ਸਾਬਕਾ ਪਾਕਿਸਤਾਨੀ ਜਨਰਲ ਨੇ ਸਿਵਲ-ਮਿਲਟਰੀ ਅਸੰਤੁਲਨ ਲਈ ਸਿਆਸੀ ਲੀਡਰਸ਼ਿਪ ਨੂੰ ਠਹਿਰਾਇਆ ਜ਼ਿੰਮੇਵਾਰ

ਇਸਲਾਮਾਬਾਦ– ਪਾਕਿਸਤਾਨ ਦੇ ਸਾਬਕਾ ਲੈਫਟੀਨੈਂਟ ਜਨਰਲ ਹਾਰੂਨ ਅਸਲਮ ਨੇ ਕਿਹਾ ਹੈ ਕਿ ਉਹ ਸਾਬਕਾ ਫੌਜ ਮੁਖੀ ਜਨਰਲ ਕਮਰ ਜਾਵੇਦ ਬਾਜਵਾ ਦੇ ਉਸ ਵਾਅਦੇ ਨੂੰ ਜ਼ਿਆਦਾ ਮਹੱਤਵ ਨਹੀਂ ਦਿੰਦੇ ਹਨ ਕਿ ਫ਼ੌਜ ਦੇਸ਼ ਦੀ ਰਾਜਨੀਤੀ ਤੋਂ ਦੂਰ ਰਹੇਗੀ। ਨਾਲ ਹੀ ਸਿਵਲ-ਫ਼ੌਜੀ ਅਸੰਤੁਲਨ ਨੂੰ ਵਧਾਉਣ ਲਈ ਸਿਆਸੀ ਲੀਡਰਸ਼ਿਪ ਨੂੰ ਜ਼ਿੰਮੇਵਾਰ ਠਹਿਰਾਇਆ। ਅਸਲਮ ਨੇ ਸ਼ਨੀਵਾਰ ਨੂੰ ਲੰਡਨ ਵਿਚ ਲੰਡਨ ਸਕੂਲ ਆਫ ਇਕਨਾਮਿਕਸ ਦੁਆਰਾ ਆਯੋਜਿਤ ‘ਫਿਊਚਰ ਆਫ ਪਾਕਿਸਤਾਨ ਕਾਨਫਰੰਸ’ ਦੇ ਸੈਸ਼ਨ ਨੂੰ ਸੰਬੋਧਨ ਕਰਦੇ ਹੋਏ ਇਹ ਟਿੱਪਣੀ ਕੀਤੀ। 

ਡਾਨ ਅਖ਼ਬਾਰ ਨੇ ਅਸਲਮ ਦੇ ਹਵਾਲੇ ਨਾਲ ਕਿਹਾ ਕਿ “ਇਮਰਾਨ ਖਾਨ ਨੇ ਜਨਰਲ ਬਾਜਵਾ ਨੂੰ ਐਕਸਟੈਨਸ਼ਨ ਕਿਉਂ ਦਿੱਤਾ? ਆਸਿਫ ਅਲੀ ਜ਼ਰਦਾਰੀ ਨੇ ਜਨਰਲ ਅਸ਼ਫਾਕ ਪਰਵੇਜ਼ ਕਿਆਨੀ ਦੀ ਸੇਵਾ ਮਿਆਦ ਕਿਉਂ ਵਧਾਈ? ਮੇਰਾ ਮੰਨਣਾ ਹੈ ਕਿ ਫ਼ੌਜ ਨੂੰ ਨਿਰਪੱਖ ਰਹਿਣਾ ਚਾਹੀਦਾ ਹੈ ਅਤੇ ਰਾਜਨੀਤੀ ਵਿਚ ਦਖਲ ਨਹੀਂ ਦੇਣਾ ਚਾਹੀਦਾ ਪਰ ਯਾਦ ਰੱਖੋ ਕਿ ਤੁਸੀਂ ਇਸ ਨੂੰ ਬੰਦ ਨਹੀਂ ਕਰ ਸਕਦੇ। ਉਸਨੇ ਪਾਕਿਸਤਾਨ ਦੀ ਸਿਆਸੀ ਲੀਡਰਸ਼ਿਪ ‘ਤੇ ਫ਼ੌਜ ਨੂੰ ਰਾਜਨੀਤੀ ਵਿਚ ਦਖਲ ਦੇਣ ਦੀ ਇਜਾਜ਼ਤ ਦੇਣ ਦਾ ਦੋਸ਼ ਵੀ ਲਗਾਇਆ। ਉਸਨੇ ਕਿਹਾ ਕਿ ਫ਼ੌਜ ਦਖਲ ਦੇਣ ਦੀ ਕੋਸ਼ਿਸ਼ ਨਹੀਂ ਕਰ ਰਹੀ ਹੈ ਪਰ “ਸਿਵਲੀਅਨ ਕੰਪੋਨੈਂਟ” ਨੇ ਫ਼ੌਜ ਨੂੰ ਮਹੱਤਵ ਦਿੱਤਾ ਹੈ। 

