ਇਸ ਦੇਸ਼ ‘ਚ ਯਾਦਗਾਰਾਂ ਤੇ ਵਿਰਾਸਤ ਨੂੰ ਨੁਕਸਾਨ ਪਹੁੰਚਾਉਣ ਵਾਲਿਆਂ ਨੂੰ ਲੱਗੇਗਾ ਭਾਰੀ ਜੁਰਮਾਨਾ

ਰੋਮ– ਇਟਲੀ ਦੇ ਸਮਾਰਕਾਂ ਅਤੇ ਸੱਭਿਆਚਾਰਕ ਸਥਾਨਾਂ ਨੂੰ ਨੁਕਸਾਨ ਪਹੁੰਚਾਉਣ ਵਾਲਿਆਂ ‘ਤੇ ਹੁਣ ਭਾਰੀ ਜੁਰਮਾਨਾ ਲਗਾਇਆ ਜਾਵੇਗਾ। ਇਟਲੀ ਦੀ ਕੈਬਨਿਟ ਨੇ ਇਸ ਯੋਜਨਾ ਨੂੰ ਮਨਜ਼ੂਰੀ ਦੇ ਦਿੱਤੀ ਹੈ। ਇਸ ਦੇ ਨਾਲ ਹੀ ਇਸ ਸਬੰਧੀ ਪ੍ਰਸਤਾਵਿਤ ਕਾਨੂੰਨ ਨੂੰ ਹੋਰ ਸਖ਼ਤ ਬਣਾਇਆ ਜਾਵੇਗਾ ਤਾਂ ਜੋ ਜੁਰਮਾਨੇ ਦੀ ਵਸੂਲੀ ਵਿੱਚ ਕੋਈ ਦਿੱਕਤ ਨਾ ਆਵੇ। ਇਟਲੀ ਦੀ ਕੈਬਨਿਟ ਨੇ 10,000 ਯੂਰੋ (9 ਲੱਖ ਰੁਪਏ) ਤੋਂ 60,000 ਯੂਰੋ (54 ਲੱਖ ਰੁਪਏ) ਦੇ ਵਿਚਕਾਰ ਜੁਰਮਾਨੇ ਦਾ ਪ੍ਰਸਤਾਵ ਰੱਖਿਆ ਹੈ।

ਇਸ ਕਾਨੂੰਨ ਦੇ ਲਾਗੂ ਹੋਣ ਨਾਲ ਸਮਾਰਕਾਂ ਜਾਂ ਹੋਰ ਸੱਭਿਆਚਾਰਕ ਥਾਵਾਂ ਨੂੰ ਨੁਕਸਾਨ ਪਹੁੰਚਾਉਣ ਵਾਲਿਆਂ ‘ਤੇ ਸ਼ਿਕੰਜਾ ਕੱਸਿਆ ਜਾ ਸਕਦਾ ਹੈ। ਇਸ ਦੇ ਨਾਲ ਹੀ ਉਨ੍ਹਾਂ ਦੇ ਨੁਕਸਾਨ ਦਾ ਮੁਆਵਜ਼ਾ ਵੀ ਉਨ੍ਹਾਂ ਤੋਂ ਵਸੂਲਿਆ ਜਾ ਸਕਦਾ ਹੈ। ਇਕ ਰਿਪੋਰਟ ਮੁਤਾਬਕ ਪ੍ਰਸਤਾਵਿਤ ਕਾਨੂੰਨ ਦਾ ਪ੍ਰਸਤਾਵ ਸੱਭਿਆਚਾਰ ਮੰਤਰੀ ਗੇਨਾਰੋ ਸਾਂਗਿਉਲਿਆਨੋ ਨੇ ਪੇਸ਼ ਕੀਤਾ ਸੀ, ਜਿਸ ਮੁਤਾਬਕ ਇਹ ਜੁਰਮਾਨਾ ਰਾਸ਼ੀ ਸਮਾਰਕ ਜਾਂ ਸਥਾਨ ਦੀ ਮੁਰੰਮਤ ਅਤੇ ਸਫਾਈ ‘ਤੇ ਖਰਚ ਕੀਤੀ ਜਾ ਸਕਦੀ ਹੈ। ਜਾਣਕਾਰੀ ਮੁਤਾਬਕ ਇਸ ਸਬੰਧੀ ਪ੍ਰਸਤਾਵ ਨੂੰ ਇਟਲੀ ਦੀ ਕੈਬਨਿਟ ਨੇ 11 ਅਪ੍ਰੈਲ ਨੂੰ ਮਨਜ਼ੂਰੀ ਦੇ ਦਿੱਤੀ ਹੈ। ਇਹ ਅੰਦਾਜ਼ਾ ਲਗਾਇਆ ਗਿਆ ਸੀ ਕਿ ਕਾਨੂੰਨ ਨੂੰ ਅਪਣਾਇਆ ਜਾਵੇਗਾ ਅਤੇ ਜਲਦੀ ਹੀ ਦਸਤਖ਼ਤ ਕਰਕੇ ਇਸ ਨੂੰ ਲਾਗੂ ਕੀਤਾ ਜਾਵੇਗਾ।

