ਸਲਮਾਨ ਖ਼ਾਨ ਨੂੰ ਪੱਥਰ ਮਾਰਦਿਆਂ ਕੰਬਣ ਲੱਗੇ ਸਨ ਵਿਜੇਂਦਰ ਦੇ ਹੱਥ

ਮੁੰਬਈ– ਮੁੱਕੇਬਾਜ਼ ਵਿਜੇਂਦਰ ਸਿੰਘ ਨੇ ਖੇਡਾਂ ਤੇ ਮਨੋਰੰਜਨ ਵਿਚਕਾਰ ਸੰਪੂਰਨ ਸੰਤੁਲਨ ਬਣਾਈ ਰੱਖਿਆ ਹੈ। ਵਿਜੇਂਦਰ ਨੂੰ ਹਾਲ ਹੀ ’ਚ ਸਲਮਾਨ ਖ਼ਾਨ ਦੀ ਮਲਟੀ ਸਟਾਰਰ ਫ਼ਿਲਮ ‘ਕਿਸੀ ਕਾ ਭਾਈ ਕਿਸੀ ਕੀ ਜਾਨ’ ’ਚ ਦੇਖਿਆ ਗਿਆ ਸੀ। ਐਂਟੀ-ਹੀਰੋ ਦੇ ਕਿਰਦਾਰ ’ਚ ਵਿਜੇਂਦਰ ਦਾ ਕੰਮ ਲਾਜਵਾਬ ਸੀ। ਥੀਏਟਰ ਛੱਡਣ ਤੋਂ ਬਾਅਦ ਹੁਣ ਫ਼ਿਲਮ OTT ਦੇ Zee5 ’ਤੇ ਦੇਖਣ ਨੂੰ ਮਿਲ ਰਹੀ ਹੈ। ਵਿਜੇਂਦਰ ਨੇ ਫ਼ਿਲਮ ਦੀ ਸ਼ੂਟਿੰਗ ਨਾਲ ਜੁੜੀਆਂ ਯਾਦਾਂ ਸਾਂਝੀਆਂ ਕੀਤੀਆਂ ਹਨ।

ਉਨ੍ਹਾਂ ਕਿਹਾ, ‘‘ਮੈਨੂੰ ਖ਼ੁਸ਼ੀ ਹੈ ਕਿ ‘ਕਿਸੀ ਕਾ ਭਾਈ ਕਿਸੀ ਕੀ ਜਾਨ’ OTT ’ਤੇ ਰਿਲੀਜ਼ ਹੋ ਗਈ ਹੈ। ਤੁਸੀਂ ਕਿਤੇ ਵੀ ਬੈਠ ਕੇ OTT ਸਮੱਗਰੀ ਦਾ ਆਨੰਦ ਲੈ ਸਕਦੇ ਹੋ। ਸਲਮਾਨ ਭਾਈ ਨਾਲ ਕੰਮ ਕਰਨ ਦਾ ਤਜਰਬਾ ਬਹੁਤ ਵਧੀਆ ਰਿਹਾ। ਉਨ੍ਹਾਂ ਨਾਲ ਕੰਮ ਨਿਰਵਿਘਨ ਸੀ। ਸਭ ਕੁਝ ਸਮੇਂ ਸਿਰ ਹੋ ਜਾਂਦਾ ਸੀ। ਜੇਕਰ ਉਨ੍ਹਾਂ ਨੇ 10 ਵਜੇ ਦਾ ਸਮਾਂ ਦਿੱਤਾ ਹੈ ਤਾਂ ਸ਼ੂਟਿੰਗ ਉਸੇ ਸਮੇਂ ਸ਼ੁਰੂ ਹੋ ਜਾਣੀ ਹੈ। ਸ਼ੂਟ ਖ਼ਤਮ ਹੋਣ ਤੋਂ ਬਾਅਦ ਅਸੀਂ ਇਕੱਠੇ ਵਰਕਆਊਟ ਟ੍ਰੇਨਿੰਗ ਕਰਦੇ ਸੀ। ਡਾਈਟ ਚਾਰਟ ਵੀ ਸਾਂਝਾ ਕੀਤਾ ਗਿਆ। ਉਨ੍ਹਾਂ ਦੇ ਐਬਸ ਬਾਰੇ ਲੋਕਾਂ ਨੇ ਇਕ ਹੋਰ ਗੱਲ ਵੀ ਕਹੀ ਹੈ ਕਿ ਉਹ ਫਰਜ਼ੀ ਹਨ। ਮੈਂ ਉਨ੍ਹਾਂ ਐਬਸ ਨੂੰ ਪੰਚ ਕੀਤਾ ਹੈ, ਜੋ ਪੂਰੀ ਤਰ੍ਹਾਂ ਅਸਲੀ ਹਨ।’’

