦੇ ਹਵਾਈ ਖੇਤਰ ਦੀ ਉਲੰਘਣਾ ਕੀਤੇ ਜਾਣ ਤੋਂ ਬਾਅਦ ਚਿਤਾਵਨੀ ਦਿੰਦੇ ਹੋਏ ਗੋਲ਼ੀਬਾਰੀ ਕੀਤੀ। ਦੱਖਣੀ ਕੋਰੀਆ ਦੇ ਜੁਆਇੰਟ ਚੀਫਸ ਆਫ ਸਟਾਫ ਨੇ ਕਿਹਾ ਕਿ ਕੋਰੀਆਈ ਸਰਹੱਦ ਪਾਰ ਕਰ ਕੇ ਆਏ ਕਈ ਮਨੁੱਖੀ ਰਹਿਤ ਉੱਤਰੀ ਕੋਰੀਆਈ ਡਰੋਨ ਸੋਮਵਾਰ ਨੂੰ ਦੱਖਣੀ ਕੋਰੀਆ ਦੇ ਖੇਤਰ ਵਿਚ ਦੇਖੇ ਗਏ।

ਅਜਿਹਾ 2017 ਤੋਂ ਬਾਅਦ ਪਹਿਲੀ ਵਾਰ ਹੋਇਆ ਹੈ, ਜਦੋਂ ਉੱਤਰੀ ਕੋਰੀਆ ਦੇ ਡਰੋਨ ਦੱਖਣੀ ਕੋਰੀਆ ਦੇ ਹਵਾਈ ਖੇਤਰ ਵਿਚ ਵੜੇ ਹਨ। ਇਸ ਘਟਨਾ ਨਾਲ ਤਿੰਨ ਦਿਨ ਪਹਿਲਾਂ ਦੱਖਣੀ ਕੋਰੀਆ ਨੇ ਕਿਹਾ ਸੀ ਕਿ ਉੱਤਰੀ ਕੋਰੀਆ ਨੇ ਉਸਦੇ ਪੂਰਬੀ ਸਮੁੰਦਰੀ ਤੱਟ ਵੱਲ ਛੋਟੀ ਦੂਰੀ ਦੀਆਂ ਦੋ ਬੈਲਿਸਟਿਕ ਮਿਜ਼ਾਈਲਾਂ ਦਾਗੀਆਂ ਹਨ।