ਸਪੇਨ ਦੇ ਤੱਟ ‘ਤੇ ਪ੍ਰਵਾਸੀ ਕਿਸ਼ਤੀ ‘ਚ ਸਵਾਰ 7 ਲੋਕਾਂ ਦੀ ਮੌਤ

ਮੈਡ੍ਰਿਡ – ਸਪੇਨ ਦੇ ਗ੍ਰੈਨ ਕੈਨਰੀਆ ਟਾਪੂ ਤੋਂ ਲਗਭਗ 140 ਕਿਲੋਮੀਟਰ ਦੱਖਣ ‘ਚ ਮੰਗਲਵਾਰ ਸਵੇਰੇ ਇਕ ਪ੍ਰਵਾਸੀ ਕਿਸ਼ਤੀ ਨੂੰ ਬਚਾਉਣ ਤੋਂ ਬਾਅਦ ਕਰੀਬ 7 ਲੋਕਾਂ ਦੀ ਮੌਤ ਹੋ ਗਈ ਅਤੇ 12 ਹੋਰਾਂ ਨੂੰ ਹਸਪਤਾਲ ‘ਚ ਦਾਖਲ ਕਰਵਾਇਆ ਗਿਆ। ਸਪੈਨਿਸ਼ ਸਮੁੰਦਰੀ ਬਚਾਅ ਸੇਵਾਵਾਂ ਨੇ ਇਹ ਜਾਣਕਾਰੀ ਦਿੱਤੀ ਹੈ। ਬਚਾਅ ਸੇਵਾਵਾਂ ਨੇ ਕਿਹਾ ਕਿ ਮੌਤਾਂ ਗੰਭੀਰ ਡੀਹਾਈਡਰੇਸ਼ਨ ਕਾਰਨ ਹੋਈਆਂ ਹਨ। ਕਿਸ਼ਤੀ ‘ਤੇ ਸਵਾਰ ਪ੍ਰਵਾਸੀ ਸਪੇਨ ਦੇ ਤੱਟ ਤੱਕ ਪਹੁੰਚਣ ਦੀ ਕੋਸ਼ਿਸ਼ ਕਰ ਰਹੇ ਸਨ।

ਉਨ੍ਹਾਂ ਕਿਹਾ ਕਿ ਸੋਮਵਾਰ ਰਾਤ ਕਰੀਬ 8 ਵਜੇ ਕਿਸ਼ਤੀ ਨੂੰ ਇਕ ਵਪਾਰੀ ਜਹਾਜ਼ ਨੇ ਦੇਖਿਆ, ਜਿਸ ਨੇ ਬਚਾਅ ਸੇਵਾਵਾਂ ਨੂੰ ਸੁਚੇਤ ਕੀਤਾ। ਮਦਦ ਲਈ ਦੋ ਹੈਲੀਕਾਪਟਰ ਅਤੇ ਇੱਕ ਬਚਾਅ ਜਹਾਜ਼ ਭੇਜਿਆ ਗਿਆ। ਉਨ੍ਹਾਂ ਕਿਹਾ ਕਿ ਪ੍ਰਵਾਸੀ ਕਿਸ਼ਤੀ ‘ਤੇ ਦੋ ਲਾਸ਼ਾਂ ਮਿਲੀਆਂ ਹਨ, ਜਦੋਂ ਕਿ 34 ਲੋਕ ਜ਼ਿੰਦਾ ਸਨ, ਜਿਨ੍ਹਾਂ ਵਿਚ 27 ਪੁਰਸ਼ ਅਤੇ 7 ਔਰਤਾਂ ਸਨ। ਉਹ ਉਪ-ਸਹਾਰਾ ਅਫਰੀਕਾ ਤੋਂ ਦੱਸੇ ਗਏ ਹਨ।

ਬਚੇ ਲੋਕਾਂ ਨੇ ਕਿਹਾ, ਅਫ਼ਰੀਕਾ ਦੇ ਉੱਤਰੀ-ਪੱਛਮੀ ਤੱਟ ‘ਤੇ ਖਤਰਨਾਕ ਕਰਾਸਿੰਗ ਕਰਦੇ ਸਮੇਂ ਪੰਜ ਲੋਕਾਂ ਦੀ ਮੌਤ ਹੋ ਗਈ, ਉਨ੍ਹਾਂ ਦੀਆਂ ਲਾਸ਼ਾਂ ਸਮੁੰਦਰ ਵਿੱਚ ਸੁੱਟ ਦਿੱਤੀਆਂ ਗਈਆਂ। ਕੈਨਰੀ ਆਈਲੈਂਡਜ਼ ਐਮਰਜੈਂਸੀ ਸੇਵਾਵਾਂ ਅਤੇ ਰੈੱਡ ਕਰਾਸ ਨੇ ਤੱਟ ‘ਤੇ ਬਚੇ ਲੋਕਾਂ ਦੇ ਇਲਾਜ ਲਈ ਇੱਕ ਐਮਰਜੈਂਸੀ ਕੇਂਦਰ ਸਥਾਪਤ ਕੀਤਾ ਹੈ। ਇਨ੍ਹਾਂ ਵਿੱਚੋਂ ਜ਼ਿਆਦਾਤਰ ਲੋਕ ਗੰਭੀਰ ਡੀਹਾਈਡਰੇਸ਼ਨ ਤੋਂ ਪੀੜਤ ਸਨ, ਜਿਨ੍ਹਾਂ ਵਿੱਚ ਦੋ 24 ਸਾਲਾ ਵਿਅਕਤੀ ਗੰਭੀਰ ਹਾਲਤ ਵਿੱਚ ਸਨ।