ਨਿਊਜ਼ੀਲੈਂਡ ‘ਚ ‘ਚੱਕਰਵਾਤ’ ਕਾਰਨ ਵਿਗੜੇ ਹਾਲਾਤ,8 ਲੋਕਾਂ ਦੀ ਮੌਤ ਦੀ ਪੁਸ਼ਟੀ

ਵੈਲਿੰਗਟਨ : ਨਿਊਜ਼ੀਲੈਂਡ ਦੇ ਉੱਤਰੀ ਟਾਪੂ ‘ਤੇ 12 ਫਰਵਰੀ ਨੂੰ ਆਏ ਚੱਕਰਵਾਤ ਗੈਬਰੀਏਲ ਕਾਰਨ ਮਰਨ ਵਾਲਿਆਂ ਦੀ ਗਿਣਤੀ ਅੱਠ ਹੋ ਗਈ ਹੈ| ਦੇਸ਼ ਵਿੱਚ ਦਹਾਕਿਆਂ ਦੀ ਸਭ ਤੋਂ ਵਿਨਾਸ਼ਕਾਰੀ ਮੌਸਮੀ ਘਟਨਾ ਕਾਰਨ ਚਾਰ ਦਿਨਾਂ ਤੋਂ 4,500 ਤੋਂ ਵੱਧ ਲੋਕ ਅਜੇ ਵੀ ਲਾਪਤਾ ਹਨ। ਪ੍ਰਧਾਨ ਮੰਤਰੀ ਨੇ ਇਕ ਬਿਆਨ ਵਿਚ ਇਹ ਜਾਣਕਾਰੀ ਦਿੱਤੀ। ਪੁਲਸ ਦੀ ਰਿਪੋਰਟ ਹੈ ਕਿ 4,549 ਵਿਅਕਤੀ ਸੰਪਰਕ ਤੋਂ ਬਾਹਰ ਹਨ। ਇਸ ਪੱਧਰ ਦੇ ਹਾਲਾਤ ਨਿਊਜ਼ੀਲੈਂਡ ਨੇ ਫਰਵਰੀ 2011 ਵਿੱਚ ਕ੍ਰਾਈਸਟਚਰਚ ਭੂਚਾਲ ਤੋਂ ਬਾਅਦ ਨਹੀਂ ਦੇਖੇ ਸਨ। ਸਮਾਚਾਰ ਏਜੰਸੀ ਸ਼ਿਨਹੂਆ ਦੀ ਰਿਪੋਰਟ ਅਨੁਸਾਰ ਪ੍ਰਧਾਨ ਮੰਤਰੀ ਕ੍ਰਿਸ ਹਿਪਕਿਨਜ਼ ਨੇ ਹਾਕਸ ਬੇਅ ਵਿਚ ਸ਼ੁੱਕਰਵਾਰ ਨੂੰ ਮੀਡੀਆ ਨੂੰ ਕਿਹਾ ਕਿ “ਇਹ ਇਸ ਸਦੀ ਦੀ ਸਭ ਤੋਂ ਵੱਡੀ ਕੁਦਰਤੀ ਆਫ਼ਤ ਹੈ, ਜਿਸ ਵਿਚ ਕਾਫ਼ੀ ਨੁਕਸਾਨ ਹੋਇਆ ਹੈ।”

ਭਿਆਨਕ ਤੂਫ਼ਾਨ ਵਿੱਚ ਹੋਈਆਂ ਅੱਠ ਮੌਤਾਂ ਵਿੱਚ ਇੱਕ ਬੱਚਾ ਵੀ ਸ਼ਾਮਲ ਹੈ, ਜਿਸਦੀ ਲਾਸ਼ ਸ਼ੁੱਕਰਵਾਰ ਨੂੰ ਐਸਕਡੇਲ ਵਿੱਚ ਮਿਲੀ ਸੀ। ਪੁਲਸ ਨੇ ਕਿਹਾ ਕਿ ਮੰਨਿਆ ਜਾਂਦਾ ਹੈ ਕਿ ਦੋ ਸਾਲ ਦੀ ਬੱਚੀ ਵੀਰਵਾਰ ਨੂੰ ਵੱਗਦੇ ਪਾਣੀ ਵਿੱਚ ਫਸ ਗਈ ਸੀ। ਵੀਰਵਾਰ ਨੂੰ ਆਕਲੈਂਡ ਦੇ ਮੁਰੀਵਾਈ ਵਿੱਚ ਢਿੱਗਾਂ ਡਿੱਗਣ ਤੋਂ ਬਾਅਦ ਇੱਕ ਵਲੰਟੀਅਰ ਫਾਇਰ ਫਾਈਟਰ ਦੀ ਵੀ ਲਾਸ਼ ਬਰਾਮਦ ਕੀਤੀ ਗਈ ਸੀ। ਵੀਰਵਾਰ ਅਤੇ ਸ਼ੁੱਕਰਵਾਰ ਨੂੰ ਮਰਨ ਵਾਲਿਆਂ ਦੀ ਗਿਣਤੀ ਤੇਜ਼ੀ ਨਾਲ ਵਧੀ।ਜਦੋਂ ਕਿ ਵੱਡੀ ਗਿਣਤੀ ਵਿੱਚ ਲਾਪਤਾ ਰਿਪੋਰਟਾਂ ਸੰਚਾਰ ਲਾਈਨਾਂ ਦੇ ਖਰਾਬ ਹੋਣ ਦੇ ਨਤੀਜੇ ਵਜੋਂ ਘੱਟ ਦਰਜ ਹੋਈਆਂ ਹਨ। ਫਿਲਹਾਲ ਪੁਲਸ ਪੁਸ਼ਟੀ ਕਰ ਸਕਦੀ ਹੈ ਕਿ ਹਾਕਸ ਬੇਅ ਅਤੇ ਟਾਈਰਾਵਿਟੀ ਖੇਤਰਾਂ ਵਿੱਚ ਕਿੰਨੇ ਲੋਕ ਲਾਪਤਾ ਹਨ।