ਵਿਜੇਂਦਰ ਨੇ ਅੱਗੇ ਦੱਸਿਆ, ‘‘ਫ਼ਿਲਮ ਦਾ ਕਲਾਈਮੈਕਸ ਸ਼ੂਟ ਕਰਨਾ ਮੇਰੇ ਲਈ ਬਹੁਤ ਮੁਸ਼ਕਿਲ ਸੀ। ਸੀਨ ਅਜਿਹਾ ਸੀ ਕਿ ਮੈਨੂੰ ਸਲਮਾਨ ਖ਼ਾਨ ਦੇ ਸਿਰ ’ਤੇ ਪੱਥਰ ਨਾਲ ਤਿੰਨ-ਚਾਰ ਵਾਰ ਮਾਰਨਾ ਪਿਆ। ਇਹ ਕੰਮ ਮੇਰੇ ਲਈ ਬਹੁਤ ਮੁਸ਼ਕਿਲ ਸੀ, ਮੈਂ ਸਲਮਾਨ ਖ਼ਾਨ ਨੂੰ 2008 ਤੋਂ ਜਾਣਦਾ ਹਾਂ। ਉਹ ਸੀਨ ਕਰਦੇ ਸਮੇਂ ਮੈਂ ਬਹੁਤ ਝਿਜਕਿਆ ਸੀ। ਸਲਮਾਨ ਖ਼ਾਨ ਨੂੰ ਆਖਰਕਾਰ ਕਹਿਣਾ ਪਿਆ ਕਿ ਭਰਾ ਥੋੜ੍ਹੇ ਜ਼ੋਰ ਨਾਲ ਵੀ ਮਾਰ ਸਕਦਾ ਹੈ। ਅਸੀਂ ਉਸ ਸੀਨ ਦੀ ਸ਼ੂਟਿੰਗ ਮੁੰਬਈ ਦੇ ਸੈੱਟ ’ਤੇ ਕਰ ਰਹੇ ਸੀ। ਮੁੰਬਈ ਦੀ ਗਰਮੀ ਬਹੁਤ ਜ਼ਿਆਦਾ ਹੈ, ਸਵੇਰੇ 11 ਵਜੇ ਤੋਂ ਹੀ ਸ਼ੂਟਿੰਗ ਸ਼ੁਰੂ ਹੋ ਗਈ ਸੀ। ਮੈਂ ਉਸ ਸੀਨ ਲਈ ਲਗਭਗ 20 ਰੀਟੇਕ ਦਿੱਤੇ। ਸੈੱਟ ’ਤੇ ਖੜ੍ਹੇ ਸਾਰੇ ਪ੍ਰੋਡਕਸ਼ਨ ਲੋਕ ਵੀ ਮੇਰੇ ਰੀਟੇਕ ਤੇ ਗਰਮੀ ਤੋਂ ਪ੍ਰੇਸ਼ਾਨ ਨਜ਼ਰ ਆ ਰਹੇ ਸਨ। ਹਰ ਕੋਈ ਮੇਰੇ ਤੋਂ ਨਾਰਾਜ਼ ਸੀ। ਮੈਨੂੰ ਡਰ ਸੀ ਕਿ ਜੇ ਸੱਚਮੁੱਚ ਪੱਥਰ ਲੱਗ ਗਿਆ ਤਾਂ ਮੇਰੇ ਲਈ ਮੁਸੀਬਤ ਹੀ ਨਾ ਖੜ੍ਹੀ ਹੋ ਜਾਵੇ।’’

ਅਦਾਕਾਰੀ ਇਕ ਅਜਿਹਾ ਸਾਗਰ ਹੈ, ਜਿਸ ’ਚ ਤੁਸੀਂ ਜਿੰਨਾ ਡੁਬੋਗੇ, ਉੱਨਾ ਹੀ ਵਧੋਗੇ। ਸਾਨੂੰ ਹੀਰੋ ਤੇ ਅਦਾਕਾਰ ’ਚ ਫਰਕ ਸਮਝਣਾ ਚਾਹੀਦਾ ਹੈ। ਚੰਗਾ ਦਿਖਣ ਵਾਲਾ ਮੁੰਡਾ ਵਧੀਆ ਅਦਾਕਾਰ ਹੋਣਾ ਚਾਹੀਦਾ ਹੈ, ਇਹ ਜ਼ਰੂਰੀ ਨਹੀਂ ਹੈ। ਮੈਨੂੰ ਅਦਾਕਾਰੀ ਪਸੰਦ ਹੈ। ਮੈਂ ਆਪਣੀਆਂ ਸੀਮਾਵਾਂ ਤੋਂ ਪਾਰ ਜਾਣਾ ਤੇ ਆਪਣੀ ਇਸ ਪ੍ਰਤਿਭਾ ਨੂੰ ਖੋਜਣਾ ਚਾਹੁੰਦਾ ਹਾਂ।