ਆਸਟ੍ਰੇਲੀਆ ‘ਚ 365 ਕਿਲੋਗ੍ਰਾਮ ਕੋਕੀਨ ਜ਼ਬਤ, ਮਾਮਲੇ ਦੀ ਅੰਤਰਰਾਸ਼ਟਰੀ ਜਾਂਚ ਸ਼ੁਰੂ

ਸਿਡਨੀ : ਆਸਟ੍ਰੇਲੀਆ ਵਿਖੇ ਪੱਛਮੀ ਆਸਟ੍ਰੇਲੀਆ (ਡਬਲਯੂਏ) ਦੇ ਗ੍ਰੇਟ ਦੱਖਣੀ ਖੇਤਰ ਵਿਚ ਪੁਲਸ ਨੇ ਲਗਭਗ 365 ਕਿਲੋਗ੍ਰਾਮ ਕੋਕੀਨ ਜ਼ਬਤ ਕੀਤੀ। ਹੁਣ ਇਸ ਮਾਮਲੇ ਸਬੰਧੀ ਅੰਤਰਰਾਸ਼ਟਰੀ ਨਸ਼ੀਲੇ ਪਦਾਰਥਾਂ ਦੀ ਤਸਕਰੀ ਦੀ ਜਾਂਚ ਸ਼ੁਰੂ ਕੀਤੀ ਗਈ ਹੈ। ਆਸਟ੍ਰੇਲੀਅਨ ਫੈਡਰਲ ਪੁਲਸ (ਏਐਫਪੀ) ਅਤੇ ਆਸਟ੍ਰੇਲੀਅਨ ਬਾਰਡਰ ਫੋਰਸ ਦੁਆਰਾ ਮੰਗਲਵਾਰ ਨੂੰ ਜਾਰੀ ਕੀਤੇ ਗਏ ਇੱਕ ਸਾਂਝੇ ਬਿਆਨ ਦੇ ਅਨੁਸਾਰ ਇਹ ਜਾਂਚ ਉਦੋਂ ਸ਼ੁਰੂ ਹੋਈ ਜਦੋਂ 1 ਫਰਵਰੀ ਨੂੰ ਅਲਬਾਨੀ ਦੇ ਸਮੁੰਦਰ ਤੋਂ ਤਿੰਨ ਵਿਅਕਤੀਆਂ ਨੂੰ ਬਚਾਇਆ ਗਿਆ ਸੀ ਅਤੇ ਮੱਛੀਆਂ ਫੜਨ ਦੌਰਾਨ ਉਨ੍ਹਾਂ ਦੇ ਡੁੱਬਣ ਦੀ ਕਹਾਣੀ ਸ਼ੱਕੀ ਦਿਖਾਈ ਦਿੱਤੀ।

7 ਫਰਵਰੀ ਨੂੰ ਡੈਨਮਾਰਕ ਦੇ WA ਕਸਬੇ ਨੇੜੇ ਪਲਾਸਟਿਕ ਨਾਲ ਲਪੇਟੇ ਇਕ ਕਾਲੇ ਪੈਕੇਟ ਵਿਚ ਕੋਕੀਨ ਦੇ ਕਈ ਛੋਟੇ ਪੈਕੇਟ ਸਨ, ਜੋ ਸਮੁੰਦਰੀ ਕਿਨਾਰੇ ਧੋਤੇ ਗਏ। ਜਦੋਂ ਕਿ ਅਗਲੀ ਦੁਪਹਿਰ ਇੱਕ 7 ਮੀਟਰ ਦੀ ਕਿਸ਼ਤੀ ਡੈਨਮਾਰਕ ਤੋਂ ਲਗਭਗ 45 ਕਿਲੋਮੀਟਰ ਪੱਛਮ ਵਿੱਚ ਪੀਸਫੁੱਲ ਬੇ ਕੋਲ ਪਲਟੀ ਪਾਈ ਗਈ।ਪੁਲਸ ਅਫਸਰਾਂ ਨੂੰ ਪਲਾਸਟਿਕ ਨਾਲ ਲਪੇਟੇ ਅੱਠ ਹੋਰ ਪੈਕੇਜ ਮਿਲੇ, ਜਿਹਨਾਂ ਵਿਚੋਂ ਹਰ ਇੱਕ ਵਿੱਚ ਲਗਭਗ 40 ਕਿਲੋ ਕੋਕੀਨ ਸੀ। ਏਐਫਪੀ ਦੇ ਕਾਰਜਕਾਰੀ ਕਮਾਂਡਰ ਗ੍ਰੀਮ ਮਾਰਸ਼ਲ ਨੇ ਤਿੰਨ ਆਦਮੀਆਂ – ਦੋ WA ਤੋਂ ਅਤੇ ਇੱਕ ਉੱਤਰੀ ਖੇਤਰ ਵਿੱਚ ਮੰਨਿਆ ਜਾਂਦਾ ਹੈ – ਨੂੰ ਪੁਲਸ ਨਾਲ ਸੰਪਰਕ ਕਰਨ ਦੀ ਅਪੀਲ ਕੀਤੀ।

ਮਾਰਸ਼ਲ ਨੇ ਕਿਹਾ ਕਿ “ਏਐਫਪੀ ਦਾ ਅੰਦਾਜ਼ਾ ਹੈ ਕਿ ਇਸ ਜ਼ਬਤੀ ਨੇ ਭਾਈਚਾਰੇ ਨੂੰ ਡਰੱਗ-ਸਬੰਧਤ ਨੁਕਸਾਨ ਵਿੱਚ 235 ਮਿਲੀਅਨ ਆਸਟ੍ਰੇਲੀਅਨ ਡਾਲਰ ਤੋਂ ਬਚਾਇਆ ਹੈ, ਜਿਸ ਵਿੱਚ ਸਬੰਧਿਤ ਅਪਰਾਧ, ਸਿਹਤ ਸੰਭਾਲ ਅਤੇ ਉਤਪਾਦਕਤਾ ਦੇ ਨੁਕਸਾਨ ਸ਼ਾਮਲ ਹਨ,”। ਕਮਾਂਡਰ ਨੇ ਅੱਗੇ ਕਿਹਾ ਕਿ “ਸਾਡਾ ਮੰਨਣਾ ਹੈ ਕਿ ਕੋਕੀਨ ਦੀ ਇਹ ਮਾਤਰਾ ਪੂਰੇ ਆਸਟ੍ਰੇਲੀਆ ਵਿੱਚ ਭੇਜੀ ਗਈ ਹੋਵੇਗੀ ਨਾ ਕਿ ਸਿਰਫ WA ਵਿੱਚ।”