ਨਵੇਂ ਗੀਤ ਨੂੰ ਲੈ ਕੇ ਵਿਵਾਦਾਂ ’ਚ ਘਿਰੇ ਜੈਜ਼ੀ ਬੀ
![](http://mehakewattan.com/wp-content/uploads/2024/03/21_53_499437950jazzy-b-ll.jpg)
ਪੰਜਾਬੀ ਗਾਇਕ ਜੈਜ਼ੀ ਬੀ ਇਕ ਵਾਰ ਮੁੜ ਵਿਵਾਦਾਂ ’ਚ ਘਰ ਗਏ ਹਨ। ਕਿਸਾਨ ਜਥੇਬੰਦੀ ਤੇ ਔਰਤਾਂ ਵਲੋਂ ਜੈਜ਼ੀ ਬੀ ਦਾ ਵਿਰੋਧ ਕੀਤਾ ਜਾ ਰਿਹਾ ਹੈ। 10 ਮਾਰਚ ਨੂੰ ਜੈਜ਼ੀ ਬੀ ਦਾ ਗੀਤ ‘ਮੜਕ ਸ਼ੌਕੀਨਾਂ ਦੀ’ ਰਿਲੀਜ਼ ਹੋਇਆ ਸੀ। ਇਸ ਗੀਤ ਦੇ ਬੋਲ ਸਨ ‘ਮੜਕ ਸ਼ੌਕੀਨਾਂ ਦੀ ਤੂੰ ਕੀ ਜਾਣਦੀ ਭੇਡੇ’।
ਹਾਲਾਂਕਿ ਗੀਤ ’ਚ ਜੈਜ਼ੀ ਬੀ ਇਕ ਕੁੜੀ ਨਾਲ ਡਾਂਸ ਕਰਦੇ ਤੇ ਉਸ ਵੱਲ ਇਸ਼ਾਰਾ ਕਰਦੇ ਵੀ ਨਜ਼ਰ ਆਏ ਹਨ ਪਰ ਕਿਸਾਨ ਜਥੇਬੰਦੀ ਤੇ ਔਰਤਾਂ ਵਲੋਂ ਇਹ ਸਵਾਲ ਖੜ੍ਹਾ ਕੀਤਾ ਗਿਆ ਹੈ ਕਿ ਪੰਜਾਬ ਦੀ ਸੱਭਿਆਚਾਰਕ ਸੰਸਕ੍ਰਿਤੀ ਨੂੰ ਜੈਜ਼ੀ ਬੀ ਵਲੋਂ ਖ਼ਰਾਬ ਕੀਤਾ ਗਿਆ ਹੈ ਤੇ ਇਸ ਗੀਤ ’ਤੇ ਜਲਦ ਤੋਂ ਜਲਦ ਪੰਜਾਬ ਸਰਕਾਰ ਬੈਨ ਲਗਾਵੇ।
ਜੈਜ਼ੀ ਬੀ 2 ਦਹਾਕਿਆਂ ਤੋਂ ਵੱਧ ਸਮੇਂ ਤੋਂ ਪੰਜਾਬੀ ਸੰਗੀਤ ਜਗਤ ਦਾ ਹਿੱਸਾ ਹਨ। ਸਮੇਂ-ਸਮੇਂ ’ਤੇ ਜੈਜ਼ੀ ਬੀ ਵਿਵਾਦਾਂ ’ਚ ਰਹੇ ਹਨ ਤੇ ਹੁਣ ਮੁੜ ਇਕ ਵਾਰ ਜੈਜ਼ੀ ਬੀ ਆਪਣੇ ਗੀਤ ਨੂੰ ਲੈ ਕੇ ਵਿਵਾਦਾਂ ’ਚ ਆ ਗਏ ਹਨ। ਬਰਨਾਲਾ ਵਿਖੇ ਕਿਸਾਨ ਜਥੇਬੰਦੀ ਲੱਖੋਵਾਲ ਵਲੋਂ ਗਾਇਕ ਜੈਜ਼ੀ ਬੀ ਖ਼ਿਲਾਫ਼ ਰੋਸ ਪ੍ਰਦਰਸ਼ਨ ਕੀਤਾ ਗਿਆ ਹੈ ਤੇ ਗਾਇਕ ਦਾ ਪੁਤਲਾ ਫੂਕਿਆ ਗਿਆ। ਦੱਸ ਦੇਈਏ ਕਿ ਕਿਸਾਨ ਜਥੇਬੰਦੀ ਤੇ ਮਹਿਲਾ ਆਗੂ ਨੇ ਕਿਹਾ ਕਿ ਜੇਕਰ ਜੈਜ਼ੀ ਬੀ ਦੇ ਇਸ ਗੀਤ ’ਤੇ ਕੋਈ ਕਾਰਵਾਈ ਨਹੀਂ ਹੁੰਦੀ ਹੈ ਤਾਂ ਉਹ ਆਪਣਾ ਰੋਸ ਪ੍ਰਦਰਸ਼ਨ ਹੋਰ ਤਿੱਖਾ ਕਰਨਗੇ।
![](http://mehakewattan.com/wp-content/uploads/2023/07/ALL-ADDS-2023_page-0001-1638x2048-1.jpg)