ਚੀਨੀ ਜਾਸੂਸੀ ਗੁਬਾਰੇ ਘਟਨਾਕ੍ਰਮ ਤੋਂ ਬਾਅਦ ਆਸਟ੍ਰੇਲੀਆ ਦੇ ਰੱਖਿਆ ਵਿਆਗ ਨੇ ਚੁੱਕਿਆ ਵੱਡਾ ਕਦਮ

ਕੈਨਬਰਾ – ਅਮਰੀਕਾ ਦੇ ਹਵਾਈ ਖੇਤਰ ਵਿੱਚ ਇੱਕ ਚੀਨੀ ਜਾਸੂਸੀ ਗੁਬਾਰੇ ਦੇ ਮਿਲਣ ਤੋਂ ਬਾਅਦ ਚੀਨ ਦੇ ਨਿਗਰਾਨੀ ਪ੍ਰੋਗਰਾਮ ਬਾਰੇ ਸਵਾਲਾਂ ਦਰਮਿਆਨ ਆਸਟ੍ਰੇਲੀਆਈ ਸਰਕਾਰ ਨੇ ‘ਕਮਿਊਨਿਸਟ ਪਾਰਟੀ ਆਫ ਚਾਈਨਾ’ ਨਾਲ ਜੁੜੀਆਂ ਕੰਪਨੀਆਂ ਵੱਲੋਂ ਬਣਾਏ ਗਏ ਨਿਗਰਾਨੀ ਕੈਮਰਿਆਂ ਨੂੰ ਆਪਣੇ ਰੱਖਿਆ ਵਿਭਾਗ ਦੀਆਂ ਇਮਾਰਤਾਂ ਤੋਂ ਹਟਾਉਣ ਦਾ ਫ਼ੈਸਲਾ ਕੀਤਾ ਹੈ। ਆਸਟ੍ਰੇਲੀਆ ਦੇ ਇਸ ਫ਼ੈਸਲੇ ਤੋਂ ਪਹਿਲਾਂ ਅਮਰੀਕਾ ਅਤੇ ਬ੍ਰਿਟੇਨ ਵੀ ਇਹ ਕਦਮ ਚੁੱਕ ਚੁੱਕੇ ਹਨ। 

ਆਸਟ੍ਰੇਲੀਆਈ ਅਖ਼ਬਾਰ ਨੇ ਵੀਰਵਾਰ ਨੂੰ ਦੱਸਿਆ ਕਿ ਚੀਨੀ ਕੰਪਨੀਆਂ ਹਿਕਵਿਜ਼ਨ ਅਤੇ ਦਾਹੂਆ ਦੁਆਰਾ ਵਿਕਸਤ ਅਤੇ ਨਿਰਮਿਤ ਘੱਟੋ-ਘੱਟ 913 ਕੈਮਰੇ, ਇੰਟਰਕਾਮ, ਇਲੈਕਟ੍ਰਾਨਿਕ ਐਂਟਰੀ ਸਿਸਟਮ ਅਤੇ ਵੀਡੀਓ ਰਿਕਾਰਡਰ ਆਸਟ੍ਰੇਲੀਆਈ ਸਰਕਾਰ ਅਤੇ ਏਜੰਸੀ ਦੇ ਦਫਤਰਾਂ ਵਿੱਚ ਲਗਾਏ ਗਏ ਹਨ, ਜਿਸ ਵਿੱਚ ਰੱਖਿਆ ਵਿਭਾਗ ਅਤੇ ਵਪਾਰ ਅਤੇ ਵਿਦੇਸ਼ੀ ਮਾਮਲਿਆਂ ਦੇ ਵਿਭਾਗ ਵੀ ਸ਼ਾਮਲ ਹਨ। Hikvision ਅਤੇ Dahua ਅੰਸ਼ਕ ਤੌਰ ‘ਤੇ ਚੀਨੀ ਕਮਿਊਨਿਸਟ ਪਾਰਟੀ ਸ਼ਾਸਿਤ ਸਰਕਾਰ ਦੀ ਮਲਕੀਅਤ ਹਨ। 

ਅਮਰੀਕੀ ਸਰਕਾਰ ਨੇ ਨਵੰਬਰ ਵਿੱਚ ਕਈ ਚੀਨੀ ਬ੍ਰਾਂਡਾਂ ਦੇ ਦੂਰਸੰਚਾਰ ਅਤੇ ਵੀਡੀਓ ਨਿਗਰਾਨੀ ਉਪਕਰਣਾਂ ‘ਤੇ ਪਾਬੰਦੀ ਲਗਾ ਦਿੱਤੀ ਸੀ। ਯੂਕੇ ਸਰਕਾਰ ਨੇ ਨਵੰਬਰ ਵਿੱਚ ਹਿਕਵਿਜ਼ਨ ਦੁਆਰਾ ਨਿਰਮਿਤ ਸੁਰੱਖਿਆ ਕੈਮਰਿਆਂ ‘ਤੇ ਵੀ ਪਾਬੰਦੀ ਲਗਾ ਦਿੱਤੀ ਸੀ। ਆਸਟ੍ਰੇਲੀਆ ਦੇ ਰੱਖਿਆ ਮੰਤਰੀ ਰਿਚਰਡ ਮਾਰਲਸ ਨੇ ਕਿਹਾ ਕਿ ਉਨ੍ਹਾਂ ਦਾ ਵਿਭਾਗ ਆਪਣੀਆਂ ਸਾਰੀਆਂ ਨਿਗਰਾਨੀ ਤਕਨੀਕਾਂ ਦੀ ਸਮੀਖਿਆ ਕਰ ਰਿਹਾ ਹੈ। ਉਸਨੇ ਆਸਟ੍ਰੇਲੀਅਨ ਬ੍ਰੌਡਕਾਸਟਿੰਗ ਕਾਰਪੋਰੇਸ਼ਨ ਨੂੰ ਦੱਸਿਆ ਕਿ “ਜਿੱਥੇ ਵੀ ਉਹ ਵਿਸ਼ੇਸ਼ ਕੈਮਰੇ ਪਾਏ ਜਾਣਗੇ, ਉਨ੍ਹਾਂ ਨੂੰ ਹਟਾ ਦਿੱਤਾ ਜਾਵੇਗਾ।