ਸੇਵਾਮੁਕਤ ਜਨਰਲ ਬਾਜਵਾ ਦੀਆਂ ਟਿੱਪਣੀਆਂ ਬਾਰੇ ਪੁੱਛੇ ਜਾਣ ‘ਤੇ ਸਾਬਕਾ ਲੈਫਟੀਨੈਂਟ ਜਨਰਲ ਨੇ ਕਿਹਾ ਕਿ “ਮੈਂ ਇਸ ਨੂੰ ਮਹੱਤਵ ਨਹੀਂ ਦਿੰਦਾ। ਉਸਨੇ ਆਪਣਾ ਕਾਰਜਕਾਲ ਪੂਰਾ ਕੀਤਾ ਅਤੇ ਫਿਰ ਆਖਰਕਾਰ ਇਹ ਕਿਹਾ। ਬਾਹਰ ਜਾਣ ਵਾਲਾ ਮੁਖੀ ਕੀ ਕਹਿੰਦਾ ਹੈ ਕੋਈ ਮਹੱਤਵ ਨਹੀਂ ਰੱਖਦਾ।” ਉਸਨੇ ਪਾਕਿਸਤਾਨ ਤਹਿਰੀਕ-ਏ-ਇਨਸਾਫ ਦੇ ਮੁਖੀ ਇਮਰਾਨ ਖਾਨ ਅਤੇ ਹੋਰ ਨਾਗਰਿਕ ਨੇਤਾਵਾਂ ਦੀ ਨਾਗਰਿਕ-ਫ਼ੌਜੀ ਅਸੰਤੁਲਨ ਨੂੰ ਵਧਾਉਣ ਲਈ ਆਲੋਚਨਾ ਕੀਤੀ। ਹਾਲਾਂਕਿ ਵੁੱਡਰੋ ਵਿਲਸਨ ਸੈਂਟਰ ਦੇ ਇੱਕ ਸਾਥੀ ਮਾਈਕਲ ਕੁਗਲਮੈਨ ਨੇ ਨਾਗਰਿਕ ਲੀਡਰਸ਼ਿਪ ਦਾ ਬਚਾਅ ਕੀਤਾ। ਉਸ ਨੇ ਕਿਹਾ ਕਿ “ਨਿਰਪੱਖ ਤਾਕਤਾਂ ਉਦੋਂ ਹੀ ਸੰਭਵ ਹੁੰਦੀਆਂ ਹਨ ਜਦੋਂ ਨੇਤਾ ਇਹ ਫ਼ੈਸਲਾ ਕਰਦੇ ਹਨ ਕਿ ਉਨ੍ਹਾਂ ਨੂੰ ਫ਼ੌਜ ਨਾਲ ਕੰਮ ਕਰਨ ਦੀ ਜ਼ਰੂਰਤ ਨਹੀਂ ਹੈ, ਪਰ ਬਦਕਿਸਮਤੀ ਨਾਲ ਨੇਤਾਵਾਂ ਕੋਲ ਅਕਸਰ ਕੋਈ ਵਿਕਲਪ ਨਹੀਂ ਹੁੰਦਾ,”। ਉਹਨਾਂ ਦੀ ਆਪਣੇ ਅਤੇ ਫ਼ੌਜ ਵਿਚਾਲੇ ਚੰਗੇ ਸਬੰਧ ਬਣਾਏ ਰੱਖਣ ਦੀ ਇੱਛਾ ਹੁੰਦੀ ਹੈ।