Paytm ‘ਤੇ FEMA ਦੀ ਉਲੰਘਣਾ ਦਾ ਦੋਸ਼, ED ਜਾਂਚ ਕਰ ਰਹੀ ਹੈ: ਰਿਪੋਰਟਾਂ

ਨਵੀਂ ਦਿੱਲੀ – ਦੇਸ਼ ਵਿੱਚ ਵਿੱਤੀ ਸੰਕਟ ਦੀ ਜਾਂਚ ਕਰਨ ਵਾਲੀ ਏਜੰਸੀ ਇਨਫੋਰਸਮੈਂਟ ਡਾਇਰੈਕਟੋਰੇਟ One97 ਕਮਿਊਨੀਕੇਸ਼ਨ ਦੁਆਰਾ ਸੰਚਾਲਿਤ ਪਲੇਟਫਾਰਮਾਂ ਦੀ ਜਾਂਚ ਕਰ ਰਹੀ ਹੈ, ਜਿਸ ਵਿੱਚ ਪੇਟੀਐਮ ਵੀ ਸ਼ਾਮਲ ਹੈ। ਈਡੀ ਇਹ ਪਤਾ ਲਗਾ ਰਹੀ ਹੈ ਕਿ ਕੀ ਇਸ ਪੂਰੇ ਮਾਮਲੇ ਵਿੱਚ ਵਿਦੇਸ਼ੀ ਮੁਦਰਾ ਨਿਯਮਾਂ ਦੀ ਅਣਦੇਖੀ ਕੀਤੀ ਗਈ ਹੈ। ਇਹ ਖ਼ਬਰ ਦੋ ਸੂਤਰਾਂ ਤੋਂ ਆਈ ਹੈ।

ਹਾਲਾਂਕਿ ਇਨ੍ਹਾਂ ਸੂਤਰਾਂ ਨੇ ਇਹ ਨਹੀਂ ਦੱਸਿਆ ਕਿ ਇਨਫੋਰਸਮੈਂਟ ਡਾਇਰੈਕਟੋਰੇਟ ਫੇਮਾ (ਫੌਰਨ ਐਕਸਚੇਂਜ ਮੈਨੇਜਮੈਂਟ ਐਕਟ) ਦੀ ਕਿਹੜੀ ਵਿਵਸਥਾ ਦੇ ਤਹਿਤ ਜਾਂਚ ਕਰ ਰਿਹਾ ਹੈ। ਇੱਕ ਸੂਤਰ ਨੇ ਕਿਹਾ ਕਿ ਜਾਂਚਕਰਤਾਵਾਂ ਨੇ ਅਜੇ ਤੱਕ ਪੇਟੀਐਮ ਨਾਲ ਸੰਪਰਕ ਨਹੀਂ ਕੀਤਾ ਹੈ। ਸੂਤਰਾਂ ਨੇ ਉਨ੍ਹਾਂ ਦੇ ਨਾਂ ਦੱਸਣ ਤੋਂ ਇਨਕਾਰ ਕਰ ਦਿੱਤਾ ਕਿਉਂਕਿ ਉਹ ਮੀਡੀਆ ਨਾਲ ਗੱਲ ਕਰਨ ਲਈ ਅਧਿਕਾਰਤ ਨਹੀਂ ਹਨ। ਇਨਫੋਰਸਮੈਂਟ ਡਾਇਰੈਕਟੋਰੇਟ ਅਤੇ ਵਿੱਤ ਮੰਤਰਾਲੇ ਨੇ ਇਸ ਮਾਮਲੇ ਵਿੱਚ ਕੁਝ ਵੀ ਕਹਿਣ ਤੋਂ ਇਨਕਾਰ ਕਰ ਦਿੱਤਾ ਹੈ। ਇਸ ਦੇ ਨਾਲ ਹੀ ਪੇਟੀਐਮ ਦੇ ਬੁਲਾਰੇ ਨੇ ਫੇਮਾ ਕਾਨੂੰਨ ਦੀ ਉਲੰਘਣਾ ਦੇ ਦੋਸ਼ਾਂ ਨੂੰ ਪੂਰੀ ਤਰ੍ਹਾਂ ਰੱਦ ਕਰ ਦਿੱਤਾ ਹੈ ਅਤੇ ਨਾਲ ਹੀ ਇਸ ਨੂੰ ਗਲਤ ਵੀ ਕਰਾਰ ਦਿੱਤਾ ਹੈ।

ਪੇਟੀਐਮ ਦੇ ਬੁਲਾਰੇ ਨੇ ਕਿਹਾ, ਪੇਟੀਐਮ ਪੇਮੈਂਟਸ ਬੈਂਕ ਰਾਹੀਂ ਬੈਂਕ ਖਾਤਿਆਂ ਜਾਂ ਵਾਲਿਟਾਂ ਤੋਂ ਵਿਦੇਸ਼ ਭੇਜਣਾ ਸੰਭਵ ਨਹੀਂ ਹੈ। ਕੰਪਨੀ ਦੇ ਬੁਲਾਰੇ ਨੇ ਇੱਕ ਈਮੇਲ ਵਿੱਚ ਕਿਹਾ, “ਅਸੀਂ One 97 Communications ਜਾਂ ਇਸ ਦੇ ਸਹਿਯੋਗੀ Paytm Payments Bank ਦੁਆਰਾ ਕਿਸੇ ਵੀ FEMA ਕਾਨੂੰਨ ਦੀ ਉਲੰਘਣਾ ਦੀਆਂ ਅਫਵਾਹਾਂ ਦਾ ਸਖ਼ਤੀ ਨਾਲ ਖੰਡਨ ਕਰਦੇ ਹਾਂ। ਪੇਮੈਂਟਸ ਬੈਂਕ ਦੇ ਲਾਇਸੈਂਸ ਨਿਯਮਾਂ ਅਨੁਸਾਰ ਦੇਸ਼ ਤੋਂ ਬਾਹਰ ਪੈਸੇ ਭੇਜਣ ਦੀ ਮਨਾਹੀ ਹੈ ਅਤੇ ਇਹ ਸਿਰਫ ਭਾਰਤ ਵਿੱਚ ਵੱਡੇ ਵਪਾਰਕ ਬੈਂਕਾਂ ਦੁਆਰਾ ਹੀ ਕੀਤਾ ਜਾ ਸਕਦਾ ਹੈ।