ਦਿਨ ਵੇਲੇ ਚੋਣ ਪ੍ਰਚਾਰ ਅਤੇ ਸ਼ਾਮ ਨੂੰ ਬਰਗਰ ਵੇਚਦਾ ਹੈ ਇਹ ਉਮੀਦਵਾਰ

ਲੁਧਿਆਣਾ : ਲੁਧਿਆਣਾ ਲੋਕ ਸਭਾ ਸੀਟ ’ਤੇ ਬਰਗਰ ਦਾ ਕੰਮ ਕਰਨ ਵਾਲੇ ਰਵਿੰਦਰ ਪਾਲ ਸਿੰਘ (ਬਾਬਾ ਜੀ ਬਰਗਰ ਵਾਲੇ) ਵੀ ਦੂਜੀ ਵਾਰ ਆਜ਼ਾਦ ਉਮੀਦਵਾਰ ਵਜੋਂ ਆਪਣੀ ਕਿਸਮਤ ਅਜ਼ਮਾ ਰਹੇ ਹਨ। ਉਹ ਦਿਨ ਵੇਲੇ ਆਪਣੇ ਦੋਪਹੀਆ ਵਾਹਨ ’ਤੇ ਚੋਣ ਪ੍ਰਚਾਰ ਕਰਦੇ ਹਨ ਅਤੇ ਸ਼ਾਮ ਨੂੰ ਬਾਬਾ ਦੀਪ ਸਿੰਘ ਚੌਕ ਵਿਚ ਬਰਗਰ ਵਾਲੀ ਰਿਹੜੀ ’ਤੇ ਬਰਗਰ ਦਾ ਕੰਮ ਕਰਦੇ ਹਨ। ਨੌਜਵਾਨਾਂ ਨੂੰ ਆਕਰਸ਼ਿਤ ਕਰਨ ਲਈ ਰਵਿੰਦਰ ਪਾਲ ਸਿੰਘ ਨੇ ਆਪਣੇ ਬਰਗਰ ਨੂੰ ‘ਜੱਗਾ ਡਾਕੂ ਬਰਗਰ’, ‘ਪੰਜਾਬ ਪੁਲਸ ਬਰਗਰ’ ਅਤੇ ‘ਏ. ਕੇ.-47 ਬਰਗਰ’ ਵਰਗੇ ਨਾਂ ਦਿੱਤੇ ਹੋਏ ਹਨ ਅਤੇ ਉਨ੍ਹਾਂ ਦੇ ਇਹ ਬਰਗਰ ਲੁਧਿਆਣਾ ’ਚ ਬਹੁਤ ਮਸ਼ਹੂਰ ਹਨ।

ਇਸ ਦੌਰਾਨ ਚੋਣ ਕਮਿਸ਼ਨ ਵੱਲੋਂ ਉਨ੍ਹਾਂ ਦੀ ਸੁਰੱਖਿਆ ਲਈ ਮੁਹੱਈਆ ਕਰਵਾਏ ਗਏ ਸੁਰੱਖਿਆ ਮੁਲਾਜ਼ਮ ਵੀ ਬਰਗਰ ਵਾਲੀ ਰਿਹੜੀ ਕੋਲ ਹੀ ਰਹਿੰਦੇ ਹਨ। ਰਵਿੰਦਰ ਪਾਲ ਸਿੰਘ 7 ਭੈਣਾਂ ਦਾ ਇਕਲੌਤਾ ਭਰਾ ਹੈ ਅਤੇ ਜਦੋਂ ਉਹ 9ਵੀਂ ਕਲਾਸ ’ਚ ਪੜ੍ਹਦਾ ਸੀ ਤਾਂ ਉਸ ਦੇ ਪਿਤਾ ਦੀ ਮੌਤ ਹੋ ਗਈ ਸੀ। ਇਸ ਤੋਂ ਬਾਅਦ ਘਰ ਦੀ ਜ਼ਿੰਮੇਵਾਰੀ ਉਸ ’ਤੇ ਆ ਗਈ ਅਤੇ ਉਸ ਨੇ ਆਪਣੇ ਪਰਿਵਾਰ ਦਾ ਬਰਗਰ ਵੇਚਣ ਦਾ ਕੰਮ ਸੰਭਾਲ ਲਿਆ ਅਤੇ 2007 ਤੋਂ ਉਹ ਬਰਗਰ ਵੇਚਣ ਦਾ ਕੰਮ ਕਰ ਰਿਹਾ ਹੈ। ਪੰਜਾਬ ਨੂੰ ਨਸ਼ਿਆਂ ਅਤੇ ਕੈਂਸਰ ਤੋਂ ਮੁਕਤ ਕਰਨ ਤੋਂ ਇਲਾਵਾ ਸਭ ਨੂੰ ਸਸਤੀ ਸਿੱਖਿਆ ਮੁਹੱਈਆ ਕਰਵਾਉਣਾ ਹੀ ਰਵਿੰਦਰ ਪਾਲ ਸਿੰਘ ਦੇ ਚੋਣ ਮੁੱਦੇ ਹਨ।