Flipkart ਨੇ ਲਾਂਚ ਕੀਤੀ ਆਪਣੀ UPI ਸੇਵਾ

ਨਵੀਂ ਦਿੱਲੀ : ਈ-ਕਾਮਰਸ ਕੰਪਨੀ ਫਲਿੱਪਕਾਰਟ ਨੇ ਆਪਣੀ ਯੂਨੀਫਾਈਡ ਪੇਮੈਂਟ ਇੰਟਰਫੇਸ (UPI) ਸੇਵਾ ਸ਼ੁਰੂ ਕੀਤੀ ਹੈ। ਇਹ ਸੇਵਾ ਫਲਿੱਪਕਾਰਟ ਐਪ ਵਿੱਚ ਜਾਂ ਐਪ ਤੋਂ ਬਾਹਰ ਔਨਲਾਈਨ ਅਤੇ ਆਫਲਾਈਨ ਭੁਗਤਾਨਾਂ ਲਈ ਹੈ। ਫਲਿੱਪਕਾਰਟ ਨੇ ਘੋਸ਼ਣਾ ਕੀਤੀ ਹੈ ਕਿ ਉਸਨੇ ਐਕਸਿਸ ਬੈਂਕ ਦੇ ਨਾਲ ਸਾਂਝੇਦਾਰੀ ਵਿੱਚ ਆਪਣੀ ਖੁਦ ਦੀ UPI ਸੇਵਾ, “Flipkart UPI” ਲਾਂਚ ਕੀਤੀ ਹੈ।

ਇਸ ਨਾਲ ਗਾਹਕਾਂ ਨੂੰ ਡਿਜੀਟਲ ਪੇਮੈਂਟ ਕਰਨ ਲਈ ਹੋਰ ਵੀ ਆਸਾਨ ਵਿਕਲਪ ਮਿਲਣਗੇ। ਫਲਿੱਪਕਾਰਟ ਪਿਛਲੇ ਸਾਲ ਤੋਂ UPI ਸੇਵਾ ਲਈ ਤਿਆਰੀ ਕਰ ਰਿਹਾ ਸੀ। ਹੁਣ ਇਹ ਸੇਵਾ ਐਂਡਰਾਇਡ ਉਪਭੋਗਤਾਵਾਂ ਲਈ ਉਪਲਬਧ ਹੋ ਗਈ ਹੈ। ਗਾਹਕ “@fkaxis” UPI ਹੈਂਡਲ ਨਾਲ ਰਜਿਸਟਰ ਕਰ ਸਕਦੇ ਹਨ ਅਤੇ ਫਲਿੱਪਕਾਰਟ ਐਪ ਰਾਹੀਂ ਪੈਸੇ ਭੇਜਣ ਅਤੇ ਭੁਗਤਾਨ ਕਰਨ ਵਰਗੀਆਂ ਵਿਸ਼ੇਸ਼ਤਾਵਾਂ ਦੀ ਵਰਤੋਂ ਕਰ ਸਕਦੇ ਹਨ।