ਪੁਲਸ ਨੇ ਕਿਹਾ ਕਿ “ਜਿਵੇਂ ਹੀ ਦੂਰਸੰਚਾਰ ਸੇਵਾਵਾਂ ਆਨਲਾਈਨ ਚਾਲੂ ਹੋਣਗੀਆਂ ਸਾਨੂੰ ਲਾਪਤਾ ਲੋਕਾਂ, ਲੱਭੇ ਗਏ ਲੋਕਾਂ, ਜਾਇਦਾਦ ਨੂੰ ਨੁਕਸਾਨ ਪਹੁੰਚਾਉਣ ਅਤੇ ਭੋਜਨ, ਪਾਣੀ ਅਤੇ ਈਂਧਨ ਵਰਗੇ ਬੁਨਿਆਦੀ ਸਰੋਤਾਂ ਦੀ ਮੰਗ ਦੀਆਂ ਰਿਪੋਰਟਾਂ ਦੀ ਗਿਣਤੀ ਵਿੱਚ ਵਾਧੇ ਦੀ ਉਮੀਦ ਹੈ। ਉੱਧਰ ਪੂਰਬੀ ਤੱਟ ‘ਤੇ ਗਿਸਬੋਰਨ ਨਿਵਾਸੀਆਂ ਨੂੰ ਪਾਣੀ ਦੀ ਵਰਤੋਂ ਬੰਦ ਕਰਨ ਲਈ ਕਿਹਾ ਗਿਆ ਕਿਉਂਕਿ ਖੇਤਰ ਦਾ ਵਾਟਰ ਪਲਾਂਟ ਫੇਲ੍ਹ ਹੋ ਗਿਆ ਹੈ। ਪੁਲਸ ਨੇ ਕਿਹਾ ਕਿ ਰਿਕਵਰੀ ਯਤਨਾਂ ਨੂੰ ਵਧਾਉਣ ਲਈ ਨਿਊਜ਼ੀਲੈਂਡ ਦੇ ਹੋਰ ਹਿੱਸਿਆਂ ਤੋਂ ਹਾਕਸ ਬੇਅ ਅਤੇ ਟਾਇਰਾਵਿਟੀ ਤੱਕ 70 ਤੋਂ ਵੱਧ ਸਟਾਫ ਨੂੰ ਦੁਬਾਰਾ ਤਾਇਨਾਤ ਕੀਤਾ ਗਿਆ ਹੈ। ਇੱਥੇ ਦੱਸ ਦਈਏ ਕਿ ਨਿਊਜ਼ੀਲੈਂਡ ਨੇ ਦੇਸ਼ ਦੇ ਇਤਿਹਾਸ ਵਿਚ ਤੀਜੀ ਵਾਰ ਸੋਮਵਾਰ ਨੂੰ ਐਮਰਜੈਂਸੀ ਦੀ ਸਥਿਤੀ ਘੋਸ਼ਿਤ ਕੀਤੀ, ਜਿਸ ਮਗਰੋਂ ਉੱਤਰੀ ਆਈਲੈਂਡ ਵਿੱਚ ਵਿਆਪਕ ਬਿਜਲੀ ਬੰਦ ਹੋਣ, ਉਡਾਣ ਰੱਦ ਕਰਨ ਅਤੇ ਸਕੂਲ ਬੰਦ ਹੋ ਗਏ।