ਜਰਮਨੀ ‘ਚ ਲਾਂਚ ਦੁਨੀਆ ਦੀ ਪਹਿਲੀ ‘ਹਾਈਡ੍ਰੋਜਨ ਟ੍ਰੇਨ’, ਲਵੇਗੀ ਡੀਜ਼ਲ ਟ੍ਰੇਨਾਂ ਦੀ ਜਗ੍ਹਾ

ਬਰਲਿਨ : ਜਰਮਨੀ ਰਾਜ ਦੇ ਲੋਅਰ ਸੈਕਸਨੀ ਵਿੱਚ ਦੁਨੀਆ ਦਾ ਪਹਿਲਾ ਹਾਈਡ੍ਰੋਜਨ ਨਾਲ ਚੱਲਣ ਵਾਲਾ ਯਾਤਰੀ ਰੇਲ ਨੈੱਟਵਰਕ ਲਾਂਚ ਕੀਤਾ ਗਿਆ ਹੈ। ਚਾਰ ਸਾਲ ਪਹਿਲਾਂ ਇਸ ਦੀ ਜਾਂਚ ਸ਼ੁਰੂ ਹੋਈ ਸੀ। ਸਮਚਾਰ ਏਜੰਸੀ ਸ਼ਿਨਹੂਆ ਨੇ ਲੋਅਰ ਸੈਕਸਨੀ, ਐਲਐਨਵੀਜੀ ਦੇ ਸਥਾਨਕ ਟਰਾਂਸਪੋਰਟ ਅਥਾਰਟੀ ਦੇ ਹਵਾਲੇ ਨਾਲ ਬੁੱਧਵਾਰ ਨੂੰ ਕਿਹਾ ਕਿ ਫ੍ਰੈਂਚ ਨਿਰਮਾਤਾ ਅਲਸਟਮ ਦੁਆਰਾ ਬਣਾਈ ਗਈ ਹਾਈਡ੍ਰੋਜਨ ਫਿਊਲ ਸੈੱਲ ਡਰਾਈਵ ਵਾਲੀਆਂ 14 ਟ੍ਰੇਨਾਂ ਡੀਜ਼ਲ ਟ੍ਰੇਨਾਂ ਦੀ ਥਾਂ ਲੈਣਗੀਆਂ। ਨਵੀਆਂ ਟਰੇਨਾਂ ਵਿੱਚੋਂ ਪੰਜ ਪਹਿਲਾਂ ਹੀ ਚਾਲੂ ਹਨ, ਜਦੋਂ ਕਿ ਹੋਰ ਇਸ ਸਾਲ ਦੇ ਅੰਤ ਤੱਕ ਚੱਲਣੀਆਂ ਹਨ।

ਲੋਅਰ ਸੈਕਸਨੀ ਦੇ ਮੰਤਰੀ ਸਟੀਫਨ ਵੇਲ ਨੇ ਕਿਹਾ ਕਿ ਇਹ ਪ੍ਰੋਜੈਕਟ ਦੁਨੀਆ ਭਰ ਵਿੱਚ ਇੱਕ ਰੋਲ ਮਾਡਲ ਹੈ। ਨਵਿਆਉਣਯੋਗ ਊਰਜਾ ਦੇ ਰਾਜ ਵਜੋਂ, ਅਸੀਂ ਇਸ ਤਰ੍ਹਾਂ ਟਰਾਂਸਪੋਰਟ ਸੈਕਟਰ ਵਿੱਚ ਜਲਵਾਯੂ ਨਿਰਪੱਖਤਾ ਦੇ ਮਾਰਗ ‘ਤੇ ਇੱਕ ਮੀਲ ਪੱਥਰ ਸਥਾਪਤ ਕਰ ਰਹੇ ਹਾਂ। LNVG ਨੇ ਕਿਹਾ ਕਿ ਦੋ ਸਾਲਾਂ ਦੇ ਟਰਾਇਲ ਓਪਰੇਸ਼ਨ ਦੌਰਾਨ, ਦੋ ਪ੍ਰੀ-ਸੀਰੀਜ਼ ਟ੍ਰੇਨਾਂ ਬਿਨਾਂ ਕਿਸੇ ਸਮੱਸਿਆ ਦੇ ਚੱਲੀਆਂ। ਪ੍ਰੋਜੈਕਟ ਦੀ ਕੁੱਲ ਲਾਗਤ ਲਗਭਗ 93 ਮਿਲੀਅਨ ਯੂਰੋ ਹੈ।

