ਅਡਾਨੀ-ਅੰਬਾਨੀ ਵਿਚਾਲੇ ‘ਨੋ ਪੋਚਿੰਗ’ ਸਮਝੌਤਾ, ਇਕ ਦੂਜੇ ਦੇ ਮੁਲਾਜ਼ਮਾਂ ਨੂੰ ਲੈ ਕੇ ਲਿਆ ਵੱਡਾ ਫ਼ੈਸਲਾ

ਮੁੰਬਈ – ਏਸ਼ੀਆ ਦੇ ਦੋ ਸਭ ਤੋਂ ਅਮੀਰ ਅਰਬਪਤੀਆਂ ਗੌਤਮ ਅਡਾਨੀ ਅਤੇ ਮੁਕੇਸ਼ ਅੰਬਾਨੀ ਨੇ ‘ਨੋ ਪੋਚਿੰਗ’ ਸਮਝੌਤੇ ‘ਤੇ ਦਸਤਖਤ ਕੀਤੇ ਹਨ। ਇਸ ਦੇ ਤਹਿਤ ਅਡਾਨੀ ਗਰੁੱਪ ਦੇ ਕਰਮਚਾਰੀ ਨਾ ਤਾਂ ਰਿਲਾਇੰਸ ਇੰਡਸਟਰੀਜ਼ ‘ਚ ਕੰਮ ਕਰ ਸਕਣਗੇ ਅਤੇ ਨਾ ਹੀ ਅਡਾਨੀ ਗਰੁੱਪ ਉਨ੍ਹਾਂ ਕਰਮਚਾਰੀਆਂ ਨੂੰ ਨੌਕਰੀ ‘ਤੇ ਰੱਖੇਗਾ ਜੋ ਮੁਕੇਸ਼ ਅੰਬਾਨੀ ਦੀ ਕੰਪਨੀ ‘ਚ ਕੰਮ ਕਰ ਚੁੱਕੇ ਹਨ। ਇਹ ਸਮਝੌਤਾ ਇਸ ਸਾਲ ਮਈ ਤੋਂ ਲਾਗੂ ਹੈ ਅਤੇ ਦੋਵਾਂ ਕੰਪਨੀਆਂ ਨਾਲ ਸਬੰਧਤ ਸਾਰੇ ਕਾਰੋਬਾਰਾਂ ਲਈ ਹੈ।

ਇਕ ਰਿਪੋਰਟ ‘ਚ ਦਿੱਤੀ ਗਈ ਜਾਣਕਾਰੀ ਮੁਤਾਬਕ ਅਡਾਨੀ ਗਰੁੱਪ ਜਾਂ ਰਿਲਾਇੰਸ ਇੰਡਸਟਰੀਜ਼ ਵਲੋਂ ਹੁਣ ਤੱਕ ਇਸ ਸਮਝੌਤੇ ਨਾਲ ਜੁੜੇ ਸਵਾਲਾਂ ਦੇ ਜਵਾਬ ਨਹੀਂ ਦਿੱਤੇ ਗਏ ਹਨ।

