ਜੈਸੂਰੀਆ ਅਤੇ ਅਕਰਮ ਲੰਕਾ ਪ੍ਰੀਮੀਅਰ ਲੀਗ ਦੇ ‘ਬ੍ਰਾਂਡ ਅੰਬੈਸਡਰ’ ਬਣੇ

ਨਵੀਂ ਦਿੱਲੀ- ਮਹਾਨ ਕ੍ਰਿਕਟਰ ਸਨਥ ਜੈਸੂਰੀਆ ਅਤੇ ਵਸੀਮ ਅਕਰਮ ਨੂੰ 6 ਤੋਂ 23 ਦਸੰਬਰ ਤੱਕ ਹੋਣ ਵਾਲੀ ਲੰਕਾ ਪ੍ਰੀਮੀਅਰ ਲੀਗ (ਐੱਲ. ਪੀ. ਐੱਲ.) ਦੇ ਤੀਜੇ ਐਡੀਸ਼ਨ ਲਈ ‘ਬ੍ਰਾਂਡ ਅੰਬੈਸਡਰ’ ਬਣਾਇਆ ਗਿਆ ਹੈ। ਹਰ ਸਮੇਂ ਦੇ ਵਿਸਫੋਟਕ ਬੱਲੇਬਾਜ਼ਾਂ ਵਿੱਚੋਂ ਇੱਕ ਜੈਸੂਰੀਆ ਨੇ ਸ਼੍ਰੀਲੰਕਾ ਲਈ 20,000 ਤੋਂ ਵੱਧ ਅੰਤਰਰਾਸ਼ਟਰੀ ਦੌੜਾਂ ਬਣਾਈਆਂ ਹਨ ਅਤੇ 440 ਵਿਕਟਾਂ ਹਾਸਲ ਕੀਤੀਆਂ ਹਨ, ਜਦੋਂ ਕਿ ਅਕਰਮ ਨੇ ਪਾਕਿਸਤਾਨ ਲਈ ਆਪਣੇ ਸ਼ਾਨਦਾਰ ਕਰੀਅਰ ਵਿੱਚ ਕੁੱਲ 916 ਵਿਕਟਾਂ ਲਈਆਂ ਹਨ।

ਜੈਸੂਰੀਆ ਨੇ ਰਿਲੀਜ਼ ਵਿੱਚ ਕਿਹਾ, “ਮੈਂ ਐਲਪੀਐਲ ਦੇ ਤੀਜੇ ਐਡੀਸ਼ਨ ਲਈ ਬ੍ਰਾਂਡ ਅੰਬੈਸਡਰ ਬਣ ਕੇ ਬਹੁਤ ਖੁਸ਼ ਹਾਂ।ਇਸ ਟੂਰਨਾਮੈਂਟ ਨੇ ਸ਼੍ਰੀਲੰਕਾ ਵਿੱਚ ਕੁਝ ਬਿਹਤਰੀਨ ਪ੍ਰਤਿਭਾਵਾਂ ਨੂੰ ਸਾਹਮਣੇ ਲਿਆਂਦਾ ਹੈ। ਉਨ੍ਹਾਂ ਕਿਹਾ, ਇਸ ਨੇ ਸਾਨੂੰ ਸਭ ਤੋਂ ਵਧੀਆ ਕ੍ਰਿਕਟ ਪ੍ਰਤਿਭਾ ਨੂੰ ਲੱਭਣ ਅਤੇ ਤਿਆਰ ਕਰਨ ਲਈ ਆਦਰਸ਼ ਪਲੇਟਫਾਰਮ ਦਿੱਤਾ ਹੈ ਜਿਵੇਂ ਕਿ ਅਸੀਂ ਇਸ ਸਾਲ ਦੇ ਸ਼ੁਰੂ ਵਿੱਚ ਏਸ਼ੀਆ ਕੱਪ ਵਿੱਚ ਦੇਖਿਆ ਸੀ। LPL ਸ਼੍ਰੀਲੰਕਾ ਨੂੰ ਆਪਣੀ T20 ਅੰਤਰਰਾਸ਼ਟਰੀ ਟੀਮ ਬਣਾਉਣ ਵਿੱਚ ਮਦਦ ਕਰ ਰਿਹਾ ਹੈ। 

1992 ਵਨਡੇ ਵਿਸ਼ਵ ਕੱਪ ਜੇਤੂ ਟੀਮ ਦਾ ਹਿੱਸਾ ਰਹੇ ਅਕਰਮ ਨੇ ਕਿਹਾ ਕਿ ਉਹ ਟੂਰਨਾਮੈਂਟ ਦੇ ਬ੍ਰਾਂਡ ਅੰਬੈਸਡਰ ਬਣ ਕੇ ਖੁਸ਼ ਹਨ। ਉਨ੍ਹਾਂ ਕਿਹਾ,  ‘ਇਸ ਨਾਲ  ਸ਼੍ਰੀਲੰਕਾ ਵਿੱਚ ਕੁਝ ਚੰਗੇ ਖਿਡਾਰੀ ਦੇਖਣ ਨੂੰ ਮਿਲ ਰਹੇ ਹਨ ਅਤੇ ਇਸ ਸਾਲ ਅਸੀਂ ਏਸ਼ੀਆ ਕੱਪ ਵਿੱਚ ਇਸਦਾ ਸਬੂਤ ਦੇਖਿਆ, ਜਿਸ ਵਿਚ ਟੀਮ ਨੇ ਜਿੱਤ ਦਰਜ ਕੀਤੀ।’ਟੂਰਨਾਮੈਂਟ ਦੇ ਆਗਾਮੀ ਪੜਾਅ ਵਿੱਚ ਕੁਝ ਸਟਾਰ ਅੰਤਰਰਾਸ਼ਟਰੀ ਖਿਡਾਰੀ ਵੀ ਖੇਡਣਗੇ,ਜਿਸ ਵਿਚ ਏਵਿਨ ਲੁਈਸ, ਕਾਰਲੋਸ ਬ੍ਰੈਥਵੇਟ, ਜਾਨੇਮਨ ਮਲਾਨ, ਡਵੇਨ ਪ੍ਰੀਟੋਰੀਅਸ, ਡੀ ਆਰਸੀ ਸ਼ਾਰਟ ਅਤੇ ਸ਼ੋਏਬ ਮਲਿਕ  ਸ਼ਾਮਲ ਹੋਣਗੇ।