ਮੈਰੀਅਟ ਹੋਟਲ ’ਚ ਅਮਰੀਕੀ ਨਾਗਰਿਕਾਂ ’ਤੇ ਅਤਿਵਾਦੀ ਹਮਲੇ ਦਾ ਖਤਰਾ

ਇਸਲਾਮਾਬਾਦ, 26 ਦਸੰਬਰ-: ਪਾਕਿਸਤਾਨ ਸਥਿਤ ਅਮਰੀਕੀ ਅੰਬੈਸੀ ਇੱਥੇ ਦੇਸ਼ ਦੀ ਰਾਜਧਾਨੀ ਸਥਿਤ ਮੈਰੀਅਟ ਹੋਟਲ ਵਿੱਚ ਅਮਰੀਕੀ ਨਾਗਰਿਕਾਂ ’ਤੇ ਅਤਿਵਾਦੀ ਹਮਲੇ ਦੇ ਖਦਸ਼ੇ ਨੂੰ ਲੈ ਕੇ ਅਲਰਟ ਜਾਰੀ ਕੀਤਾ ਹੈ ਤੇ ਅਮਰੀਕੀ ਮੁਲਾਜ਼ਮਾਂ ਦੇ ਇਸ ਪੰਜ ਤਾਰਾ ਹੋਟਲ ’ਚ ਜਾਣ ’ਤੇ ਪਾਬੰਦੀ ਲਗਾ ਦਿੱਤੀ ਹੈ।

ਇਸਲਾਮਾਬਾਦ ’ਚ ਇੱਕ ਆਤਮਘਾਤੀ ਹਮਲੇ ’ਚ ਇਕ ਪੁਲੀਸ ਮੁਲਾਜ਼ਮ ਦੀ ਮੌਤ ਹੋਣ ਦੀ ਘਟਨਾ ਤੋਂ ਦੋ ਦਿਨ ਬਾਅਦ ਅਮਰੀਕੀ ਦੂਤਾਵਾਸ ਨੇ ਇਹ ਚਿਤਾਵਨੀ ਜਾਰੀ ਕੀਤੀ ਹੈ। ਇਸ ਸਬੰਧੀ ਜਾਰੀ ਬਿਆਨ ’ਚ ਕਿਹਾ ਗਿਆ ਹੈ, ‘ਅਮਰੀਕੀ ਸਰਕਾਰ ਨੂੰ ਸੂਚਨਾ ਮਿਲੀ ਹੈ ਕਿ ਅਣਜਾਣ ਲੋਕ ਛੁੱਟੀਆਂ ’ਚ ਇਸਲਾਮਾਬਾਦ ਸਥਿਤ ਮੈਰੀਅਟ ਹੋਟਲ ’ਚ ਅਮਰੀਕੀਆਂ ’ਤੇ ਹਮਲੇ ਦੀ ਸਾਜ਼ਿਸ਼ ਰਚ ਰਹੇ ਹਨ।’ ਇਸ ’ਚ ਕਿਹਾ ਗਿਆ ਹੈ, ‘ਇਸਲਾਮਾਬਾਦ ’ਚ ਅੰਬੈਸੀ ਸਾਰੇ ਅਮਰੀਕੀ ਮੁਲਾਜ਼ਮਾਂ ਦੇ ਇਸਲਾਮਾਬਾਦ ਸਥਿਤ ਮੈਰੀਅਟ ਹੋਟਲ ’ਚ ਜਾਣ ’ਤੇ ਤੁਰੰਤ ਪ੍ਰਭਾਵ ਨਾਲ ਪਾਬੰਦੀ ਲਾਉਂਦੀ ਹੈ।’ ਅੰਬੈਸੀ ਨੇ ਕਿਹਾ ਕਿ ਸੁਰੱਖਿਆ ਸਬੰਧੀ ਚਿੰਤਾਵਾਂ ਦੇ ਮੱਦੇਨਜ਼ਰ ਇਸਲਾਮਾਬਾਦ ਨੂੰ ‘ਰੈੱਡ’ ਅਲਰਟ ’ਤੇ ਰੱਖਿਆ ਗਿਆ ਹੈ। ਅਜਿਹੇ ’ਚ ਸਾਰੇ ਮਿਸ਼ਨ ਮੁਲਾਜ਼ਮਾਂ ਨੂੰ ਛੁੱਟੀਆਂ ’ਚ ਰਾਜਧਾਨੀ ਵਿੱਚ ਗ਼ੈਰ-ਜ਼ਰੂਰੀ ਤੇ ਗ਼ੈਰ-ਸਰਕਾਰੀ ਯਾਤਰਾ ਨਾ ਕਰਨ ਦੀ ਅਪੀਲ ਕੀਤੀ ਜਾਂਦੀ ਹੈ। ਇਹ ਸਲਾਹ ਅਜਿਹੇ ਸਮੇਂ ਜਾਰੀ ਕੀਤੀ ਗਈ ਹੈ ਜਦੋਂ ਇਸਲਾਮਾਬਾਦ ’ਚ ਹਾਲ ਹੀ ਵਿੱਚ ਹਮਲਾ ਹੋਇਆ ਸੀ ਤੇ ਪਾਬੰਦੀਸ਼ੁਦਾ ਅਤਿਵਾਦੀ ਜਥੇਬੰਦੀ ਤਹਿਰੀਕ- ਏ- ਤਾਲਿਬਾਨ ਪਾਕਿਸਤਾਨ ਦੇ ਹਮਲੇ ਵਧੇ ਹਨ। ਇਸਲਾਮਾਬਾਦ 23 ਦਸੰਬਰ ਨੂੰ ਹੋਏ ਇੱਕ ਅਤਿਵਾਦੀ ਹਮਲੇ ਤੋਂ ਬਾਅਦ ਹਾਈ ਅਲਰਟ ’ਤੇ ਹੈ। ਇਸ ਹਮਲੇ ’ਚ ਪੁਲੀਸ ਅਫਸਰ ਤੇ ਦੋ ਮਸ਼ਕੂਕ ਅਤਿਵਾਦੀਆਂ ਦੀ ਮੌਤ ਹੋ ਗਈ ਸੀ।