ਸਕਾਟਲੈਂਡ ‘ਚ ਘਰੇਲੂ ਬਦਸਲੂਕੀ ਦੇ ਅਪਰਾਧ ਦੂਜੇ ਸਭ ਤੋਂ ਭੈੜੇ ਪੱਧਰ ‘ਤੇ

ਗਲਾਸਗੋ : ਸਕਾਟਲੈਂਡ ਵਿੱਚ ਘਰੇਲੂ ਬਦਸਲੂਕੀ ਦੇ ਅਪਰਾਧ ਦੂਜੇ ਸਭ ਤੋਂ ਭੈੜੇ ਪੱਧਰ ’ਤੇ ਹਨ। ਸਕਾਟਿਸ਼ ਸਰਕਾਰ ਵੱਲੋਂ ਅੱਜ ਪ੍ਰਕਾਸ਼ਿਤ ਕੀਤੇ ਗਏ ਤਾਜ਼ਾ ਅੰਕੜੇ ਦਰਸਾਉਂਦੇ ਹਨ ਕਿ ਘਰੇਲੂ ਬਦਸਲੂਕੀ ਦੇ ਮਾਮਲੇ ਇੱਕ ਸਾਲ ਵਿੱਚ 64,807 ਘਟਨਾਵਾਂ ਵਿੱਚ ਬਹੁਤ ਜ਼ਿਆਦਾ ਰਹੇ, ਜੋ ਪਿਛਲੇ ਸਾਲ ਦੇ ਮੁਕਾਬਲੇ ਸਿਰਫ 1 ਪ੍ਰਤੀਸ਼ਤ ਦੀ ਗਿਰਾਵਟ ਹੈ। ਅੰਕੜੇ ਇਹ ਵੀ ਖੁਲਾਸਾ ਕਰਦੇ ਹਨ ਕਿ 64 ਪ੍ਰਤੀਸ਼ਤ ਕੇਸ ਦੁਹਰਾਉਣ ਵਾਲੇ ਅਪਰਾਧ ਸਨ, ਜਿਨ੍ਹਾਂ ਵਿੱਚ ਪੀੜਤ ਅਤੇ ਸ਼ੱਕੀ ਅਪਰਾਧੀ ਸ਼ਾਮਲ ਹਨ ਜੋ ਪਹਿਲਾਂ ਘਰੇਲੂ ਬਦਸਲੂਕੀ ਦੀ ਘਟਨਾ ਵਿੱਚ ਦਰਜ ਕੀਤੇ ਗਏ ਸਨ। ਘਰੇਲੂ ਬਦਸਲੂਕੀ ਨਾਲ ਨਜਿੱਠਣ ਲਈ ਸਕਾਟਿਸ਼ ਸੰਸਦ ਵਿੱਚ ਇੱਕ ਬਿੱਲ ਲਿਆ ਰਹੀ ਪੈਮ ਗੋਸਲ (ਐਮ.ਐਸ.ਪੀ) ਨੇ ਕਿਹਾ ਕਿ “ਹੈਰਾਨ ਕਰਨ ਵਾਲੇ ਅੰਕੜੇ ਸਪਸ਼ਟ ਸਬੂਤ ਹਨ ਕਿ ਸਰਕਾਰ ਨੂੰ ਕਾਰਵਾਈ ਕਰਨੀ ਚਾਹੀਦੀ ਹੈ”।

ਸ਼੍ਰੀਮਤੀ ਗੋਸਲ ਨੇ ਸਰਕਾਰ ਅਤੇ ਸਾਰੀਆਂ ਪਾਰਟੀਆਂ ਦੇ ਐੱਮ.ਐੱਸ.ਪੀ ਨੂੰ ਉਸ ਦੇ ਘਰੇਲੂ ਦੁਰਵਿਵਹਾਰ ਰਜਿਸਟਰ ਬਿੱਲ ਪ੍ਰਸਤਾਵ ਦਾ ਸਮਰਥਨ ਕਰਨ ਦੀ ਅਪੀਲ ਕੀਤੀ। ਭਾਰਤੀ ਭਾਈਚਾਰੇ ਵੱਲੋਂ ਚਲਾਏ ਜਾ ਰਹੇ ਕਈ ਸੰਗਠਨਾਂ ਨੇ ਇਸ ਬਿੱਲ ਨੂੰ ਆਪਣਾ ਪੂਰਾ ਸਮਰਥਨ ਦਿੱਤਾ ਹੈ, ਜਿਸ ਵਿੱਚ ਐਸੋਸੀਏਸ਼ਨ ਆਫ ਇੰਡੀਅਨ ਆਰਗੇਨਾਈਜ਼ੇਸ਼ਨ ਵੀ ਸ਼ਾਮਲ ਹੈ। 91 ਪ੍ਰਤੀਸ਼ਤ ਤੋਂ ਵੱਧ ਲੋਕ ਅਤੇ ਸੰਸਥਾਵਾਂ ਨੇ ਬਿੱਲ ਪ੍ਰਸਤਾਵ ਲਈ ਸਲਾਹ-ਮਸ਼ਵਰੇ ਦਾ ਜਵਾਬ ਦਿੱਤਾ ਹੈ ਅਤੇ ਸਾਰੇ ਉੱਤਰਦਾਤਾਵਾਂ ਵਿੱਚੋਂ 86 ਪ੍ਰਤੀਸ਼ਤ ਨੇ ਕਿਹਾ ਕਿ ਉਹ ਇਸ ਬਿਲ ਦੇ ਪੂਰੀ ਤਰ੍ਹਾਂ ਸਮਰਥਕ ਹਨ। ਕੁੱਲ ਮਿਲਾ ਕੇ, 23 ਸੰਸਥਾਵਾਂ ਨੇ ਹੋਲੀਰੂਡ ਵਿਖੇ ਪੈਮ ਗੋਸਲ ਦੇ ਘਰੇਲੂ ਦੁਰਵਿਵਹਾਰ ਰਜਿਸਟਰ ਬਿੱਲ ਦੀ ਸ਼ੁਰੂਆਤ ਲਈ ਸਮਰਥਨ ਕੀਤਾ ਹੈ। ਸਿੱਖ ਸੰਜੋਗ ਨੇ ਉਜਾਗਰ ਕੀਤਾ ਕਿ ਸੇਵਾਵਾਂ ਸਕਾਟਲੈਂਡ ਵਿੱਚ ਰਹਿ ਰਹੀਆਂ ਸਿੱਖ ਔਰਤਾਂ ਦੀਆਂ ਲੋੜਾਂ ਨੂੰ ਪੂਰਾ ਨਹੀਂ ਕਰਦੀਆਂ।