ਕੀ ਹੈ ਇਸ ਸਮਝੌਤੇ ਦਾ ਕਾਰਨ 

‘ਨੋ ਪੋਚਿੰਗ’ ਸਮਝੌਤਾ ਮਹੱਤਵ ਰੱਖਦਾ ਹੈ ਕਿਉਂਕਿ ਅਡਾਨੀ ਸਮੂਹ ਹੁਣ ਅਜਿਹੇ ਕਾਰੋਬਾਰ ਵਿਚ ਦਾਖਲ ਹੋ ਰਿਹਾ ਹੈ ਜਿਸ ‘ਤੇ ਪਹਿਲਾਂ ਹੀ ਰਿਲਾਇੰਸ ਇੰਡਸਟਰੀਜ਼ ਦਾ ਦਬਦਬਾ ਹੈ। ਪਿਛਲੇ ਸਾਲ, ਅਡਾਨੀ ਸਮੂਹ ਨੇ ਅਡਾਨੀ ਪੈਟਰੋ ਕੈਮੀਕਲਜ਼ ਲਿਮਟਿਡ ਦੇ ਨਾਲ ਪੈਟਰੋ ਕੈਮੀਕਲ ਸੈਕਟਰ ਵਿੱਚ ਆਪਣੀ ਸ਼ੁਰੂਆਤ ਦਾ ਐਲਾਨ ਕੀਤਾ ਸੀ। ਇਸ ਸੈਕਟਰ ਵਿੱਚ ਰਿਲਾਇੰਸ ਦੀ ਸਭ ਤੋਂ ਵੱਡੀ ਮੌਜੂਦਗੀ ਹੈ। ਇਸ ਦੇ ਨਾਲ ਹੀ ਅਡਾਨੀ ਗਰੁੱਪ ਨੇ ਟੈਲੀਕਾਮ ‘ਚ ਐਂਟਰੀ ਲਈ ਪਹਿਲਾ ਕਦਮ ਚੁੱਕਿਆ ਹੈ। ਹਾਲ ਹੀ ਵਿੱਚ ਅਡਾਨੀ ਨੇ 5ਜੀ ਸਪੈਕਟਰਮ ਲਈ ਬੋਲੀ ਲਗਾਈ ਹੈ। ਇਸ ਦੇ ਨਾਲ ਹੀ ਗ੍ਰੀਨ ਐਨਰਜੀ ਸੈਕਟਰ ਵਿੱਚ ਅਡਾਨੀ ਅਤੇ ਅੰਬਾਨੀ ਇੱਕ ਦੂਜੇ ਦੇ ਵਿਰੋਧੀ ਬਣਦੇ ਨਜ਼ਰ ਆ ਰਹੇ ਹਨ। ਇਸੇ ਤਰ੍ਹਾਂ ਮੀਡੀਆ ਵਿੱਚ ਮੁਕੇਸ਼ ਅੰਬਾਨੀ ਤੋਂ ਬਾਅਦ ਹੁਣ ਅਡਾਨੀ ਗਰੁੱਪ ਦੀ ਐਂਟਰੀ ਹੋਈ ਹੈ।

ਕਿੰਨੇ ਕਰਮਚਾਰੀ ‘ਤੇ ਹੋਵੇਗਾ ਇਸ ਸਮਝੋਤੇ ਦਾ ਅਸਰ

ਮੁਕੇਸ਼ ਅੰਬਾਨੀ ਅਤੇ ਗੌਤਮ ਅਡਾਨੀ ਵਿਚਾਲੇ ਹੋਏ ਸਮਝੌਤੇ ਕਾਰਨ ਲੱਖਾਂ ਮੁਲਾਜ਼ਮਾਂ ਲਈ ਦੋਹਰੇ ਵਿਕਲਪ ਬੰਦ ਹੋ ਗਏ ਹਨ। ਰਿਲਾਇੰਸ ਦੇ 3.80 ਲੱਖ ਤੋਂ ਵੱਧ ਕਰਮਚਾਰੀ ਹਨ। ਇਸ ਦੇ ਨਾਲ ਹੀ ਅਡਾਨੀ ਸਮੂਹ ਦੇ ਹਜ਼ਾਰਾਂ ਕਰਮਚਾਰੀ ਮੁਕੇਸ਼ ਅੰਬਾਨੀ ਦੀ ਕਿਸੇ ਵੀ ਕੰਪਨੀ ਵਿੱਚ ਕੰਮ ਨਹੀਂ ਕਰ ਸਕਣਗੇ।
ਭਾਰਤ ਵਿੱਚ ਵਧ ਰਿਹਾ ਰੁਝਾਨ: ਭਾਵੇਂ ਭਾਰਤ ਵਿੱਚ ‘ਨੋ ਪੋਚਿੰਗ’ ਸਮਝੌਤੇ ਦੀ ਪ੍ਰਥਾ ਪਹਿਲਾਂ ਵਾਂਗ ਨਹੀਂ ਰਹੀ, ਪਰ ਹੁਣ ਇਹ ਤੇਜ਼ੀ ਨਾਲ ਪ੍ਰਚਲਿਤ ਹੁੰਦੀ ਜਾ ਰਹੀ ਹੈ। ਪ੍ਰਤਿਭਾ ਦੀ ਲੜਾਈ ਅਤੇ ਤਨਖਾਹਾਂ ਦੇ ਵਾਧੇ ਕਾਰਨ ਕੰਪਨੀਆਂ ‘ਨੋ ਪੋਚਿੰਗ’ ਸਮਝੌਤੇ ‘ਤੇ ਜ਼ੋਰ ਦੇ ਰਹੀਆਂ ਹਨ। ਕਰਮਚਾਰੀਆਂ ਦੀ ਮੰਗ ਜਾਂ ਵਧਦੀ ਤਨਖ਼ਾਹ ਕੰਪਨੀਆਂ ਲਈ ਖ਼ਤਰਾ ਹੈ। ਖਾਸ ਕਰਕੇ ਉਸ ਖੇਤਰ ਵਿੱਚ ਜਿੱਥੇ ਪ੍ਰਤਿਭਾ ਘੱਟ ਹੈ।