ਫਲਿਪਕਾਰਟ ਦੇ ਫਿਨਟੇਕ ਅਤੇ ਪੇਮੈਂਟਸ ਗਰੁੱਪ ਦੇ ਸੀਨੀਅਰ ਵਾਈਸ ਪ੍ਰੈਜ਼ੀਡੈਂਟ ਧੀਰਜ ਅਨੇਜਾ ਅਨੁਸਾਰ, “Flipkart UPI ਦੀ ਸੁਵਿਧਾ ਅਤੇ ਕਿਫਾਇਤੀਤਾ ਨੂੰ Flipkart ਦੀ ਭਰੋਸੇਯੋਗ ਸੇਵਾ ਦੇ ਨਾਲ ਜੋੜਦਾ ਹੈ। ਅਸੀਂ ਆਪਣੇ ਗਾਹਕਾਂ ਨੂੰ SuperCoins, ਬ੍ਰਾਂਡ ਵਾਊਚਰ ਅਤੇ ਵਰਗੇ ਲਾਭਾਂ ਦੇ ਨਾਲ ਇੱਕ ਸੁਰੱਖਿਅਤ ਅਤੇ ਸੁਵਿਧਾਜਨਕ ਅਨੁਭਵ ਪ੍ਰਦਾਨ ਕਰਦੇ ਹਾਂ। ਅਸੀਂ ਭੁਗਤਾਨ ਵਿਕਲਪ ਪ੍ਰਦਾਨ ਕਰਕੇ ਸਭ ਤੋਂ ਵਧੀਆ ਖਰੀਦਦਾਰੀ ਅਨੁਭਵ ਪ੍ਰਦਾਨ ਕਰਨਾ ਚਾਹੁੰਦੇ ਹਾਂ।”

ਇਸ UPI ਸੇਵਾ ਨਾਲ, ਉਪਭੋਗਤਾ ਫਲਿੱਪਕਾਰਟ ਦੇ ਅੰਦਰ ਅਤੇ ਬਾਹਰ ਆਨਲਾਈਨ ਅਤੇ ਆਫਲਾਈਨ ਦੁਕਾਨਾਂ ‘ਤੇ ਭੁਗਤਾਨ ਕਰਨ ਦੇ ਯੋਗ ਹੋਣਗੇ। ਇਸ ਤੋਂ ਇਲਾਵਾ ਰੀਚਾਰਜ ਅਤੇ ਬਿੱਲ ਦੇ ਭੁਗਤਾਨ ਲਈ ਆਸਾਨ ਅਤੇ ਤੇਜ਼ ਸੁਵਿਧਾਵਾਂ ਵੀ ਉਪਲਬਧ ਹੋਣਗੀਆਂ। Flipkart UPI ਸੇਵਾ ਗਾਹਕਾਂ ਨੂੰ ਇੱਕ ਏਕੀਕ੍ਰਿਤ ਚੈੱਕਆਉਟ ਪ੍ਰਕਿਰਿਆ ਦੁਆਰਾ ਇੱਕ ਆਸਾਨ ਡਿਜੀਟਲ ਭੁਗਤਾਨ ਅਨੁਭਵ ਪ੍ਰਦਾਨ ਕਰੇਗੀ।

ਦੇਸ਼ ਵਿੱਚ ਕਰੋਨਾ ਦੇ ਦੌਰ ਤੋਂ ਬਾਅਦ ਆਨਲਾਈਨ ਡਿਜੀਟਲ ਪੇਮੈਂਟ ਵਿੱਚ ਵਾਧਾ ਹੋਇਆ ਹੈ। ਇੱਥੇ, ਪੇਟੀਐਮ ਪੇਮੈਂਟਸ ਬੈਂਕ ‘ਤੇ ਆਰਬੀਆਈ ਦੀ ਕਾਰਵਾਈ ਤੋਂ ਬਾਅਦ, ਹੋਰ ਕੰਪਨੀਆਂ ਦੇ ਐਪਸ ‘ਤੇ ਗਾਹਕਾਂ ਦੀ ਗਿਣਤੀ ਵਧ ਗਈ ਹੈ। ਹੁਣ, ਈ-ਕਾਮਰਸ ਕੰਪਨੀ ਫਲਿੱਪਕਾਰਟ ਦੁਆਰਾ ਆਪਣੀ ਯੂਨੀਫਾਈਡ ਪੇਮੈਂਟ ਇੰਟਰਫੇਸ (UPI) ਸੇਵਾ ਸ਼ੁਰੂ ਕਰਨ ਨਾਲ, ਇਹ PhonePe ਅਤੇ Paytm ਆਦਿ ਨੂੰ ਸਿੱਧਾ ਮੁਕਾਬਲਾ ਦੇਵੇਗੀ।