CO2 ਦੇ ਨਿਕਾਸ ਵਿੱਚ 4,400 ਟਨ ਦੀ ਕਮੀ ਦੀ ਉਮੀਦ 

ਅਲਸਟਮ ਨੇ ਇੱਕ ਬਿਆਨ ਵਿੱਚ ਕਿਹਾ ਕਿ ਕੋਰਾਡੀਆ ਆਈਲਿੰਟ ਐਮੀਸ਼ਨ-ਮੁਕਤ ਹਾਈਡ੍ਰੋਜਨ ਫਿਊਲ ਸੈਲ ਟ੍ਰੇਨਾਂ ਦੀ ਰੇਂਜ 1,000 ਕਿਲੋਮੀਟਰ ਹੈ, ਜਿਸ ਨਾਲ ਉਹ ਹਾਈਡ੍ਰੋਜਨ ਦੇ ਸਿਰਫ ਇੱਕ ਟੈਂਕ ‘ਤੇ ਪੂਰਾ ਦਿਨ ਚੱਲ ਸਕਦੀਆਂ ਹਨ। LNVG ਦੇ ਅਨੁਸਾਰ ਟ੍ਰੇਨਾਂ 1.6 ਮਿਲੀਅਨ ਲੀਟਰ ਡੀਜ਼ਲ ਦੀ ਬਚਤ ਕਰਨਗੀਆਂ ਅਤੇ ਇਸ ਤਰ੍ਹਾਂ ਪ੍ਰਤੀ ਸਾਲ 4,400 ਟਨ ਤੱਕ ਕਾਰਬਨ ਡਾਈਆਕਸਾਈਡ ਦੇ ਨਿਕਾਸ ਨੂੰ ਘਟਾਏਗੀ। ਟਰੇਨ ਦੀ ਵੱਧ ਤੋਂ ਵੱਧ ਰਫ਼ਤਾਰ 140 ਕਿਲੋਮੀਟਰ ਪ੍ਰਤੀ ਘੰਟਾ ਹੈ। LNVG ਦੇ ਬੁਲਾਰੇ ਡਰਕ ਅਲਟਵਿਗ ਨੇ ਸ਼ਿਨਹੂਆ ਨੂੰ ਦੱਸਿਆ ਕਿ ਅਸੀਂ ਭਵਿੱਖ ਵਿੱਚ ਕੋਈ ਹੋਰ ਡੀਜ਼ਲ ਰੇਲ ਗੱਡੀਆਂ ਨਹੀਂ ਖਰੀਦਾਂਗੇ।

ਪੁਰਾਣੀਆਂ ਡੀਜ਼ਲ ਗੱਡੀਆਂ ਨੂੰ ਬਦਲਿਆ ਜਾਵੇ’

ਉਨ੍ਹਾਂ ਕਿਹਾ ਕਿ ਵਰਤੋਂ ਵਿੱਚ ਆਉਣ ਵਾਲੀਆਂ ਹੋਰ ਪੁਰਾਣੀਆਂ ਡੀਜ਼ਲ ਗੱਡੀਆਂ ਨੂੰ ਬਾਅਦ ਵਿੱਚ ਬਦਲਿਆ ਜਾਣਾ ਚਾਹੀਦਾ ਹੈ। ਕੰਪਨੀ ਨੇ ਅਜੇ ਇਹ ਫ਼ੈਸਲਾ ਨਹੀਂ ਕੀਤਾ ਹੈ ਕਿ ਹਾਈਡ੍ਰੋਜਨ ਜਾਂ ਬੈਟਰੀ ਨਾਲ ਚੱਲਣ ਵਾਲੀਆਂ ਟ੍ਰੇਨਾਂ ਨੂੰ ਚਲਾਉਣਾ ਹੈ ਜਾਂ ਨਹੀਂ। ਜਰਮਨੀ ਨੇ 1990 ਦੇ ਪੱਧਰ ਦੇ ਮੁਕਾਬਲੇ 2030 ਤੱਕ ਗ੍ਰੀਨਹਾਊਸ ਗੈਸਾਂ ਦੇ ਨਿਕਾਸ ਨੂੰ 65 ਪ੍ਰਤੀਸ਼ਤ ਤੱਕ ਘਟਾਉਣ ਦਾ ਟੀਚਾ ਰੱਖਿਆ ਹੈ।