ਪੈਮ ਗੋਸਲ ਐਮਐਸਪੀ ਦਾ ਕਹਿਣਾ ਹੈ ਕਿ “ਇਹ ਹੈਰਾਨ ਕਰਨ ਵਾਲੇ ਨਵੇਂ ਅੰਕੜੇ ਸਪੱਸ਼ਟ ਸਬੂਤ ਹਨ ਕਿ ਸਰਕਾਰ ਨੂੰ ਕਾਰਵਾਈ ਕਰਨੀ ਚਾਹੀਦੀ ਹੈ। ਇਹ ਭਿਆਨਕ ਹੈ ਕਿ ਘਰੇਲੂ ਬਦਸਲੂਕੀ ਦੇ ਬਹੁਤ ਸਾਰੇ ਮਾਮਲਿਆਂ ਵਿੱਚ ਦੁਹਰਾਉਣ ਵਾਲੇ ਅਪਰਾਧੀ ਸ਼ਾਮਲ ਹਨ ਜੋ ਵਾਰ-ਵਾਰ ਭਿਆਨਕ ਹਰਕਤ ਕਰਦੇ ਰਹਿੰਦੇ ਹਨ।” ਉਹਨਾਂ ਕਿਹਾ ਕਿ “ਇਨ੍ਹਾਂ ਅੰਕੜਿਆਂ ਵਿੱਚੋਂ ਹਰ ਇੱਕ ਦੇ ਪਿੱਛੇ ਇੱਕ ਪੀੜਤ ਹੈ ਜਿਸ ਨੇ ਸਰੀਰਕ ਹਿੰਸਾ ਅਤੇ ਭਾਵਨਾਤਮਕ ਹੇਰਾਫੇਰੀ ਸਮੇਤ ਘਿਣਾਉਣੀਆਂ ਕਾਰਵਾਈਆਂ ਦਾ ਸਾਹਮਣਾ ਕੀਤਾ ਹੈ। ਘਰੇਲੂ ਦੁਰਵਿਹਾਰ ਰਜਿਸਟਰ ਬਿੱਲ ਲਈ ਮੇਰਾ ਪ੍ਰਸਤਾਵ ਪੀੜਤਾਂ ਦੀ ਸਹਾਇਤਾ ਕਰਨ ਅਤੇ ਅਪਰਾਧੀਆਂ ਨੂੰ ਇਹ ਭਿਆਨਕ ਅਪਰਾਧ ਕਰਨ ਤੋਂ ਰੋਕਣ ਵਿੱਚ ਮਦਦ ਕਰੇਗਾ।” ਪੈਮ ਗੋਸਲ ਨੇ ਸਾਰੀਆਂ ਪਾਰਟੀਆਂ ਦੇ ਐੱਮ ਐੱਸ ਪੀਜ਼ ਨੂੰ ਬੇਨਤੀ ਕੀਤੀ ਹੈ ਕਿ ਉਹ ਇਸ ਬਿੱਲ ਪ੍ਰਸਤਾਵ ਦਾ ਸਮਰਥਨ ਕਰਨ ‘ਤੇ ਵਿਚਾਰ ਕਰਨ ਤਾਂ ਜੋ ਅਸੀਂ ਘਰੇਲੂ ਬਦਸਲੂਕੀ ਦੀ ਸਮੱਸਿਆ ਨੂੰ ਖ਼ਤਮ ਕਰ ਸਕੀਏ।