ਇਟਲੀ ਦੇ ਸੱਭਿਆਚਾਰ ਮੰਤਰੀ ਦੇ ਅਨੁਸਾਰ ਸਰਕਾਰ ਨੇ 15ਵੀਂ ਸਦੀ ਦੀ ਪਲਾਜ਼ੋ ਮਾਦਾਮਾ ਜਿਸ ਵਿੱਚ ਇਟਾਲੀਅਨ ਸੈਨੇਟ ਵੀ ਹੈ, ਦੇ ਸਾਹਮਣੇ ਵਾਲੇ ਖੇਤਰ ਦੀ ਸਫਾਈ ਲਈ 40,000 ਯੂਰੋ (36 ਲੱਖ ਰੁਪਏ) ਖਰਚ ਕੀਤੇ ਹਨ। ਸਪੈਨਿਸ਼ ਸਟੈਪਸ ਦੇ ਅਧਾਰ ‘ਤੇ ਬਰਨੀਨੀ ਦੁਆਰਾ ਇੱਕ ਵਿਸ਼ਾਲ ਝਰਨਾ ਬਣਾਇਆ ਗਿਆ ਸੀ। ਹਾਲ ਹੀ ਵਿੱਚ ਇਸ ਨੂੰ ਜਲਵਾਯੂ ਪਰਿਵਰਤਨ ਲਈ ਮੁਹਿੰਮ ਚਲਾਉਣ ਵਾਲਿਆਂ ਦੁਆਰਾ ਕਾਲਾ ਰੰਗ ਦਿੱਤਾ ਗਿਆ ਸੀ। ਸੰਗਿਉਲਿਆਨੋ ਨੇ ਇੱਕ ਬਿਆਨ ਵਿੱਚ ਕਿਹਾ ਕਿ ਸਮਾਰਕਾਂ ਅਤੇ ਕਲਾਤਮਕ ਸਥਾਨਾਂ ‘ਤੇ ਹਮਲਿਆਂ ਨਾਲ ਸਾਰਿਆਂ ਦਾ ਆਰਥਿਕ ਨੁਕਸਾਨ ਹੁੰਦਾ ਹੈ। ਉਨ੍ਹਾਂ ਕਿਹਾ ਕਿ ਇਸ ਦੀ ਸਫ਼ਾਈ ਲਈ ਉੱਚ ਮਾਹਿਰ ਕਰਮਚਾਰੀਆਂ ਦੇ ਦਖਲ ਅਤੇ ਬਹੁਤ ਮਹਿੰਗੀਆਂ ਮਸ਼ੀਨਾਂ ਦੀ ਵਰਤੋਂ ਦੀ ਲੋੜ ਹੈ। ਉਨ੍ਹਾਂ ਇਹ ਵੀ ਕਿਹਾ ਕਿ ਜੋ ਵੀ ਇਹ ਕੰਮ ਕਰਦਾ ਹੈ, ਉਸ ਨੂੰ ਵਿੱਤੀ ਜ਼ਿੰਮੇਵਾਰੀ ਵੀ ਨਿਭਾਉਣੀ ਚਾਹੀਦੀ ਹੈ।

ਜੂਨ 2022 ਵਿੱਚ ਦੋ ਅਮਰੀਕੀ ਸੈਲਾਨੀਆਂ ਨੂੰ ਜੁਰਮਾਨਾ ਲਗਾਇਆ ਗਿਆ ਸੀ। ਉਨ੍ਹਾਂ ਵਿੱਚੋਂ ਇੱਕ ਰੋਮ ਵਿੱਚ ਇੱਕ ਇਲੈਕਟ੍ਰਿਕ ਸਕੂਟਰ ਨੂੰ ਸਪੈਨਿਸ਼ ਸਟੈਪਸ ਤੋਂ ਹੇਠਾਂ ਘੁੰਮਾਉਂਦੇ ਹੋਏ ਕੈਮਰੇ ਵਿੱਚ ਫੜਿਆ ਗਿਆ, ਜਿਸ ਨਾਲ ਵਿਸ਼ਵ-ਪ੍ਰਸਿੱਧ ਲੈਂਡਮਾਰਕ ਨੂੰ 26,000 ਡਾਲਰ (21 ਲੱਖ ਰੁਪਏ) ਤੋਂ ਵੱਧ ਦਾ ਨੁਕਸਾਨ ਹੋਇਆ ਸੀ। ਇਸ ਮਾਮਲੇ ਵਿਚ ਪੁਲਸ ਨੇ 28 ਸਾਲਾ ਔਰਤ ਨੂੰ ਉਸ ਦੇ 29 ਸਾਲਾ ਪੁਰਸ਼ ਸਾਥੀ ਨਾਲ ਗ੍ਰਿਫ਼ਤਾਰ ਕੀਤਾ ਸੀ, ਜਿਸ ਨੇ 18ਵੀਂ ਸਦੀ ਦੀਆਂ ਸੰਗਮਰਮਰ ਦੀਆਂ ਪੌੜੀਆਂ ਤੋਂ ਹੇਠਾਂ ਆਪਣੀ ਈ-ਸਕੂਟਰ ਉਤਾਰਿਆ ਸੀ। ਇਸ ਮਾਮਲੇ ਵਿੱਚ ਔਰਤ ਨੂੰ 430 ਡਾਲਰ (35,000 ਰੁਪਏ) ਦਾ ਜੁਰਮਾਨਾ ਲਗਾਇਆ ਗਿਆ ਸੀ। ਅਧਿਕਾਰੀਆਂ ਨੇ ਦੱਸਿਆ ਕਿ ਈ-ਸਕੂਟਰ ਦੇ 16ਵੇਂ ਅਤੇ 29ਵੇਂ ਹਿੱਸੇ ‘ਤੇ ਦਰਾੜ ਪੈ ਗਈ ਸੀ ਅਤੇ ਹੋਰ ਹਿੱਸੇ ਟੁੱਟ ਗਏ ਸਨ।